Ozeya 5:1-15
-
Efraimi na Judha inotongwa (1-15)
5 “Izwanyi izvi, vapiri,Nasanyi kuteya njeve imwimwi vo nyumba yo Iziraeri,Izwanyi, imwimwi vo nyumba ya mambo,Ngokuti imwimwi munobatanijwavo pakutongwa uku;Ngokuti muri murau wo MizipaNo cimaricera cakateiwa* mu Tabhori.
2 Vapanduki vari kubatikana maningi pa kuuraya vandhu,Asi inini ndiri kuvangwaja vese.
3 Efraimi ndinomuziva,Iziraeri aizivi kuvigika pamberi pangu.
Ngokuti wari uno Efraimi ari kuita maningi uhure;Iziraeri iri kuzvisvipisa.
4 Zviito zvavo, zvinovaphingaija kuti vatame kuhwirira kuna Mwari wavo,Ngokuti ivona vanoda kuita zvo uhure;Avarangaririzve ngo pamusoro pa Jehovha.
5 Kuzvikuja ko Iziraeri kunopa ucapupu ko zviito zvavo zvakashata;Iziraeri no Efraimi vakakhugunyika ngo kuposa kwavo,Judha wakakhugunyikavo pamwepo na ivona.
6 Vakaenda kopsaka Jehovha vano n’gombe javo no mavhuta avo,Asi avazivi kumuwana.
Ngokuti iyena wainga avasiya.
7 Vakacengeja Jehovha,Vobara vana vo nyikanja.
Asi wari, mukati mo mweji umwe, vanozourawa pamwepo no zviro zvavo.
8 Rijanyi mbayapaya mu Gibheyaa, rijanyi mbayapaya mu Rama!
Rijanyi mbhere yo hondo mu Bheti-avheni, Bhenjamini endererai mberi!
9 Iwewe Efraimi, vandhu vanozotaka hana pa njiku yaunozopangihwa.
Ndazivisa zvinozoitika ku vhumbo ro Iziraeri. Izvona zvinozoitikadi kamare.
10 Vatongi vo Judha vakaita inga vandhu vaya vanogara vecicinja mugano.
Inini ndinozovadururira kucamwa kwangu inga kumwa.
11 Efraimi ari kubzinyirihwa ecihwajihwa ngo kutongwa kwaakaitwa,Ngokuti iyena wainga akasunga kuita citenderano no muvengi wake.
12 Ngo kudaro, ndakaita inga cifundho cinofundha kuna EfraimiNdoita inga ciro cinovoja zviro mu nyumba ya Judha.
13 Efraimi paakavona ndhendha yake, Judha wovona civonje cake,Efraimi wakaenda ku Asiriya, wotuma vandhu kuti vaende kuna mambo mukuru.
Asi iyena aacaikwanisepi kumurapa,Aacaikwanisepizve kuvomesa civonje cenyu.
14 Inini ndinozova inga cimbhondoro kuna Efraimi,Ndozova inga mbhondoro ino simba ku nyumba ya Judha,
Ndinozovaruma, ndopinda;Ndinozovatora, apana anozokwanisa kuvaponesa.
15 Ndinozopinda ku ndau yangu, mbhera ivona vatambujike ngo ndava yo zviito zvavo,Ngo kudaro, ivona vanozopsaka unyasha hwangu.
Ivona vanozondipsanga pavanonga vecitambujika.”
Masoko o Pasi
^ Kana: “mambure akateiwa.”
