Ruka 20:1-47
20 Njiku imweni, Jesu waijijisa vandhu mu themberi no kutokotesa masoko akanaka, vapiri vakuru no vatari pamwepo no madhodha vakaviya
2 vomuvhunjisa kuti: “Tivhunjei, simba raunoitaro ndirona zviro izvi, rakavha kwapi? Wakaripuwa ndiyani?”
3 Jesu wakavadavira kuti: “Ndiri kuda kumuvhunjisavo ciro cimwe, mundidavire:
4 Rubhabhatijo hwa Johani hwakavha kudenga kana ku vandhu?”
5 Asi ivona vakatanga kurangarira ngocavo veciti: “Kudari tikananga kuti: ‘Hwakavha kudenga,’ iyena anozotivhunjisa kuti: ‘Waro, ngenyi amuzivi kumutenda?’
6 Asi kudari tikananga kuti: ‘Hwakavha ku vandhu,’ vandhu vanozotifura ngo mapuwe ngokuti vanotenda kuti Johani wainga muporofeti.”
7 Ngo kudaro, ivona vakadavira kuti, avakuzivi kohwakavha.
8 Jesu wakavapingura kudari: “Andimuvhunjivo kwakavha simba randinoita ndirona zviro izvi.”
9 Perapo wakatanga kuvaitira muezaniso wokuti: “Mwanarume umweni, wainga mune wo munda wo muuvha, wakausiira varimi, woita hwendo pamukuvo wakareba.
10 Pa nguva kwayo, wakatuma muranda umwe kuti ivona vamupe mucero yo mu munda wo muuvha. Asi varimi vakamutaka, vomupindisa acina ciro.
11 Iyena wakatumazve muranda umweni. Asi ivona vakamutakazve no kumushora, vomupindisa acina ciro.
12 Wakatumirazve wocitatu; varimi vaya vakamukhuvaza, perepo vomugogomera.
13 Kuperapo mune wo munda wakati: ‘Ndoitenyi wari? Ndinozotuma mwana wangu, wandinoda. Dangani vanozomureremeja.’
14 Varimi pavakamuvona, vakarangarira ngo cavo, veciti: ‘Nga uwu anozogara utaka. Ngatimuuraye kuti utakehwo huite hwedu.’
15 Ngo kudaro, ivona vakamukhandira kunja ko munda wo muuvha, vomuuraya. Mune wo munda wo muuvha anozovaitenyi vandhu ava?
16 Iyena anozoviya wovauraya, wosiira vamweni munda wo muuvha.”
Pavakazvizwa, ivona vakati: “Izvi azvivhiri kuitika!”
17 Asi Jesu wakavasotesesa, wovavhunja kuti: “Zvakatahwari kuti: ‘Buwe rakarambwa ngo vavaki, rakazova buwe guru ro pacikina,’ zvinoda kunangenyi?
18 Ari wese anowira pa buwe iri, anozokhuvazika maningi. Wiya anowihwavo ndirona, anozocangajika.”
19 Vafarisi no vapiri vakuru vakapsaka kumubata pa nguva yondhoyo, ngokuti vakazwisisa kuti muezaniso wiya wainangwa ngo pamusoro pavo. Asi vaithya vandhu.
20 Pavakapera kumusotesesa, vakatuma vandhu vavainga vapsaka ngocifise-fise kuti vaende koojiita inga vakarurama kuti vamubate ngo magama ake. Ngo kudaro, vaizomuendesa ku utongi no umambo.
21 Ivona vakamuvhunjisa kuti: “Mujijisi, tinoziva kuti imwimwi munobhuya no kujijisa izvona, amukheti mundhu, asi munojijisa cokwadi ngo pamusoro pa Mwari:
22 Tinotendehwa kushabira Sezari kana kuti atitendehwi?”
23 Asi iyena wakabata mazano avainga nawo, wovavhunja kuti:
24 “Nditatijenyi dhenariyo* rimwe. Pikica iyi no zvakatahwari apa ngozvaani?” Ivona vakati: “Ngo zva Sezari.”
25 Jesu wakavavhunja kuti: “Ngo kudaro, ipanyi Sezari zviro zva Sezari, ipanyivo Mwari, zviro zva Mwari.”
26 Ivona vakakonehwa kumubata ngo magama ake pamberi po vandhu, asi vakanyararisa vecikahamara ngo mupinguro jake.
27 Asi, Vasadhusi vamweni, vanonangaya kuti akuna kumuka ko vakafa, vakaviya, vomuvhunjisa kudari:
28 “Mujijisi, Mosi wakatitarira kuti: ‘Kudari mundhu akafa, wosiya mukaji acina mwana, munukuna wake anodikana kugara utaka, womusijira mubarihwana wa nyakufa.’
29 Asi, kwainga no hama nomwe. Nevanji vavo vakarovora mukaji, vofa vacina mwana.
30 Ngo kudaro, wocipiri
31 no wocitatu, wakamugara utaka. Izvi ndizvona zvakaitikavo na vanomwe vese, ivona vakafa vacizivi kubara vana.
32 Pakupejisira, mwanakaji wiya wakafavo.
33 Waro, pakumuswa ko vakafa, mwanakaji uwu anozova mukaji waani? Ngokuti vese vakava majimwamuna ake.”
34 Jesu wakavadavira kuti: “Vana vo nyika* ino vanorovora no kurovohwa,
35 asi vayani vanovoniwa kuti vanofanera kuwana nyika inoviyari no vanozomuswa ku vakafa, avazorovori nee kurovohwa.
36 Zvokadi, ivona avazofizve, ngokuti vanozoezana no ngirozi. Vanozova vana va Mwari ngokuti vakamuswa ku vakafa.
37 Asi vakafa vanozomuswa, pikija Mosi, wakazvinanga paainga ecitara ngo zvakaitika pa pfiba ro muzwa, paakananga kuti Jehovha,* ndi ‘Mwari wa Abhirahama, Mwari wa Izaki na Mwari wa Jakobe.’
38 Iyena asipi Mwari wo vakafa, asi ndi Mwari wo vanopona, ngokuti kwaari,* vese vanorarama.”
39 Vatari vamweni vakati kwaari: “Mujijisi, mavereketa ushoni.”
40 Kuvhira pondhopo, vaingazve vacina cicunge co kumuitira muvhunjo, nee umwe hawo.
41 Jesu wakavavhunjisa kuti: “Ngenyi ivona vanonanga kuti Kristu ndiyena mwana wa Dhavhidhi?
42 Ngokuti Dhavhidhi wakananga mu bhuku ra nduyo kuti: ‘Jehovha* wakavhunja Mambo wangu kuti: “Garai pa mukono muho wangu
43 mbhera ndiite kuti vavengi vako vave ciciko co soka jako.”’
44 Asi kudari Dhavhidhi ecimudanija Mambo, waro zvingaitisa kudini kuti aite mwana wake?”
45 Vandhu vese pavainga vecimupurutana, Jesu wakavhunja vajiji vake kuti:
46 “Bhasopanyi no vatari, vanofamba vakasimira nguvo jakareba, vecida kucungamijwa mu mabazari. Ivona vanoda zvigaro zvo kumbeji* mu masinagoga no ndau jino nduma mu mabuso.
47 Ivona vanotorera noni zviro, vecivanyepejera ngo kuita mukumbiro jakareba. Ava vanozotongwa zvakakura maningi.”
Masoko o Pasi
^ Zingwenjere ro Ciroma rairema mutengo wo 3,85g.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “mu mavonero ake.”
^ Vonanyi Kudurujihwa ko Magama.
^ Kana: “zvakanakisisa.”
