Ruka 13:1-35
-
Kukhauya kana kuparajwa (1-5)
-
Muezaniso wo mukuyu ucikabari (6-9)
-
Mwanakaji wainga cigono anoraphwa ngo Musabudu (10-17)
-
Muezaniso wo mucece wo mostardha no mbijo (18-21)
-
Zvinoda kushanda ngo simba kuti unghwine ngo pamusuvo mudoko (22-30)
-
Herodhi, “muhwe uwu” (31-33)
-
Jesu anocumba ngo Jerusarema (34, 35)
13 Panguva yondhoyo, vandhu vamweni vainga pondhopo, vakamuvhunja ngo pamusoro po Vagarireya vainga no ngazi yakavhenganijwa no mupiro yavo ndi Pirato.
2 Iyena wakavavhunja kuti: “Munorangarira kuti Vagarireya ava vainga vashaishi maningi kupinda Vagarireya vamweni, ngo kusongana no matambujiko aya here?
3 Andizvopi. Ndinomuvhunja kuti mukatama kukhauya, imwimwi mwese, munozoparajwavo ngo njira yondhoyo.
4 Kana kuti: Gumi na vasere vakawihwaya ngo mupfimbiji wo Sirowe wovauraya, munorangarira kuti ivona vainga vano ndava huru kupinda vandhu vanogara ku Jerusarema?
5 Andizvopi. Ndinomuvhunja kuti mukatama kukhauya, imwimwi mwese, munozoparajwavo ngo njira yondhoyo.”
6 Perepo wakavavhunja muezaniso uwu: “Mwanarume umweni wainga akasima mukuyu mu munda wake, paakaenda kopsaka makuyu, aazivi kuwana nee rimwe.
7 Tevere wakavhunja mushandiri wake kuti, ‘wari oita makore matatu ndeciviya kuzopsaka makuyu mu mukuyu uwu, asi andizivi kumbowana nee rimwe. Utemei! Ngokuti uri kupamba ndau mahara.’
8 Iyena wakamudavira kuti: ‘Patarau, uregerenyi uite gore rimwe basi mbhera ndice rindi mumbhiripiri mawo kuti ndiudire ndimo.
9 Kudari ukazobara, zvanaka; asi ukatama kubara, utemenyi henyu.’”
10 Iyena wainga ecijijisa musinagoga imweni ngo Musabudu.
11 Mondhomo mainga no mwanakaji wainga no mujimu wakashata waimuhwajisa ko makore gumi na masere; iyena waifamba akakotama. Aacaikwanisepi kuima.
12 Jesu paakamuvona, wakaenda kwaari woti: “Mwanakaji ndhendha yako yapera.”
13 Iyena wakamucanjikira nyara, pa mukuvo wondhowo iyena wakaima wotanga kukuja Mwari.
14 Ngo kuvona zvaitika, mutungamiriri wo sinagoga wakacamwa, ngo kuti Jesu wakarapa ngo Musabudu, wovhunja mbungano kuti: “Kuno njiku ndhandhatu jatinotendehwa kushanda, viyanyi kuzoraphwa ngo njiku jondhojo. Mucaviya kuzoraphwa ngo Musabudu.”
15 Ngo kudaro, Mambo wakamudavira kuti: “Imwi vacengejeri, imwimwi amusujunuri n’gombe yenyu kana mbongoyo kuvha mu phandu kwenda koimwisa kumwa ngo Musabudu?
16 Mwanakaji uwu, mwana wa Abhirahama, wainga akasungwa ndi Sathana mukati mo gumi na masere o makore, aacaisisirepi kusununguhwa mu njiku yo Sabudu?”
17 Paainga ecinanga zviro izvi, vazondi vake vese vakapseruka, asi mbungano yese yaidakara ngo zviro zvese zvinoshamaisa zvaaiita.
18 Ngo kudaro, iyena wakaenderera mberi eciti: “Umambo hwa Mwari hwakaezana nenyi, ndingahuezanisa nenyi?
19 Hwakaezana no mucece wo* mostardha wakatohwa ngo mundhu umweni wousima mu munda wake, iwona wakareba wova miti mukuru, shiri jo kudenga jakavaka masaki mu matavi awo.”
20 Jesu wakanangazve kuti: “Umambo hwa Mwari ndingahuezanisa nenyi?
21 Hwakaezana no mbijo inotohwa ngo mwanakaji woivhenganija mu mbende ndhatu jakakura jo upfu, mbhera upfu hwese hwokukumuka.”
22 Iyena wakafamba dhorobha ngo dhorobha, mutundhu ngo mutundhu, ecijijisa no kuenderera mberi no hwendo hwake hwo kuenda Jerusarema.
23 Mwanarume umweni wakamuvhunjisa kuti: “Mambo, vanozoponeswa vashoma kani?” Iyena wakati kwavari:
24 “Vangisiranyi kuti munghwine ngo musuvo mudoko, ngokuti ndinomuvhunja kuti, vazinji vanozopsaka kunghwina asi avazozvikwanisi.
25 Mune wo nyumba paanomuka wofunga musuvo, imwimwi munozoima ngo kunja mecigogoja, meciti: ‘Mambo, tifunungurirenyivo.’ Asi iyena anozomudavira kuti: ‘Andikuzivi kwamunovha.’
26 Perapo imwimwi munozotanga kunanga kuti: ‘Taiha tese, taimwa tese, imwimwi maijijisa mu makwanja edu.’
27 Iyena anozomuvhunja kuti: ‘Andikuzivi kwamunovha. Ivhanyi pano, imwimwi vaiti vo zvakashata!’
28 Pondhopo munozocema* no kugeda-geda meno, pamunozovona Abhirahama, Izaki, Jakobe no vaporofeti vari mu Umambo hwa Mwari, asi imwimwi makhandihwa kunja.
29 Kusiyapo izvo, vandhu vanozovha kumavirira, kumavhazuva, kanjikazi no kakusi, vozogara pa meza mu Umambo hwa Mwari.
30 Vonanyi: Variyo vokupejisira vanozova vokutanga, variyo vokutanga vanozova vokupejisira.”
31 Pa mukuvo wondhowo, Vafarisi vamweni vakaviya kwaari vomuvhunja kuti: “Budai pano upinde, ngokuti Herodhi ari kuda kukuuraya.”
32 Iyena wakati kwavari: “Endanyi kovhunja muhwe uwu kuti: ‘Inini ndiri kugogomera madhimoni no kurapa vandhu nyamasi na mangwana, pa njiku yocitatu ndinozopeja.’
33 Ngo kudaro, ndinodikana kuenderera mberi nyamasi, mangwana na mungwanuno, ngokuti azvitendehwi kuti muporofeti afire kunja ko Jerusarema.
34 Jerusarema, Jerusarema, unouraya vaporofeti, no kufura ngo mapuwe vaunotumihwa. Kangana ndecieja kuunganija vana vako pamwepo, inga zvinoitaya huku painohwamira zvitiyo zvayo? Asi wakaramba.
35 Vonanyi! Nyumba yenyu yaramwijwa.* Ndinomuvhunja kuti amuzondivonizve mbhera munange kuti: ‘Komboreranyi wiya anoviya ngo zina ra Jehovha!’”*
Masoko o Pasi
^ Kana: “no mbhumbha yo.”
^ Kana: “munozorira.”
^ Kangaije: “vanozoisiihwa iri mathere.”
^ Vonanyi Kudurujihwa ko Magama.
