Neemiya 8:1-18
8 Vandhu vese vakabatana voungana pa ndau yaiungana vandhu, yainga pambeji po Musuvo wo Kumwa, vovhunja mutari Esdhra kuti aviise bhuku ro Mutemo wa Mosi, wainga wakapuwa Vaiziraeri ndi Jehovha.
2 Ngo kudaro, pa njiku yokutanga yo mweji wo cinomwe, Esdhra mupiri, wakaviisa bhuku ro mutemo pa ungano, painga no vanarume, vanakaji no vese vaikwanisa kuzwisisa zvainangwa.
3 Iyena wakauverenga ngo izwi guru pa ndau yaizara vandhu yainga pambeji po Musuvo wo Kumwa kuvha comangwanani mbhera comasikati. Iyena wakauverengera vanarume, vanakaji no vese vaikwanisa kuzwisisa. Vandhu vainasa kuzwa kuverengwa ko bhuku ro Mutemo.
4 Mutari Esdhra wainga akaima pa ndau yakakhwira yakanasirihwa ngo matabwa, kumukono wake wo muho kwainga kwakaima Matitiya, Shema, Anaiya, Uriya, Hirikiya na Maaseya. Kumukono wake wo boshwe kwainga kwakaima Pedhaya, Mishaeri, Marikija, Ashumi, Ashibhadhana, Zakariya na Meshuramu.
5 Esdhra wakazaura bhuku pambeji po vandhu, paakarizaura, vandhu vese vakaima. Ngokuti iyena wainga akaima pa ndau yakakhwirira kupinda vandhu vese.
6 Esdhra wakasimba Jehovha Mwari Mukuru wo cokwadi, vandhu vese vakadavira kudari: “Ameni!* Ameni!” vomusa nyara javo. Vakagwadama vosikimara* pamberi pa Jehovha vakasota pasi.
7 Jeshuwa, Bhani, Sherebhiya, Jamini, Akubhi, Shabhetai, Hodhiya, Maaseya, Kerita, Azariya, Jozabhadhi, Hanaa na Peraya vainga varevhi, vaisanangurira Mutemo vandhu vainga vakaima.
8 Ivona vaiverenga ngo izwi guru bhuku kuvha mu Mutemo wa Mwari wo cokwadi, vecinasa kusanangura no kupa revo rawo. Ngo kudaro, vaibesera vandhu kuzwisisa zvainga zveciverengwa.
9 Neemiya wainga govhernadhori, na Esdhra wainga mupiri no mutari, no varevhi vainga vecijijisa vandhu vakavhunja vese kudari: “Njiku ya nyamasi, injiku yakacena kuitira Jehovha Mwari wenyu. Mucacumba no kucema.” Ngokuti vandhu vese vainga vecicema* ngo kuzwa masoko o Mutemo.
10 Iyena wakavavhunja kudari: “Endanyi, ihanyi zvokuha zvakanakisisa no kumwa zvinotapira, tumiranyi zvokuha ku vandhu vaya vacina zvokuha zvakanasirihwa. Ngokuti njiku ya nyamasi, injiku yakacena ya Mambo wedu, mucagara makanyangajwa, ngokuti mudakaro unovha kuna Jehovha ndiwona simba renyu.”
11 Varevhi vainyaraja vandhu vese veciti: “Nyararanyi, ngokuti njiku ya nyamasi yakacena. Mucagara makacamwa.”
12 Vandhu vese vakapinda koha no komwa. Ivona vakatumirazve vamweni zvokuha. Vakadakara maningi ngokuti vakazwisisa masoko ovainga vavhunjwa.
13 Pa njiku yocipiri, musoro jo mbhuri jo kudivi ro majibaba o vandhu vese kubatanijavo no vapiri no varevhi, vakaungana pamwepo na Esdhra mutari kuti vanase kuzwisisa masoko o Mutemo.
14 Ngo kudaro, ivona vakawana pakatahwa mu mutemo wa Jehovha waakavhunja Vaiziraeri ecishandisa Mosi kuti ivona vaidikana kugara mu mucaca mu mukuwo wo mutambo mu mweji wo cinomwe,
15 kuti vaidikana kuzivisa no kuvhunja vandhu mu madhorobha avo ese no mu Jerusarema kuti: “Endanyi ku matundhu, muviise matavi akavhikira o maorivhe, matavi o muti wo mupinyu, matavi o muti wo murta no matavi o muti o mucindu pamwepo no matavi akavhikira* o muti jimweni kuti muzoite mucaca mukuzwirana no zvakatahwa.”
16 Ngo kudaro, vandhu vakaenda voviisa matavi kuti vaite mucaca. Umwe na umwe pa nyumba yake, pa ruvanje wake, pa ruvanje wa Mwari wo cokwadi, pa ndau inoungana vandhu yo Musuvo wo Kumwa no pa ndau inoungana vandhu yo Musuvo wa Efraimi.
17 Vandhu vese vo ungano vainga vakavha kuuranda vakaita mucaca voenda kogara mu mucaca. Vaiziraeri vainga vacito vaita mutambo wakaezana no wondhowo kuvhira mu njiku ja Joshuwa mwana wa Nuni mbhera pa njiku yondhoyo. Zvakaita kuti ivona vadakare maningi.
18 Mutemo wa Mwari wo cokwadi waiverengwa njiku jese kuvhira pa njiku yokutanga mbhera pa njiku yokupejisira. Ivona vakaita mutambo ko njiku nomwe, pa njiku yo cisere pakaitwa musongano wakacena mukuzwirana no zvaidikana kuithwa.
Masoko o Pasi
^ Kana: “Ngazviitike.”
^ Kana: “vokhodomara.”
^ Kana: “vecirira.”
^ Kana: “akapfikitira.”
