Nduyo 104:1-35
104 Upenyu hwangu ngahusimbe Jehovha.
Jehovha Mwari wangu, imwimwi makakura maningi.
Makasimira rukujo no nderemejo.
2 Makatora ruvheneko mousimira inga nguvo;Makatambanuja matenga inga nguvo yo tende.
3 Iyena wakavaka ndau yake yokugara mu kumwa yo kumatenga,Eciita kuti makore ave ngoro* yake,Ecifamba pamapapiro o mbhepo.
4 Iyena anoita kuti ngirozi jake jive no simba maningi,*Woita kuti vashandiri vake vave inga muriro unopisa.
5 Iyena wakavangisa nyika pamaambo ayo;Iyona aizovhiswi* pa ndau yayo kwenda no kwenda.
6 Imwimwi makaifukija ngo kumwa yakajika inga nguvo.
Kumwa yakaima panyezuru po matundhu.
7 Pamakamusa izwi renyu, kumwa yakatiza,Kumwa payakazwa kutaka ko mbheni, iyona yakathya yogogoma.
8 Matundhu akakhwira, mapani oderera,Kwenda ku ndau yamakanasirira kuti zvigareyo.
9 Makadira mugano kuti izvona zvitame kuupindirija,Kuti zvitame kuzohwirirazve kuzofukija nyika.
10 Iyena anoita kuti mumapani* mubude kumwa,Kumwa yawo inopopoma pakati po matundhu.
11 Zvinyama zvese zvo musora zvinomwa kumwa yo mondhomo;Mbongoyo jese jo musora jinopeja nyota yajo ngo kumwa yondhoyo.
12 Shiri jo kumatenga jinomata pa mamuti ari mu mbhiripiri mo kumweyo;Ijona jinorira jiri pakati po masakani.
13 Iyena anodirijira matundhu ari ku ndau yake yaanogara.
Nyika inoguta ngo mucero yo mabasa ake.
14 Iyena anomeresa sora kuitira n’gombeNo muti kuti vandhu vashandise,Kuti varime zvokuha izvi pa nyika.
15 Vhinyu inoita kuti mwoyo wo mundhu udakare,Mafuta anoita kuti kumeso ko mundhu kumonikire,Zvokuha zvinovangisa mwoyo wo mundhu.
16 Muti ya Jehovha yakadirijihwa ngo kumwa,Muti yo sedhro yo Rebhanoni yaakasima.
17 Shiri jinoitiremo saki yajo,
Nyumba yo thupu inogara mu muti jo junipa.
18 Matundhu akareba anogara mbuji jo musora;Mbira* jinotizira mu mapuwe.
19 Iyena wakaita mweji kuti upime mukuvo;Zuva rinonasa kuziva nguva yaro yokuvira.
20 Imwimwi munoviisa cidima, usiku hwoguma,Zvinyama zvo musora zvinobuda, zvotanga kufamba.
21 Zvimbhondoro zvinobhonga zvecipsanga zvinyama zvokuruma,Zvinokumbira Mwari zvokuha zvazvo.
22 Kunja kukaeja, izvona zvinohwirira,Zvoenda koovata mumapako azvo.
23 Mundhu anobuda woenda ku basa rake,Iyena anoshanda mbhera kuvira ko zuva.
24 Jehovha makaita zviro zvakawanda maningi!
Makaita zviro zvese ngo uzivi hwenyu.
Nyika yakazara ngo zviro zvamakaita.
25 Vonanyi! Jombe rakajika no kukura maningi,Rakazara ngo zviro zvinopona zvicikaverengeki, zvidoko no zvikuru.
26 Mondhomo munopinda piketi,Mopindazve Revhiyatani* yamakasika kuti itambiremo.
27 Zvese zvinoimira imwimwi,Kuti muzvipe zvokuha pamukuwo wazvo.
28 Izvona zvinoha zviro zvamunozvipa.
Pamunofunungura nyara yenyu, izvona zvinoguta ngo zviro zvakanaka.
29 Pamunozvivigira kumeso kwenyu, izvona zvinoneseka.
Pamunozvivhisira mwiha wazvo wokufema,* izvona zvinofa zvohwirira ku bukuta.
30 Pamunotumira mujimu wenyu wakacena, izvona zvinosikwa,Imwimwi munoita kuti pasi pave no upenyu upsa.
31 Nduma ya Jehovha inozogara iripo mbhera narini.
Jehovha anozodakara ngo ndava yo mabasa ake.
32 Iyena anosota nyika, iyona yotetemera;Iyena anopsasa matundhu, iwona ophunga usi.
33 Ndinozoimbira Jehovha mu upenyu hwangu hwese;Ndinozoimba ndumbo jo kusimba Mwari wangu pandinonga ndecipona.
34 Zvandinorangarira ngazvimudakajise.
Inini ndinozodakara pandinonga ndecirangarira ngo pamusoro pa Jehovha.
35 Vandhu vanoita zvakashata vanozongara-ngara pa nyika,Vandhu vakashata avazowanikizve.
Inini ngandisimbe Jehovha. Simbanyi Jehovha!*
Masoko o Pasi
^ Kana: “kareta.”
^ Kana: “inga mbhepo. Ngo Cihebheru, ru·chohth.”
^ Kana: “aizozungunyiswi.”
^ Kana: “Uwadhi.” Vonanyi Kudurujihwa ko Magama.
^ Mbira, icinyama cicina mushe zve cinomajiso madoko.
^ Vonanyi Kudurujihwa ko Magama.
^ Kana: “simba ro upenyu.”
^ Kana: “Areruya!” Kana: “Jah.” Uku ikugurisihwa ko zina ra Jehovha.
