Nduyo 44:1-26
Ku mutungamiriri. Nduyo yo vana va Koraa. Masikiri.*
44 Mwari wedu, itusu takazwa ngo njeve jedu kamare,Majicekuru edu akativhunja,Zviro zvamakaita mu njiku javo,Njiku jokare kamare.
2 Makagogomera majinja ngo nyara yenyuModira majicekuru edu mondhomo.
Makanyisa majinja no kumagogomera.
3 Majicekuru edu aazivi kutora nyika iyi ngo ndava yo mapanga avo,Nee avazivi kuwina ngo ndava yo simba ravo.
Kunasa kunanga, ivona vakawina ngo ndava yo nyara yenyu yo muho, simba renyu no ruvheneko wo kumeso kwenyu,Ngokuti imwimwi makavadakarira.
4 Mwari wangu, imwimwi muri Mambo wangu;Ipanyi Jakobe ruponeso hukuru.
5 Ngo simba renyu, tinozogogomera vavengi vedu;Ngo zina renyu,tinozonyisa vaya vanotimukira.
6 Ngokuti andithembi uta wangu,Banga rangu arikwanisi kundiponesa.
7 Ndimwi makatiponesa mu nyara jo vavengi vedu,Ndimwi makanyoweja vaya vaitizonda.
8 Mwari, itusu tinozomusimba njiku jese,Tinozosimba zina renyu kwenda no kwenda. (Sera)
9 Asi wari, imwimwi matiramba no kutinyoweja,Imwimwi amuendi pamwepo no masoca edu.
10 Imwimwi munoita kuti itusu titize vavengi vedu;Vaya vanotizonda vanotitorera zviro zvedu ngo kuda kwavo.
11 Imwimwi munotidira mu nyara javo kuti tiuraiwe inga mavhuta;Imwimwi munotindhandhanisa pakati po majinja.
12 Munotengesa vandhu venyu ngo mutengo mushoma;Apana camunowana pamunovatengesa.
13 Munoita kuti vocigarisano vedu vatishore;Munoitazve kuti ivona vatituke no kutiseka.
14 Imwimwi munoita kuti itusu titukwe pakati po majinja,Vandhu vo majinja vanojunguja musoro pavanotivona.
15 Ndinojizwa kudodokeswa njiku yese,Andikwanisi kumusa musoro wangu ngo nyowa,
16 Ngo ndava yo masoko avo o kushora no o kutuka;Ngo ndava yo muvengi wedu ari kutihwirijira ngo zviro zvakashata.
17 Zvese izvi zvakatiitikira, asi pikija zvakadaro, itusu atizivi kumukanganwa,Nee atizivi kuphwanya citenderano cenyu.
18 Mwoyo yedu aizivi kumusiya;Soka jedu ajizivi kusiya kufamba mu gwanja renyu.
19 Imwimwi munotiuraya pa ndau inogara imbhwa jo musora;Imwimwi munotifukija ngo makore akasvipa maningi.
20 Kudari itusu notakakanganwa zina ra Mwari weduKana kudari itusu notakamusa nyara jedu toita mukumbiro kuno mwari umweni,
21 Kureva kuti Mwari aacaizozvipfumburepi izvi?
Iyena anoziva zviro zvakafisika zviri mu mwoyo.
22 Tiri kuurawa njiku jese ngo ndava yenyu;Tiri kuvoniwa inga mavhuta ari kwenda kourawa.
23 Jehovha Mwari wedu, mukanyi. Ngenyi munoenderera mberi makavata?
Mukanyi! Mucatiramba mbhera narini.
24 Ngenyi muri kuviga kumeso kwenyu?
Ngenyi makanganwa matambujiko edu no kuneswa kwedu?
25 Ngokuti itusu tawisihwa mu bukuta;Muviri yedu yacikinijihwa pasi.
26 Mukanyi kuti mutibese!
Tiponesenyi ngo ndava yo rudo hwenyu hucikacinji.
Masoko o Pasi
^ Vonanyi Kudurujihwa ko Magama.
