Nduyo 33:1-22
33 Vandhu vakarurama, ngavaimbire Jehovha ngo mudakaro wese ngo ndava yo zviro zvakanaka zvaaita.
Ngokuti ngozvinofanera ku vandhu vakarungama kuti vamusimbe.
2 Bonganyi Jehovha muno cimadangari;*Muimbirenyi ndumbo jo kumusimba muno cinorijwa cino gumi ro shinda.
3 Muimbirenyi ndumbo imbza;Nasanyi kumurijira, mumuimbire ngo mudakaro wese.
4 Ngokuti soko ra Jehovha rakarungama,Zvese zvaanoita zvinothembeka.
5 Iyena anoda urungami no ururami.
Nyika yakazara ngo rudo hucikacinji hwa Jehovha.
6 Matenga akaitwa ngo soko ra Jehovha,Zvese zvirimo, zvakaitwa ngo mwiha waivha pa muromo pake.
7 Iyena anounganija kumwa yo mu jombe woifungira;Wodira mu nyumbu kumwa inopopoma maningi.
8 Nyika yese ngaithye Jehovha.
Vese vanogara mukati mwayo ngavamureremeje.
9 Iyena wakavereketa, zviro zvese zvovepo;Iyena wakapa mupango, zviro zvese zvakaima tevere zvovanga.
10 Jehovha wakaphwanya mbhangiro jo majinja;Iyena wakavhiringija mazano o vandhu.
11 Matongero a Jehovha anogara aripo mbhera narini;Murangariro yo mu mwoyo mwake inogara mubarihwana mbhera mubarihwana umweni.
12 Rinodakara jinja rinonamata Jehovha inga Mwari waro,Vandhu vakasanwa ndiyena kuti vaite ndhaka yake.
13 Jehovha anoringisa ari kumatenga;Iyena anovona vana vese vo vandhu.
14 Ari ku ndau yake yaanogara,Iyena anosotesesa vagari vese vo pa nyika.
15 Ndiyena ari kuumba mwoyo yavo yese;Iyena anopopora mabasa avo ese.
16 Akuna mambo anoponeswa ngokuti ano masoca akawanda;Musoca ano simba, aaponeswi ngokuti ano simba rakakura.
17 Haci, inopa vetero yo kunyepa kuitira ruponeso;Simba yaro guru, arirevi kuti mundhu angaponeswa.
18 Izwanyi! Majiso a Jehovha anosota vandhu vaya vanomuthya,Vandhu vaya vanoimira rudo hwake hucikacinji,
19 Kuti avaponese pa rufu,No kuvangwarira kuti vagare vari penye pa mukuwo wo njara.
20 Itusu tinoimira Jehovha.
Ngokuti ndiyena mubeseri wedu no muvhiko wedu.
21 Mwoyo yedu inodakara naye,Ngokuti tinothemba zina rake rakacena.
22 Jehovha Mwari wedu, rudo hwenyu hucikacinji ngahuve na itusu,Patinoenderera mberi tecimuimira.
Masoko o Pasi
^ Thurusi rinoshandiswa pa kurija mumbo. Ngo ciputukezi rinodaninjwa kuti harpa.
