Nduyo 89:1-52
Masikiri.* Nduyo ya Etani wo Zera.
89 Ndinozoimba mukuvo wese ngo pamusoro po rudo hucikacinji hwa Jehovha.
Ndinozoshandisa muromo wangu kuti ndizivise kugondeka kwenyu ku mubarihwana yese.
2 Hina, inini ndakati: “Rudo hucikacinji hunozogara wakavanga kwenda no kwenda.Imwimwi makavangisa kumatenga ngo kugondeka kwenyu.”
3 “Imwimwi makati, ndaita citenderano no mundhu wandakasana;Ndakapikira mushandiri wangu Dhavhidhi ndeciti:
4 ‘Ndinozovangisa mubarihwana wako mbhera narini,Ndozovangisa cigaro cako co umambo ku mubarihwana yese.’” (Sera)
5 Jehovha Mwari, matenga anosimba mabasa enyu anoshamaisa,Hina, anosimba kugondeka kwenyu mu ungano yo vacena.
6 Ngokuti ndiyani kumatenga angaezaniswa na Jehovha?
Ndiyani pakati po vana va Mwari wakaezana na Jehovha?
7 Mwari anoreremejwa maningi pa musongano wo vacena;Iyena wakakura maningi, anoita zviro zvinothyisa maningi ku vese vakamutendeneja.
8 Jehovha Mwari wo hondo,Jehovha,* ndiyani ano simba inga ndimwi?
Kugondeka kwenyu kwakamutendeneja.
9 Imwimwi munonyaraja ushungu hwo jombe;Mavimbi aro paanomuka, imwimwi munomanyaraja.
10 Imwimwi makacangaja Rahabhi, hina, makamusiya inga mundhu wakafa.
Imwimwi makandhandhanisa vavengi venyu ngo mukono wenyu uno simba.
11 Matenga ngo enyu, nyika ngo yenyu;Ndimwi makaita nyika no zvese zvirimo.
12 Ndimwi makasika kanjikazi no kakusi;Tabhori na Herimoni zvinosimba ngo mudakaro wese zina renyu.
13 Mukono wenyu uno simba;Nyara yenyu yakavanga;Nyara yenyu yo muho inonyisa.
14 Urungami no ururami ndizvona maambo o cigaro cenyu co umambo;Rudo hwenyu hucikacinji no kugondeka zviri pamberi penyu.
15 Vanodakara vandhu vanoziva kukhuwa ngo mudakaro.
Jehovha Mwari, ivona vanofamba mu ruvheneko pamberi penyu.
16 Ivona vanodakara njiku jese ngo ndava yo zina renyu,Vokujwa ngo ndava yo urungami wenyu.
17 Ngokuti imwimwi muri rukujo hwo simba ravo,Ngo unyasha hwenyu, simba redu rinoengejeka.
18 Ngokuti muvhiko wedu unovha kuna Jehovha,Mambo wedu anovha kuno Mucena wo Vaiziraeri.
19 Pa mukuvo wondhowo, makavereketa no vagondeki venyu mucivoniso, monanga kudari:
“Ndakapa simba musoca wakavanga;Ndakakuja wiya wandakasana pakati po vandhu.
