Ruka 22:1-71
-
Vapiri vanoda kuuraya Jesu (1-6)
-
Kunasirihwa ko Phasika yokupejisira (7-13)
-
Ndhungamiriro yo Cirariro ca Mambo (14-20)
-
‘Wiya anozonditengesa ari pamwepo na inini pa meza’ (21-23)
-
Kupopana ngo pamusoro ukuru (24-27)
-
Citenderano co umambo ca Jesu (28-30)
-
Jesu anonanga kuti Pedhru anozomuramba (31-34)
-
Kunasirira kunosisira; mapanga maviri (35-38)
-
Mukumbiro wa Jesu pa Dundhu ro Maorivhe (39-46)
-
Jesu anosungwa (47-53)
-
Pedhru anoramba Jesu (54-62)
-
Jesu anosekwa (63-65)
-
Kutongwa pamberi po Sinedhriyo (66-71)
22 Wainga wecikhwedera Mutambo wo Pau Jicina Mbijo, unodanijwa kuti Phasika.
2 Vapiri vakuru no vatari vaipsaka njira yaushoni yo kumuuraya ndiyona, ngokuti vaithya vandhu.
3 Sathana wakanghwina mu murangariro wa Judha, anodanijwa kuti Iskariyote, wainga umwe wo Gumi na Vaviri.
4 Iyena wakaenda kobhuya no vapiri vakuru no vakuru-vakuru vo themberi ngo pamusoro po njira yaaida kumutengesa ndiyona kwavari.
5 Ivona vakadakara maningi ndizvona, vozwirana kumupa mare yo sirivha.
6 Ngo kudaro, iyena wakatendera, wotanga kupsaka mukana wo kumutengesa pacina vandhu vakawanda.
7 Yakaguma njiku yokutanga yo Pau Jicina Mbijo, njiku yaidikana kuurawa cinyama co Phasika.
8 Ngo kudaro, Jesu wakatuma Pedhru na Johani, wovavhunja kuti: “Endanyi kotinasirira Phasika kuti tizohe.”
9 Ivona vakamuvhunjisa kuti: “Munoda kuti tiyende koinasirira kwapi?”
10 Jesu wakavadavira kudari: “Izwanyi! Pamunonghwina mu dhorobha, munozosongana no mwanarume wakathwara juvi ro kumwa. Muteverenyi mbhera mu nyumba yaanonghwina.
11 Vhunjanyi mune wo nyumbeyo kuti: ‘Mujijisi wavhunjisa kuti: “Ngomapi mumba mo varendo mondingahira Phasika no vajiji vangu?”’
12 Iyena anozomutatija berere guru ro padenga, rino zvese zvo kushandisa. Munozotinasiririra mondhomo.”
13 Ngo kudaro, vajiji vakaenda, vokhanda zvese inga zvavakavhunjwa, perapo vakanasirira Phasika.
14 Nguva payakakwana, Jesu wakagara pa meza no vapostori.
15 Iyena wakavavhunja kuti: “Ndaida maningi kuha na imwimwi Phasika iyi ndicito ndatambujika;
16 ngokuti ndinomuvhunja kuti andizoihizve mbhera zviro zvese zvikwanirisike mu Umambo hwa Mwari.”
17 Jesu wakaashira kopo, woita mukumbiro perapo wonanga kuti: “Toranyi kopo iyi, mupekejane ngocenyu,
18 ngokuti ndinomuvhunja kuti andizomwizve vhinyu mbhera Umambo hwa Mwari hugume.”
19 Iyena wakatorazve pau, woita mukumbiro, perapo woigura-gura, wopa vajiji vake, eciti: “Pau iyi inoimirira muviri wangu, unozoitwa mupiro ngo ndava yenyu. Endereranyi mberi meciita izvi mucindiceukijira.”
20 Wakaitazve zvondhozvo no kopo pasure po kurarira, wonanga kuti: “Kopo iyi inoimirira citenderano cipsa cinozoshanda ngo ngazi yangu, inozopopomejwa kuti imubesere.
21 “Asi zivanyi kuti nyara ya wiya anozonditengesa iri pamwepo na inini pa meza.
