Nduyo 147:1-20
147 Simbanyi Jehovha!*
Zvakanaka maningi kuimba ndumbo jo kusimba Mwari wedu;Zvinodakajisa maningi, iyena anofanera kusimbhwa!
2 Jehovha ari kuvaka Jerusarema;Iyena ari kuunganija vandhu vake vainga vakandhandhanika vo Iziraeri.
3 Iyena anorapa vandhu vano mwoyo inohwaja;No kurapa zvivonje zvavo zvinohwaja.
4 Iyena anoverenga mutengo wo ndhondho;Wojidaninja jese ngo mazina ajo.
5 Mambo wedu wakakura, iyena ano simba guru;Azvikwanisiki kupima kuzwisisa kwake.
6 Jehovha anomusa vandhu vakapfava,Asi anokhandira pasi vandhu vakashata.
7 Imbiranyi Jehovha mecimubonga;Imbanyi ndumbo jo kusimba Mwari mecishandisa cimadangari,*
8 Wiya anofukija matenga ngo makore,Wiya anonisa nvura pa nyika,Wiya anoita kuti sora rimere panyezuru po matundhu.
9 Iyena anopa zvokuha zvinyama,No kupa zvokuha zvimapwipwi zvo gunguvo zvinorira ngo njara.
10 Iyena aadakariri simba ro haci;Nee aashamaiswi ngo kuvanga ko makumbo o mundhu.
11 Jehovha anodakarira vandhu vaya vanomuthya,Avo vanoimira rudo hwake hucikacinji.
12 Iwewe Jerusarema, kujai Jehovha.
Iwewe Ziyoni, simbai Mwari wako.
13 Iyena anovangisa mugogo yo musuvo jako;Wokomborera vana vako vanogara mondhomo.
14 Anoviisa runyararo mu ndharaundha yako;Iyena anokugutisa ngo tirigu yaushoni kamare.
15 Iyena anotumira mutemo wake pa nyika;Masoko ake anogogoma ngo kukasika.
16 Iyena anonisa cando, cocena inga nguvo yakacena;Wondhandhanisa cando inga marota.
17 Anokhandira pasi mapuwe o nvura inga mbhakata jo zvokuha.
Ndiyani anokwanisa kucijikira kutondhora kwawo?
18 Iyena anotumira soko rake, iwona o nyunguruka.
Anoita kuti mbhepo yake ivhunguze, kumwa yopopoma.
19 Iyena anozivisa Jakobe soko rake,Anozivisa Iziraeri matongero ake no mutemo yake.
20 Aazivi kuita izvi no jinja rimweni;Iwona apana caanoziva ngo pamusoro po matongero ake.
Simbanyi Jehovha!*
Masoko o Pasi
^ Kana: “Areruya!” Kana: “Jah.” Uku ikugurisihwa ko zina ra Jehovha.
^ Thurusi rinoshandiswa pa kurija mumbo. Ngo ciputukezi rinodaninjwa kuti harpa.
^ Kana: “Areruya!” Kana: “Jah.” Uku ikugurisihwa ko zina ra Jehovha.
