Ruka 9:1-62
-
Jesu anopa ndhungamiriro ku Gumi na Vaviri kuti vaende kocumaira (1-6)
-
Herodhi anoneseka ndi Jesu (7-9)
-
Jesu anopa zvokuha zviuru zvishanu zvo vandhu (10-17)
-
Pedhru anoziva Kristu (18-20)
-
Kunangwa ko kufa kwa Jesu (21, 22)
-
Mujiji wo cokwadi (23-27)
-
Kupinduka kwa Jesu (28-36)
-
Mujaha ano Dhimoni anoraphwa (37-43a)
-
Kunangwazve ko kufa kwa Jesu (43b-45)
-
Vajiji vanovereketesana ngo pamusoro po kuva mukuru (46-48)
-
Acikahwisani na itusu, ana itusu (49, 50)
-
Vandhu vo Samariya vanoramba Jesu (51-56)
-
Tingateveresa kudini Jesu (57-62)
9 Perapo, Jesu wakadanija vapostori Gumi na Vaviri, wovapa simba ro kugogomera madhimoni no kukwanisa kurapa ndhendha.
2 Iyena wakavatuma kocumaera Umambo hwa Mwari no kurapa,
3 wovavhunja kuti: “Mucatora ciri cese pa kuda kuita hwendo; cakadari inga ndonga, cinyede co zvokuha, pau kana mare; amudikanizve kutora nguvo jimweni.*
4 Mukanghwina mu muzi uriwese, garanyi mondhomo mbhera ngo kupinda kwenyu.
5 Ku ndau iri yese kwamunotama kuashihwa ngo vandhu, pamunovha mu dhorobhemo, pumbhujanyi bukuta ro soka jenyu kuti zviite ngwajo kwavari.”
6 Ngo kudaro, vakafamba mu mutundhu ngo mutundhu, vecizivisa masoko akanaka no kurapa vandhu mu mativi ese.
7 Herodhi,* mutongi wo dhistritu,* wakazwa ngo pamusoro po zviro zvaiitika, iyena waithya maningi ngokuti vamweni vainanga kuti Johani wamuswa ko vakafa,
8 asi vamweni vanonanga kuti Eriya wavonekazve, vamwenizve vaiti ndi umwe wo vaporofeti vokare wamuka ko vakafa.
9 Herodhi wakati: “Johani ndakagura musoro wake. Waro, mundhu wandiri kuzwari ecinangwa ngo zvake, ndiyani?” Ngo kudaro, iyena waipsaka kumuvona.
10 Vapostori povakaviya, vakasumurira Jesu zvovainga vaita. Ngo kudaro, wakavatora vari vega, woenda navo ku dhorobha rinodanijwa Bhetsaidha.
11 Asi mbungano poyakazviziva, yakamutevera. Iyena wakavaashira ngo kunaka mwoyo, wotanga kubhuya navo ngo pamusoro po Umambo hwa Mwari no kurapa vaida kuraphwa.
12 Zuva rainga roovira. Vajiji Gumi na Vaviri vakaviya kwaari vomuvhunja kuti: “Pindisanyi mbungano iyi kuti iyende mu madhorobha no mu ndharaundha jiri phedo kopsaka pokuvata no zvokuha, ngokuti matiriwari indau icina vandhu.”
13 Iyena wakavadavira kuti: “Imwimwi vapekejenyi zvokuha.” Ivona vakati: “Itusu atina ciri cese. Tino pau shanu no hove mbiri basi; kharu dangani tingaenda hedu kotengera vandhu vese zvokuha.”
14 Pondhopo painga no vanarume vanokhwedera kuita zviuru zvishanu.* Asi Jesu wakati ku vajiji vake: “Vavhunjenyi kuti vagare pasi ngo zvikwata zvo makumashanu o vandhu.”
15 Ivona vakazviita, vese vogara pasi.
16 Iyena wakatora pau shanu no hove mbiri jiya, wosota kudenga perapo woita mukumbiro. Tevere wakagura-gura pau jiya wopekeja vajiji kuti vaperekerere mbungano.
17 Vese vakaha voguta, vounganija matimbu o pau akasara, vozaja zvitengu gumi na zviviri.
18 Pa mukuvo wakatevera, paaiita mukumbiro, vajiji vake vakamukhwederera, wovavhunjisa kuti: “Mbungano inonanga kuti ndini ani?”
