Ozeya 2:1-23
2 “Vhunjanyi hama jenyu kudari: ‘Imwimwi muri vandhu vangu!’*
No hambzaji jenyu kudari: ‘Iwewe mwanakaji waitihwa usizi!’*
2 Pumbhanyi mai wenyu; vapumbhenyi,Ngokuti ivona asipi mukaji wangu, inini andiripi mwamuna wavo.
Ivona ngavasiye uhure hwavoNo upombo wavo uri pakati po mazamu avo.
3 Vakatama kuita kudaro, ndinozovapfenyura ndovasiya vari mitu, vozosara inga njiku yovakabahwa,Vanozosara vakaita inga cipare,Ndozovasiya vakaita inga nyika icikani nvura,Ndozovauraya ngo nyota.
4 Andizoitiri usizi vana venyu,Ngokuti ndi vana vakabahwa ngo kuhura.
5 Ngokuti mai wavo vakaita uhure.
Wiya wakavabara, wakaita zviro zvinopseruja ecinanga kudari:‘Ndinozoenda kuna vaya vandinodisana navo,Vanondipa zvokuha zvangu, kumwa yangu,Nguvo yangu yakanaka, nguvo yangu yo mutengo mukuru, mafuta angu no doro rangu.’
6 Ngokuti ndinozofunga gwanja rake ngo rusosa wo muzwa;Ndinozomuvakira mupfimbiji wo mapuwe,Kuti akonehwe pokufamba ndipona.
7 Iyena anozotevera vaaidisana navo, asi aazovabati,Anozovapsanga asi aazovawani.
Anozonanga kudari: ‘Ndinozohwirira ku mwamuna wangu wokutanga,Ngokuti mugariro wandainga nawo kare wainga nane kupinda wa wari.’
8 Iyena aazivi kuzvivona kuti ndini ndaimupa zvokuha,* vhinyu imbza no mafuta,Ndini ndaimupa sirivha yakawandaPamwepo no goridhi, zvavakashandisa pakunamata Bhaari.
9 Ngo kudaro, ndinozohwirira ndozomutorera zvokuha* zvangu pa mukuvo wokukotoraNo vhinyu yangu imbza pa mukuvo wayo.Ndinozomutorera nguvo yangu yakanaka no nguvo yangu yo mutengo mukuru, zvandakamupa kuti atame kufamba mitu.
10 Wari ndinozophetura umitu hwake pamberi po vandhu vaaidisana navo,Apana mundhu anozomuponesa mu nyara jangu.
11 Ndinozopeja mudakaro wake wese,Mutambo jake, kugara ko mweji mupsa, masabudu no mukuvo jese jo mutambo jake.
12 Ndinozopeja muuvha jake no mufigu jake, jaainanga ngo pamusoro pajo eciti:
“Izvi ndizvona zvandakapagahwi ngo vadiwa vangu”;Ndinozoita kuti jive gwasha,Jozohiwa ngo zvinyama zvo musora.
13 Ndinozomutonga ngo pamusoro po njiku jiya jaaiitira mupiro zvithombe zva Bhaari,Paijisimija biriku no usanga ecienda ku vandhu vaaidisana naye,Ecindikanganwa, izvi ndizvona zvinonanga Jehovha.
14 Ngo kudaro, ndinozomukhohwesa,Ndozomuendesa kuzvipare,Inini ndinozobhuya naye mbhera azvitendere.
15 Kuvhira pa mukuvo wondhowo, ndinozomuhwirijira muuvha jake,Ndinozoita kuti Bani ra Akori rive musuvo wo vetero;Iyena anozondidavira kondhoyo inga zvaaita mu njiku jo ujaha hwake,Inga njiku yaakabuda mu nyika yo Ejipita.
16 Pa njiku yondhoyo, Jehovha anonanga kudari:‘Iwewe unozondidaninja kuti mwamuna Wangu, auzondidaninjizve kuti mambo* Wangu.’
17 Ndinozovhisa pa muromo pako mazina o zvithombe zva Bhaari,Mazina ondhoo aazoceukijwizve.
18 Pa njiku yondhoyo ndicaita citenderano no zvinyama zvo mushango* ndeciitira vandhu vangu,No shiri jo kumatenga, no zvinyama zvinogwezva pa nyika;Ndinozovhisa uta, banga no hondo mu nyika,Ndinozoita kuti vagare vacina cavanothya.
19 Ndinozokutora kuti uve wangu mbhera narini;Ndinozokutora kuti uve wangu ngo urungami no ururami,Ndinozokukhombijira rudo hucikacinji no usizi.
20 Ndinozokutora kuti uve wangu, ndozogondeka kwauri,Iwewe unozoziva Jehovha.
21 ‘Pa njiku yondhoyo ndinozokudavira,’ izvi ndizvona zvinonanga Jehovha,‘Ndinozodavira matenga, iwona anozodavira nyika.
22 Nyika inozodavira zvokuha,* vhinyu imbza no mafuta;Izvona zvinozodavira Jeziraeri.*
23 Ndinozosima vandhu vangu panyika inga mbeu,Ndinozoitira usizi* vandhu vaya vainga vacizivi kuitihwa usizi,Ndinozovhunja vandhu vaya vaciripi vandhu* vangu kudari: “Imwimwi muri vandhu vangu,”
Ivona vanozonanga kudari: “Imwimwi muri Mwari wedu.”’”
Masoko o Pasi
^ Kana: “mucece.”
^ Kana: “mucece yangu.”
^ Gama ngo Gama: “mune.”
^ Kana: “mugwasha.”
^ Kana: “mucece.”
^ Zvinoreva: “Mwari Anozosima.”