22 Ngo kudaro, Mwana wo mundhu anozofa mukuzwirana no zvakatahwa ngo pamusoro pake, asi i nyathwa kuna wiya anozomutengesa!”
23 Ivona vakatanga kuvhunjisana ngocavo kuti ndiyani kamare angazoita zviro zvakadaro.
24 Vajiji vakatangazve kuvereketesana kwakakura pakati pavo, ngo ndava yokuti ndiyani wainga mukuru.
25 Jesu wakavavhunja kuti: “Majimambo o nyika anobzinyirira vandhu vawo, vakuru vavo vanodanijwa kuti i Vandhu Vakanaka.
26 Imwimwi, amudikani kuita kudaro. Asi, mukuru pakati penyu ngaaite inga mudoko, anotungamirira ngaaitevo inga mushandiri.
27 Mukuru ngo wapi, wiya ari pa meza kana wiya arikuperekera? Asipi wiya anogara pa meza? Asi inini ndiri pakati penyu inga muperekeri.
28 “Imwimwi ndimwi magara na inini pa muejo jangu;
29 ndinoita citenderano co umambo na imwimwi, inga Baba wangu vakaitavo citenderano na inini,
30 kuti muhe no kumwa pa meza yangu mu Umambo hwangu, mozogara pa zvigaro zvo umambo kuti mutonge mavhumbo gumi na maviri o Vaiziraeri.
31 “Simoni, Simoni, izwai! Sathana anoda kuti mupepethwe inga tirigu.
32 Ndakuitira mukumbiro wokudeketera kuna Mwari, kuti kutenda kwako kucazoremba. Rutendo hwako hukandovangazve, vangisai hama jako.”
33 Iyena wakamudavira kuti: “Mambo, ndakanasirira kuti ndiyende mukadheya kana kufa na imwimwi.”
34 Jesu wakati: “Pedhru, ndinokuvhunja kuti, jongwe arizoriri nyamasi ucito wandiramba katatu kuti unondiziva.”
35 Iyena wakavavhunjazve kuti: “Pandakamutuma mucina cimukhwama co mare, cinyede co zvokuha no magwada, makakarairihwa ngo ciri cese?” Ivona vakamudavira kuti: “Atizivi!”
36 Jesu wakavavhunjazve kuti: “Asi wari ndiyani anocikhwama co mare ngaacitore, anocinyede co zvokuha, ngaacitorevo. Wiya acina banga, ngaatengese nguvo yake, atenge banga rimwe.
37 Ngokuti ndinomuvhunja kuti zvese zvakatahwa ngo pamusoro pangu, kuti: ‘Iyena wakaverengwa pamwepo no vashaishi,’ zvinodikana kukwanirisika kwandiri. Ndizvona, izvi zviri kukwanirisika kwandiri.”
38 Ivona vakati: “Mambo, tino mapanga maviri pano.” Iyena wakavavhunja kuti: “Anokwana.”
39 Paaibuda, inga zvaairoveja kuita, wakaenda ku Dundhu ro Maorivhe, vajiji vake vakamuteveravo.
40 Paakaguma ku dundhu kwiya, iyena wakavavhunja kuti: “Endereranyi mberi meciita mukumbiro, kuti mutame kuejwa.”
41 Iyena wakafunduruka kwavari mbhera ku mumango unoguma buwe rikakhandihwa. Iyena wakagwadama wotanga kuita mukumbiro,
42 eciti: “Baba, kudari mecida, fundurusanyi kopo iyi kondiri. Kaveta, zvicadoitika ngo kuda kwangu asi ngazviitike ngo kuda kwenyu.”
43 Perapo ngirozi yakavha kumatenga yakaviya kuzomuvangisa.
44 Asi iyena wakasuruvara maningi, woita maningi mukumbiro. Kumeso kwake kwakabuda ziya ro ngazi yecidondhera pasi.
45 Paakamuka pakupera kuita mukumbiro, iyena wakaenda ku vajiji vake, asi wakavakhanda vakavata ngokuti vainga vapera simba ngo kusuruvara.
