Obhadhiya 1:1-21
1 Civoniso ca Obhadhiya:*
Izvi ngo zvakananga Jehovha Mambo Mukuru-kuru ngo pamusoro po Edhomi:
“Takazwa masoko aivha ka Jehovha,Iyena wakatumira ndhumwa yake ku majinja ese yecinanga kudari:
‘Mukanyi, nasiriranyi kuti tiende kohwisana no Vaedhomi.’”
2 Mwari wakananga kudari: “Izwai! Ndakakuita kuti udodokeswe pakati po majinja;Iwewe unoshohwa maningi.
3 Kuzvikuja ko mwoyo wako kwakakucengeja,Iwewe unotizira mu mapuwe,Wecigara makakhwirira, wecinanga kudari mu mwoyo mako:‘Ndiyani anokwanisa kundiwisa pasi?’”
4 Jehovha anonangazve kudari:“Pikija iwewe ukagara mu ndau yakakhwira, inga hokotora,Wovaka saki* yako pakati po ndhondho,
Inini ndinozokwanisa kukuwisa pasi.”
5 “Kudari mbavha jikaviya kouri, magandanga* okugumira no usiku,Ivona avacaizotorepi zvavanoda here?
Kana kuti kudari vakotori vo uvha vakaguma kouri, vaizokusiira mbeu jakawanda here?Iwewe waizopejwa mukuperera ngo vavengi vako!
6 Mubarihwana wa Izau wakatorehwa zviro zvese, apana cakasara mu upfumi hwavo hwakavigwa.
7 Ivona vakakuvhisa mu nyika yavo.
Vese vainga vakabatana na iwewe vakakucengeja.
Vanarume vainga vano runyararo na iwewe vakakunyisa.
Vese vanoha na iwewe, vanozokuteya ngo murau kuti vakubate,Asi iwewe auzozvizivi.”
8 Jehovha wakananga kudari: “Pa njiku yondhoyo,Ndinozopeja uzivi hwo vandhu vo EdhomiNo ungwaru hwo vandhu vanogara mu matundhu a Izau.
9 Temani, masoca ako anozothya maningi,Ngokuti mundhu ariwese ari mu nyika ino matundhu a Izau, anozourawa.
10 Ngokuti wakaitira zvakashata hama yako Jakobe,Iwewe unozonyowejeka,*Iwewe unozopejwa mbhera narini.
11 Pa njiku yokuti iwewe wakagara wecisota,Pa njiku yokuti vavengi* vakatora masoca a Jakobe kwenda kuuranda,Vonyikanja pavakanghwina ngo pamusuvo pake, vokhandirirana sorti ngo pamusoro po Jerusarema,Iwewe wakatevejera zvovaiita.
12 Iwewe aucaidikanepi kudakara ngo dambujiko ro hama yako,Iwewe aucaidikanepi kudakara ngo kuurawa ko Vajudha,Iwewe aucaivhirepi kubhuya masoko okuzvikuja pa njiku yo kutambujika kwavo.
13 Iwewe aucaidikanepi kunghwina pa musuvo po vandhu vangu pa njiku yo vakawihwa ngo ngozi,Iwewe aucaidikanepi kudakajihwa ngo dambujiko ravo,Iwewe aucaidikanepi kutora pfuma yavo, pa njiku yovakawihwa ngo ngozi.
14 Iwewe aucaidikanepi kugara pa mbhararano kuti uuraye vandhu vake pavainga vacitiza,Pa njiku yo dambujiko, aucaidikanazve kutora vainga vapona, wovaendesa ku vavengi.
15 Njiku ya Jehovha yaaphedo, kuti atambuje majinja ese.
Iyena anozokuitira zvowakaitirayavo vamweni.
Matajire owakaitira vamweni, unozotajwavo ngo maitiro akadaro.
16 Majinja ese anozoenderera mberi ecimwa,Ngo mamwiro omakaita imwimwi pa dundhu rangu rakacena.
Ivona vanozomwa no kuipeja yese,Ivona vanozoita inga vacizivi kumbovepo.
17 Pa dundhu ro Ziyoni, panozova no vandhu vakaponeswa,Irona rinozova rakacena,Mubarihwana wa Jakobe unozotora zviro zvawo.
18 Mubarihwana wa Jakobe unozoita inga muriro,Mubarihwana wa Josefa unozoita inga murazvu,Mubarihwana wa Izau, unozoita inga maushwa,Ivona vanojipisa no kujipeja,Apana anozopona pa mubarihwana wa Izau,Ngokuti Jehovha wakazvinanga.
19 Ivona vanozotora nyika yo Negebhi no nyika ino matundhu ya Izau,No Shefera, no nyika yo Vafiristi.
Vanozotora ndharaundha yo Vaefraimi no nyika yo Samariya,Bhenjamini anozotora Giriyadhi.
20 Ku vaya vakavhiswa mu ndau iyi yakangwaririka voenda kuuranda,Vaiziraeri vanozova veno vo nyika yo Khanani, mbhera Zarefati.
Vaya vakavhiswaya mu Jerusarema kwenda ku uranda, vaingaya Sefarati, vanozoita veno vo madhorobha o Negebhi.
21 Vandhu vanozoponeswa, vanozokhwira pa Dundhu ro ZiyoniKuti vatonge ndharaundha yo matundhu ya Izau.Umambo hunozova hwa Jehovha.”
Masoko o Pasi
^ Zvinoreva: “Mushandiri wa Jehovha.”
^ Kana: “shaki.”
^ Kana: “mabhandidhu.”
^ Kana: “unozopseruka.”
^ Gama ngo Gama: “vandhu vacikaziviki.”