20 Ndawana Dhavhidhi mushandiri wangu;Ndomuzoja ngo mafuta angu akacena.
21 Nyara yangu inozomubesa,Mukono wangu unozomuvangisa.
22 Apana muvengi anozomuvangirija kushaba,Apana mundhu acizivi kururama anozomunesa.
23 Ndinozogura-gura vavengi vavo pamberi pavo,Ndozouraya vaya vanovazonda.
24 Kugondeka kwangu no rudo hwangu hucikacinji zvina iyena,Simba rake rinozoengejeka ngo ndava yo zina rangu.
25 Ndinozodira nyara* yake panyezuru po jombe,Ndozodira nyara yake yo muho panyezuru po murambo.
26 Iyena anozondidaninja ecinanga kudari: ‘Imwimwi muri Baba wangu,Mwari wangu no Buwe ro ruponeso hwangu.’
27 Inini ndinozomuita kuti ave dangwe,Wova mukuru pa majimambo ese o panyika.
28 Rudo hwangu hucikacinji hunozogara kwenda no kwenda kwaari,Citenderano candakaita nayena acizoperi.
29 Ndinozovangisa mubarihwana hwake mbhera nariniNdozoita kuti cigaro cake co umambo cigare ciripo inga matenga.
30 Kudari vana vako vakasiya mutemo wanguVotama kufamba mukuzwirana no matongero angu,
31 Kudari vakaphwanya mutemo yanguVotama kuzwira mupango yangu,
32 Ndinozopanica kupanduka kwavo ngo mushakwe,Ndozovataka ngo ndava yo kuposa kwavo.
33 Asi andizosii kukhombija rudo hwangu hucikacinji kwaari,Nee andizovi mundhu acizivi kugondeka ku zviya zvandakagondesa.
34 Andizophwanyi citenderano cangu,Nee andizocinji zvandakananga ngo muromo wangu.
35 Mu uceni hwangu ndakapika kamwe basi mbhera narini;Andizonyeperi Dhavhidhi.
36 Mubarihwana wake unozogara mbhera narini;Cigaro cake co umambo cinozogara ciripo inga zuva pamberi pangu.
37 Kudari inga mweji, cinozovangiswa mbhera narini,Inga capupu cakagondeka co kumatenga.” (Sera)
38 Asi imwimwi makamusiya no kumuramba;Makanyangajwira wokuzojwa wenyu.
39 Makaramba citenderano camakaita no mushandiri wenyu;Mosvipisa korowa yake, moikhandira pasi.
40 Makaphwanya ndau jake jese jo mapuwe;Mophwanya ndau jake jakavangiswa jova mathere.
41 Vese vanopinda ngo gwanja vanomubira zviro zvake;Iyena anozondhwa maningi ngo vocigarisano vake.
42 Makaita kuti vavengi vake vawine;Moitazve kuti vavengi vake vese vadakare.
43 Makaitazve kuti banga rake ritame kushanda,Imwimwi makaita kuti iyena anyiswe ku hondo.
44 Makapeja simba rake,Mowisa pasi cigaro cake co umambo.
45 Makapungura mazuva o ujaha hwake;Momufukija ngo nyowa. (Sera)
46 Jehovha Mwari, munozofindara mbhera rini? Munozofindara kwenda no kwenda?
Ushungu hwenyu unozoenderera mberi wecibwaka inga muriro here?
47 Ceukijanyi kuti upenyu hwangu hwakafupika maningi!
Makasika vandhu vese mucina cinangwa here?
48 Ndiyani mundhu anoenderera mberi ecipona otama kufa?
Kureva kuti iyena angajiponesa pa simba ro Guva* here?
49 Jehovha Mwari, zviri kwapi zviito zvenyu zvo kare zvo rudo hwenyu hucikacinji,Zviri kwapi zviito zvenyu zvamakapikira Dhavhidhi ngo kugondeka kwenyu?
50 Jehovha Mwari, ceujanyi kutukwa kwakaitwa vashandiri venyu;Ndiri kucijikira kutukwa kwandiri kuizwa ngo vandhu vese;
51 Jehovha Mwari, ceukijanyi kutuka kwakaita vavengi venyu;Ivona vanotuka wokuzojwa wenyu kwese kwaanoenda.
52 Jehovha ngaasimbhwe kwenda no kwenda. Ameni, Ameni.
Masoko o Pasi
^ Vonanyi Kudurujihwa ko Magama.
^ Kana: “Jah.” Uku ikugurisihwa ko zina ra Jehovha.
^ Kana: “utongi hwake.”
^ Gama ngo Gama: “mu nyara mo Sheori.” Kana kuti, kufa kunoita vandhu vese. Vonanyi Kudurujihwa ko Magama.
