Nduyo 45:1-17
Ku Mutungamiriri. Ndumbo inobhuya ngo pamusoro po “Maruva.” Nduyo yo vana va Koraa. Masikiri.* Ndumbo yo rudo.
45 Kuno ciro cakanaka cinoita kuti mwoyo wangu uzare ngo mudakaro.
Inini ndinoti: “Ndumbo yangu inobhuya ngo pamusoro pa mambo.”
Rurumi hwangu ngahuve inga hwo rapizera* yo mutari anokwanisa kutara.
2 Mambo wangu, imwimwi makanaka maningi pakati po vana vo vandhu.
Imwimwi munobhuya masoko anodakajisa.
Ndizvona zvakaitisa kuti Mwari amukomborere mbhera narini.
3 Sungiranyi banga renyu mucihunu,* imwimwi muno simba,Mukureremejwa kwenyu, no mu nduma yenyu.
4 Muri mu nduma yenyu, endanyi koowina;Pakiranyi haci yenyu kuti muende kohwa ngo ndava yo cokwadi, kuzvidodokesa no ururami.Mukono wenyu wo muho unozoita* zviro zvinoshamaisa.
5 Mambo wangu, mupasha yenyu yakapinja* maningi, inowisa vandhu vese pamberi penyu.Iyona inobaya mwoyo yo vavengi venyu.
6 Mwari ndiyena cigaro cenyu co umambo mbhera narini, kwenda no kwenda.Ndonga yenyu yo umambo indonga yo ururami.
7 Imwimwi mambo wangu, makada ururami, monyenya zvakashata.
Ndizvona zvakaitisa kuti Mwari, Mwari wenyu kamare, amuzoje ngo mafuta no kumupekeja mudakaro mukuru kupinda vadoni venyu.
8 Nguvo jenyu jese jakadihwa mafuta o mira, mafuta o arowe no mafuta o kasiya.Munodakajihwa ngo zvinorijwa ngo shinda, muri mu nyumba ya mambo yakaithwa ngo nyanga jo njou.
9 Pakati po vakaji venyu vanoreremejwa, pakaima vana vokaji vo majimambo.
Pa mukono muho wenyu, pakaima vahosi vakasimira goridhi ro ku Ofiri.
10 Iwewe mwana wokaji, izwai, nasai kuteya njeve upurukire;Kanganwai vandhu vako no nyumba ya baba wako.
11 Mambo anozokuda ngo ndava yo kuseja kwako,Ngokuti iyena ndi mambo wako,Ngo kudaro, iwewe unodikana kugwadama pamberi pake.
12 Mwana wokaji wa Tiro, anozoviya no cipo;Vandhu vakaganya vanozopsaka kuitihwa unyasha ndimwi.
13 Mwana wokaji wa mambo wakazara ngo nduma ari mukati mo nyumba ya mambo;Nguvo yake yakasejeswa ngo goridhi.
14 Iyena anoendeswa kuna mambo wakasimira nguvo jakanaswa kusonwa.
Mbhandwe jinomuteverera, vadoni vajo vanotohwa vonghwiniswa mukati pamberi pa mambo.
15 Vanozotohwa veciimba ngo mudakaro, vakadakara;Vozonghwina mu nyumba ya mambo.
16 Vana venyu imwimwi mambo vanozogara pandau yo majicekuru avo.
Imwimwi munozovagaja inga vatungamiriri vo pasi pese.
17 Ndinozoita kuti zina rako rizivike ngo mubarihwana no mubarihwana unozoza.
Ngo kudaro, vandhu vanozokusimba mbhera narini, kwenda no kwenda.
Masoko o Pasi
^ Vonanyi Kudurujihwa ko Magama.
^ Kana: “thurusi rokutara ndirona ro.”
^ Vonanyi Kudurujihwa ko Magama.
^ Gama ngo Gama: “unozokujijisa.”
^ Kana: “yakapita.”
