Ndumbo yo Ciriro 4:1-22
א [Arefi]
4 Goridhi rain’ganikiraya, rainga rakanasirihwa, ariripi kun’ganikirazve!
Mapuwe o mu ndau yakaceneswa,* akandhandhaniswa mu makhona* ese.
ב [Bheti]
2 Vana vanosisira vo Ziyoni, vaisisiraya maningi inga goridhi rakanasirihwa,Vari kutajwa inga mujiyo jakaithwa ngo dongo.
Mujiyo jakaithwa ngo muruki.
ג [Gimeri]
3 Pikija imbhwa jo musora jinomwisa zvivana zvajo,Asi mwana wokaji wo vandhu vangu, wakava mundhu wakashata,Inga ice yo mubani.*
ד [Dhareti]
4 Rurumi wo mwana wo pamavero, wakanamirira panyezuru, mukanwa mwake ngo ndava yo nyota.
Vana vadoko vanokumbira zvokuha, asi apana anovapekeja.
ה [He]
5 Vandhu vaiha ushoni, vari kuwa ngo njara muzvitaka.*
Vandhu vakakura vecisimira nguvo jakaseja,* vari kuvata pa duru.
ו [Wau]
6 Kusvuzvunuhwa ko* mwana wokaji wo vandhu vangu, kwakakura maningi kupinda kusvuzvunuhwa ko Sodhoma ngo zvishaishi zvaro.
Irona rakaparajwa* ngo civhumbu, pacina no mundhu anoribesera.
ז [Zayini]
7 Unaziri hwake hwainga hwakacena kupinda cando.
Hwaicena kupinda mukaka,* ihwona hwaipsuka kupinda mapuwe o mutengo mukuru.
Hwaiita inga mapuwe o safira akanasirihwa.
ח [Heti]
8 Muviri wavo wakasvipa kupinda macitu,Avacatozivi pavanonga vecifamba mucitaka.*
Ganda* ravo rapera kufonyanira pa maphondo avo, rooma inga huni.
ט [Teti]
9 Vakaurawa ngo banga, vari nane kupinda vakaurawa ngo njara.
Ivona vanofa padoko padoko ngo kutama zvokuha zvinoivhiswa mu maminda.
י [Yodhi]
10 Vanakaji vakanaka, vakabika vana vavo kamare,Vana ava, vakava zvokuha zvavo pa nguva yokuwa ko mwana wokaji wo vandhu vangu.
כ [Kafi]
11 Jehovha wakavonesa ushungu hwake,Wodurura ushungu hwake hunobwaka.
Iyena wakabwakija muriro mu Ziyoni, wopisa njiki jayo.
ל [Lamedhi]
12 Majimambo o nyika no vagari vayo vese,Avacaitendepi kuti muvengi waizonghwina ngo musuvo jo Jerusarema.
מ [Memi]
13 Izvi zvakaitika ngo ndava yo zvishaishi zvo vaporofeti vavo no zvishaishi zvo vapiri vavo,Vaingaya vakauraya* vandhu vakanaka vari pakati paro.
נ [Nuni]
14 Ivona vanombeya mu makwanja inga mapofu.
Sangi yakavasiya vakasvipa,Zvoita kuti akuna no mundhu anokwanisa kupsasa nguvo javo.
ס [Sameki]
15 Ivona vanovakhuwira* veciti: “Ivhanyi apa! Imwimwi vandhu vacizivi kucena!” “Ivhanyi apa! Ivhanyi apa! Mucatipsasa!”
Ngokuti ivona avacina pokugara, varikundombeya.
Vandhu vo majinja vakati: “Ivona avadikani kugara na itusu.
פ [Pe]
16 Jehovha wakavaparajanisa,Iyena aacazovaitiri unyasha.
Vandhu avazoreremeji vapiri nee avazoitiri unyasha vakuru.”
ע [Ayine]
17 Majiso edu aremba ngo kupsaka besero teciritama.
Taindopsaka no kupsaka besero ku jinja ricikakwanisi kutiponesa.
צ [Tsadhe]
18 Mudanyu* jedu jaigadhiwa zvoita kuti titame kukwanisa kufamba mu ndau jedu jinogara vandhu.
Kupera kwedu kwaaphedo.
Njiku jedu japera, ngokuti kupera kwedu kwaguma.
ק [Kofe]
19 Vatevereri vedu vaigogoma maningi kupinda hokotora jo kudenga.
Ivona vaititeverera ngo mu matundhu, vaigara vakatifindarira* ngo mubani.
ר [Reshi]
20 Muzojiwa wa Jehovha, kana mwiha watinofemari, wakawira mugomba ravo guru.
Tainanga kudari ngo pamusoro pake: “Tinozogara pa munvuriri wake, pakati po majinja.”
ש [Sini]
21 Nandi vandhu vo Edhomi munogara mu nyika yo Uzi, dakaranyi no kudakarisisa.
Asi imwimwi munozowanavo kopo yo matambujiko, mozodhakwa, mobudisa pambhene umitu hwenyu.
ת [Tawi]
22 Nandi mwana wo Ziyoni,Kusvuzvunuhwa kwako ngo ndava yo zvishaishi zvako, kwaguma kumbhiri.
Mwari aacakuendesizve kuuranda.
Asi iyena anozoceukija zvishaishi zvako, mwana wo Edhomi.
Iyena anozobudisa pambhene zvishaishi zvako.
Masoko o Pasi
^ Gama ngo Gama: “pamusoro po makwanja.”
^ Kana: “Mapuwe akaceneswa.”
^ Kana: “zishiri ziguru.”
^ Kana: “mu ruwa.”
^ Kana: “jakanyara.”
^ Gama ngo Gama: “Zvishaishi zvo.”
^ Kana: “rakapejwa.”
^ Kana: “reti.”
^ Kana: “Dovo.”
^ Kana: “mu ruwa.”
^ Kana: “Vaingaya vakapopomeja sangi yo.”
^ kana: “vanomimira.”
^ Madazo.
^ Kana: “vakativandira.”
