Nduyo 74:1-23
Masikiri* a Azafi.
74 Mwari wangu, ngenyi matiramba mbhera narini?
Ngenyi ushungu hwenyu hwabwakira mushambi wamunohavisa.
2 Mucakanganwa vandhu vamakasana kuvhira kare no kare,Vhumbo ramakaponesa inga ndhaka yenyu.
Mucakanganwa Dundhu ro Ziyoni, ndau yamaigara.
3 Endanyi ku ndau, moovona zviro zvapera kuphwanyiwa zvoita mathere.
Muvengi waphwanya zviro zvese zvainga mu ndau yakacena.
4 Vavengi venyu vakabhonga mukati mo ndau yenyu yo musongano.
Ivona vakamusa mondhomo zvitatijo zvavo.
5 Ivona vaiita inga vanarume vanomusa bheura* kuti vateme mamuti o mugwasha.
6 Vakaphwanya ngo bheura no mugwara zviro zvese zvainga zvakatahwa mu mapiravira o ndau yenyu yakacena.
7 Vakadira muriro mu ndau yenyu yakaceneswa.
Vosvipisa no kuwisa pasi tabherinake yenyu inotora zina renyu.
8 Ivona no mubarihwana wavo, vainanga kudari ngo mu mwoyo mavo:
“Ndau jese jo musongano ja Mwari* jiri pasi pano jinozopiswa.”
9 Apacinazve zvitatijo zvatingavona;Apacinazve no muporofeti umwe hake,Apana na umwe wedu anokwanisa kuziva kuti izvi zvinopera mukuvo wakadini.
10 Mwari wangu, mbhera rini muvengi anozoenderera mberi ecimutuka?
Kureva kuti muvengi aazoreremeji zina renyu kwenda no kwenda?
11 Ngenyi amutambanuji mukono wenyu, mukono wenyu wo muho?
Uvhisenyi pacifuva cenyu, muvapeje.
12 Asi Mwari ndiyena Mambo wangu, kuvhira kare no kare,Wiya anoita zviito zvo ruponeso pasi pano.
13 Imwimwi makavhunguza jombe ngo simba renyu;Mogura musoro yo zvinyama zvakakura zviri mu jombe.
14 Imwimwi makaphwanya musoro wo Revhiyatani;*Moupa vandhu inga zvokuha, vagari vo mubani.
15 Makafunungura ndau jinobuda kumwa, kumwa yobuda yakawanda maningi;Makaomesa murambo jaipopoma mukuvo wese.
16 Masikati ngo enyu, usiku ngowenyuzve.
Makaita ruvheneko no zuva.
17 Makadira mugano yese yo nyika;Makaita cirimo no cipepo.
18 Jehovha Mwari wangu, ceukijanyi kutukwa komakaitwa ngo vavengi venyu,Kutama kureremejwa kuri kuithwa zina renyu ngo vandhu vacina hwiru.
19 Mucapa zvinyama zvo musora njiva yenyu.
Mucakanganwa kwenda no kwenda upenyu hwo vandhu venyu vari kutambujika.
20 Mucakanganwa citenderano cenyu,Ngokuti ndau jino cidima jo nyika, jazara ngo vandhu vanoita uphanga.
21 Mundhu anoneswa acadopinda akanyangajwa;Mundhu anojidodokesa no murombo ngavasimbe zina renyu.
22 Mwari wangu mukanyi mujivirire ndava yenyu.
Mucakanganwa kuti vandhu vacina hwiru vari kumutuka njiku jese.
23 Mucakanganwa zviro zvinonangwa ngo vavengi venyu.
Izwi ro vandhu vanomupandukira riri kukhwira mukuvo wese.
Masoko o Pasi
^ Vonanyi Kudurujihwa ko Magama.
^ Kana: “mureno.”
^ Kana: “Ndau jese jinonamatihwa Mwari.”
^ Vonanyi Kudurujihwa ko Magama.