19 Ivona vakamudavira kuti: “Johani Mubhabhatiji, asi vamweni vanoti ndimwi Eriya, vamwenizve vanonanga kuti muri umwe wo vaporofeti vokare wamuswa.”
20 Jesu wakavavhunjisa kuti: “Waro imwimwi, munoti ndini ani?” Pedhru wakadavira kuti: “Kristu wa Mwari.”
21 Tevere, iyena wakabhuya navo, ecivavhunja kuti vatame kuzvivhunja mundhu ari wese,
22 asi wakavavhunjazve kuti: “Mwana wo mundhu anodikana kutambujika maningi no kunyenywa ngo vakuru, vapiri vakuru no vatari. Iyena anozourawa, perapo womuswa pa njiku yocitatu.”
23 Iyena wakavhunjazve vese kuti: “Wiya anoda kunditevera, ngaajirambe athware mutanda wake wokutambujikira* njiku no njiku, aenderere mberi ecinditevera.
24 Wiya anoda kuponesa upenyu hwake anozohuruza, asi wiya anoruza upenyu hwake ngo ndava yangu, ndiyena anozohuponesa.
25 Zvinobesenyi ku mundhu kuwana zviro zvese zvo nyika, woruza kana kukhuvaza upenyu hwake?
26 Wiya anopseruka ndini no masoko angu, Mwana wo mundhu anozopserukavo ngo mundhu endhowo paanozoviya mu simba rake no ra* Baba wake no mu simba ro* ngirozi jake jakasanwa.
27 Asi ndinomuvhunja zvokadi kuti, vamweni venyu makaimari pano, avazofi vacito vavona Umambo hwa Mwari.”
28 Ngo kudaro, pasure po njiku sere naapera kunanga masoko aya, wakatora Pedhru, Johani na Jakobo, wokhwira navo pa dundhu kuti aende koita mukumbiro.
29 Paainga eciita mukumbiro, kumeso kwake kwakacinja, nguvo jake jakacena jecimonikira.
30 Ngo civhumbu, pakabuda vandhu vaviri vecibhuya naye; umwe wainga Mosi umweni wainga Eriya.
31 Ivona vakavoneka vari pakati po ruvheneko, votanga kubhuya ngo pamusoro po mapindire aizoita Jesu. Zviro zvondhozvo waizozvikwanirisa mu Jerusarema.
32 Pedhru no vaainga naye, vainga vakabatwa ngo hope, povakavhurumuka, vakavona ruvheneko hwa Jesu no vandhu vaviri vainga vakaima naye.
33 Vandhu ava povaiparajana na Jesu, Pedhru wakati kwaari: “Mujijisi, zvakanaka kuti itusu tigare pano. Ngo kudaro, ngativake matumba matatu, rimwe renyu, rimwe ra Mosi no ra Eriya.” Iyena aacaizvizivepi zvaainanga.
34 Paainga acavereketa zviro izvi, pakabuda gwiti, rotanga kuvafukija. Gwiti porakavafukija, ivona vakathya maningi.
35 Perapo izwi rakavha ngo pagwitipo reciti: “Nga uwu Mwana wangu wakasanwa. Mupurukirenyi.”
36 Izwi parainga recizika, Jesu wainga waaega. Ivona vakanyarara, avazivi kuvhunja mundhu ari wese zviro zvovakavona.
37 Pa njiku yakazotevera, pavakabzuka pa dundhu, mbungano huru yakaenda kosongana naye.
38 Pondhopo mwanarume umweni wakakhuwa pakati po mbungano eciti: “Mujijisi, ndinomukumbira kuti muviye kuzovona mwana wangu ngokuti ndiyena ega basi.
39 Mujimu unomubata, iyena anokhuwa ngo civhumbu womuitisa kuti ajukutike* wecimubudisa mafuro ngo mu mukanwa. Mujimuwo unomutambuja no kumusiya wakhuvazika.
40 Ndakakumbira vajiji venyu kuti vaugogomere, asi vakakonehwa.”
41 Jesu wakati: “Imwimwi mubarihwana ucina rutendo no wakashata, ndinozova na imwimwi mbhera rini? Ndinozocungirira muitiro wenyu mbhera rini? Muviisei kuno mwana wakowo.”
