Rute 1:1-22
1 Mu njiku jaitongwa ngo vatongi, mu nyikemo makava no njara. Mwanarume umweni wakavha Bheterehema mu nyika yo Judha, woenda kogara mu nyika* yo Mowabhi, iyena no mukaji wake no vana vake vaviri.
2 Mwanarume uwu zina rake rainga Erimereki,* zina ro mukaji wake rainga Naomi,* vana vake vaviri vaidanijwa Maroni* na Kiriyoni.* Ivona vainga Vaefrate vokuvha Bheterehema mu nyika yo Judha. Vakaenda kogara mu nyika yo Mowabhi.
3 Pa kufamba ko nguva Erimereki, mwamuna wa Naomi wakafa, womusiya no vana vaviri.
4 Pa kufamba ko nguva, vana vake vakazorovora vasikane vo Mowabhi, umwe wavo waidanijwa Oripa, umweni waidanijwa Rute. Ivona vakagareyo gumi ro makore.
5 Pa kufamba, ko nguva Maroni na Kiriyoni vakafavo. Naomi wakasara acina vana no mwamunake.
6 Izvi pazvakaitika, Naomi no nyamwana jake* vakabuda Mowabhi, ngokuti wakazwa kuti Jehovha wakaitira unyasha vandhu vake ngo kuvapa zvokuha.
7 Naomi wakavha kwaaigara no nyamwana jake*. Pavaifamba mu gwanja kuhwirira ku nyika yo Judha,
8 Naomi wakavhunja nyamwana jake* kuti: “Pindanyi, hwiriranyi kanyi ko majimai enyu. Jehovha ngaamutatijire rudo hucikacinji inga zvomakatatijiravo rudo hucikacinji ku vana vangu vakatamikaya no kondiri.
9 Jehovha ngaamupe musha* jakangwaririka.” Perapo wakavabhejhari, ivona vorira* ngo izwi guru.
10 Ivona vaindomuvhunja kudari: “Atidi, itusu tinoenda na imwimwi ku ukama hwenyu.”
11 Asi Naomi wakavavhunja kuti: “Hwiriranyi vana vangu. Ngenyi muri kuda kupinda na inini? Ndinobarazve wari vana kuti vave majimwamuna enyu?
12 Hwiriranyi, vana vangu. Hwiriranyi, ndaaharahwa zvokuti andicarovohwizve. Nee ndikarovohwa usiku huno ndobarazve vana,
13 munokwanisa kuvavetera mbhera vakure? Munokwanisa kugara mucakarovohwa ngo ndava yavo? Azviiti vana vangu, ndiri kumuzwira maningi pena, ngokuti Jehovha wandikhawisa.”
14 Vakarirazve* maningi, perapo Oripa wobhejhari nyezvara* wake, wopinda. Asi Rute wakaramba kusiya Naomi.
15 Ngo kudaro, Naomi wakati: “Vonai! Mbhwere yako yapinda ku ukama hwayo no ku zvimwari zvayo. Hwirirai nayo.”
16 Asi Rute wakati: “Mucandivangirija kumusiya kuti nditame kwenda na imwimwi. Ngokuti kwamunozoenda, ndinozoendavo, kwamunovata, ndinozovatavo. Ukama hwenyu, hunozova ukama hwangu, Mwari wenyu, anozova Mwari wangu.
17 Pamunozofira, ndinozofirepovo, pamunozocihwa, ndinozocihwepovo. Jehovha ngaanditambuje kudari ndikatendera kuti ciri cese cindiparajanise na imwimwi kuciripi rufu.”
18 Naomi paakavona kuti Rute waindovangirira kupinda naye, iyena wakaregera kumurambisa.
19 Vovaviri vakaenderera mberi no hwendo hwavo mbhera Bheterehema. Pavakagumeyo, vandhu vese vo mudhorobha vakakahamara ngo ndava yavo. Vanakaji vakati: “Asipi Naomi uwo?”
20 Iyena wakadavira kudari: “Mucandidaninjazve Naomi.* Ndidaninjenyi Mara,* ngokuti wo Masimba Ese, wakaita kuti ndihwajihwe mu upenyu.
21 Ndainga no zvese pandakapinda, asi Jehovha wakandisiya ndicina ciro. Mucandidaninjazve Naomi ngokuti Jehovha wakandimukira, wo Masimba Ese, wakandiviisira dambujiko.”
22 Uku ndikona kuviya kwakaita Naomi na Rute mukaji wo mwana wake kuvha Mowabhi. Ivona vakaguma Bheterehema pakutanga ko kukotohwa ko sevhadha.*
Masoko o Pasi
^ Kana: “ndharaundha.”
^ Zvinoreva: “Mwari Wangu Ndi Mambo.”
^ Zvinoreva: “Kudakara Kwangu.”
^ Kangaije gama ro Cihebheru rinoreva “kuremba; kuhwaja.”
^ Zvinoreva: “Wiya Anoposa; Wiya ari Kwenda ku Magumo.”
^ Kana: “vakajimwanake.”
^ Kana: “vakajimwanake.”
^ Kana: “vakajimwanake.”
^ Kana: “misha.”
^ Kana: “vocema.”
^ Kana: “vakacemazve.”
^ Kana: “nyesvara; nezvara.”
^ Zvinoreva: “Kudakara Kwangu.”
^ Zvinoreva: “Kuhwajihwa.”
^ Sevhadha imukhaindi umweni wo mbeu yakatojana no tirigu.