46 Iyena wakavavhunja kuti: “Ngenyi muri kuvata? Mukanyi muenderere mberi mecikumbira, kuti mutame kuejwa.”
47 Jesu paainga acavereketa, kwakaguma vandhu vazinji vecitungamirihwa ngo mwanarume waidanijwa kuti, Judha, umwe wo Gumi na Vaviri. Iyena wakakhwederera Jesu kuti amubhejhari.
48 Jesu wakamuvhunjisa kuti: “Judha, uri kutengesa Mwana wo mundhu ngo kumubhejhari?”
49 Vandhu vaingepo pavakavona zvainga zvecida kuitika, vakati: “Mambo, tinodikana kuvatema ngo banga?”
50 Ngo kudaro umwe wavo, wakatema muranda wo mupiri mukuru, womuceka njeve yake yo mukono muho.
51 Asi Jesu wakamuvhunja kuti: “Zvakwana.” Iyena wakapsasa njeve yake womurapa.
52 Jesu wakavhunja vapiri vakuru, vakuru-vakuru vo themberi no madhodha ainga akaviya kuzomupsaka kuti: “Ngenyi maviya no mapanga no muponda inga ndiri mbavha?
53 Pandainga na imwimwi mu themberi njiku jese, amuzivi kumbondipsasa. Asi iyi ngaiyona nguva yenyu no simba ro cidima.”
54 Ngo kudaro, vakamusunga vopinda naye, vomuendesa kumuzi ko mupiri mukuru; asi Pedhru wainga ecitevera ngo ndhambo.
55 Pavakabwakija muriro pakati po ruvanje, vogara pasi vese pamwepo, Pedhru wakagaravo pakati pavo.
56 Asi muranda kaji umweni paakamuvona akagara pamuriro, wakamusotesesa woti: “Mwanarume uwu waingavo naye.”
57 Asi iyena wakaramba eciti: “Inini andimuzivi, mwanakajiwe.”
58 Pasure po mukuvo mushomani mundhu umweni wakamuvonavo womuvhunja kuti: “Iwewevo uri umwe wavo.” Asi Pedhru wakadavira kuti: “Mwanarumewe, inini andiripi umwe wavo.”
59 Pa kupera ko nguva imwe, mwanarume umweni wakatanga kuvangirira eciti: “Mwanarume uwu kamare waingadi naye, ngokuti iyena Mugarireya kamare!”
60 Asi Pedhru wakati: “Nandi, inini andimuzivi wauri kunangari.” Pa mukuvo wondhowo kamare paainga acavereketa, jongwe rakarira.
61 Mambo wakasika wosotesesa Pedhru. Pedhru wakaceuja zvaakavhunjwa ndi Mambo kuti: “Jongwe ricito rarira nyamasi, iwewe unozondiramba katatu.”
62 Iyena wakabuda kunja ecicema* ngo kuhwajihwa.
63 Vandhu vakasungaya Jesu vakatanga kumushora no kumutaka.
64 Pavakapeja kumufukija kumeso kwake, vaimuvhunja kuti: “Kudari uri muporofeti, tivhunjei ndiyani wakutaka.”
65 vaimuvhunjazve zviro zvakawanda maningi vecimutuka.
66 Kunja no kwaeja, gungano ro madhodha o vandhu no vapiri vakuru no vatari, vakaungana pamwepo, vomuendesa ku nyumba yavo yo Sinedhriyo, vomuvhunja kuti:
67 “Kudari uri Kristu, tivhunjei.” Asi iyena wakavavhunja kuti: “Pikija ndikamuvhunja, imwimwi amuzozvitendi.
68 Cimwenizve, ndikamuvhunjisa imwimwi amundidaviri.
69 Asi kuvhira wari, Mwana wo mundhu anozogara ku mukono muho unosimba wa Mwari.”
70 Ngo kudaro, vese vakamuvhunjisa kuti: “Waro iwewe uri Mwana wa Mwari?” Iyena wakavadavira kuti: “Imwimwi ndimwi muri kutozvinanga kuti inini ndiri Mwana wa Mwari.”
71 Ivona vakati: “Ticadirenyizve zvapupu zvimweni? Ngokuti itusu tapera kumuzwa ecivereketa ngo muromo wake.”
Masoko o Pasi
^ Kana: “ecirira.”