42 Paainga ecikhwedera, dhimoni rakamuburukutisa pasi, romuitisa kuti ajukutike* maningi. Jesu wakagogomera mujimu wakashata wiya, worapa mwana uwu, perapo womupa baba wake.
43 Vese vakakahamara ngo simba guru ra Mwari.
Vese pavaikahamara ngo zviro zvizinji zvaaiita, iyena wakavhunja vajiji vake kuti:
44 “Nasanyi kupurukira, motama kukanganwa masoko aya. Ngokuti Mwana wo mundhu anozotengeswa mu nyara jo vandhu.”
45 Asi ivona avacaizwisisa zvaaida kunanga. Zvokadi zviro izvi zvainga zvakafisika kwavari kuti vatame kuzvibata. Asi ivona vaithya kumuvhunjisa ngo pamusoro pazvo.
46 Tevere, kwakava no kupopana ngo kuda kuziva kuti ndiyani anozoita mukuru pakati pavo.
47 Jesu eciziva murangariro yo mumwoyo mavo, wakatora mwana mudoko, womuimisa pamutivi pake,
48 wovavhunja kudari: “Wiya anoashira mwana mudoko wakadari, ngo ndava yo zina rangu, anondiashiravo. Wiya anondiashira, anoashiravo Wiya wakandituma. Ngokuti wiya anojiita mudoko pakati penyu, ndiyena mukuru.”
49 Johani wakamuvhunja kuti: “Mujijisi, takavona mundhu ecigogomera madhimoni ngo zina renyu, asi itusu takaeja kumukamisa, ngokuti aaripi kumuteveravo pamwepo na itusu.”
50 Jesu wakamuvhunja kudari: “Mucamurambisa, ngokuti wiya acikahwisani na imwimwi, ngo wenyu.”
51 Payaikhwedera nguva yokuti Jesu aende kudenga, iyena wakacunga kwenda ku Jerusarema.
52 Ngo kudaro, iyena wakatuma vandhu pambeji pake. Ivona vakaenda ku mutundhu wo Vasamariya kuti vanasirire zviro kuti vamuashire.
53 Asi Vasamariya avazivi kumuashira, ngokuti waiyenda* Jerusarema.
54 Vajiji vake, Jakobo na Johani pavakazvivona, vakamuvhunja kuti: “Mambo munoda kuti tikumbire muriro wo kudenga kuti ubzuke, uvapeje?”
55 Iyena wakasika sure, wovapangira.
56 Ivona vakaenda ku mutundhu umweni.
57 Paainga ecifamba mugwanja, mundhu umweni wakamuvhunja kuti: “Ndinozomutevera kwese kwamunoenda.”
58 Asi, Jesu wakati kwaari: “Muhwe jino maguru, shiri jino masaki, Mwana wo mundhu aana ndau yake kamare yo kuvata.”
59 Wakavhunjazve mundhu umweni kudari: “Ivai muteveri wangu.” Mundhu wiya wamudavira kuti: “Mambo, nditenderenyi kuti nditange kuenda kooviga baba wangu.”
60 Jesu wakati kwaari: “Siyai vakafa vavigane ngocavo, asi iwewe endai kocumaira masoko o Umambo hwa Mwari.”
61 Umwenizve wakati: “Inini ndinozomutevera, Mambo, nditenderenyi kuti nditange koeneka ukama hwangu.”
62 Jesu wakamuvhunja kuti: “Akuna mundhu anobata sharuwa* wosota sure, angafanera kunghwina mu Umambo hwa Mwari.”
Masoko o Pasi
^ Kana: “kusimira nguvo mbiri.”
^ Uwu, ndi Herodhi Antipa.
^ Gama ngo Gama: “tetrarka.”
^ 5.000.
^ Vonanyi Kudurujihwa ko Magama.
^ Gama ngo gama: “mu nduma yake no ya.”
^ Gama ngo Gama: “mu nduma yo.”
^ Kana: “apfuje.”
^ Kana: “apfuje.”
^ Gama ngo Gama: “hope yake yaisota.”
^ Kana: “anobata baja ro n’gombe recirima.”
