Tito 1:1-16
1 Inini Pauro muranda wa Mwari no mupostori wa Jesu Kristu mukuzwirana no rutendo hwo vakakhetwa va Mwari, no zivo yakarungama yo cokwadi, inozwirana no kugondeka kuna Mwari,
2 iyona yakacijikira pa vetero yo upenyu hucikaperi hwakagondeswa kare ndi Mwari acikanyepi;
3 asi pa nguva kwayo, iyena wakaita kuti soko rake rizivikane ngo pamusoro po kucumaira kwandakapuwa mukuzwirana no mutemo wa Mwari Muponesi wedu;
4 ndinokutarira Tito, mwana wangu wokadi mukuzwirana no rutendo hwatinahwo:
Ivai no unyasha hucikaezaniswi no runyararo hwa Mwari Baba no hwa Kristu Jesu muponesi wedu.
5 Ndakakusiya ku Kreta kuti unasirire zviro zvakapeyama* no kugaja vakuru mu dhorobha ngo dhorobha, inga zvandakakujijisa:
6 mukuru wo ungano anodikana kuva acina caanopumbhwa, ano mukaji umwe, ano vana vanotenda, vacina mufambiro wakashata* no vacikapandukiri.
7 Ngokuti, muvonereri wakagajwa ndi Mwari, aadikani kupomehwa, aadikani kuva no hasha, aadikani kukasika kunyangajwa, aadikani kumwisa, aadikani kutakana, aadikani kuda kuwana ciro ngo njira yakashata.
8 Asi iyena anodikana kuashira varendo, anoda zvakanaka, ano murangariro wakanaka, wakarurama, wakagondeka, anojibata,
9 majijisire ake anodikana kubatisisa soko rinogondeka, kuti akwanise kuvangisa ngo jijiso inobesera* pomwepo no kupangira vanophikiza.
10 Ngokuti kuno vapandukiri vakawanda, vanobhuya zvicikabeseri,* vanocengeja, maningi-ningi vanobatisisa shwiro yo kusokwa.*
11 Zvinodikana kufunga* muromo javo, ngokuti vandhu ava vari kuramba veciphwanya mbhuri jese ngo kujijisa zviro zvavacikadikani kujijisa kuti vawane ciro ngo njira icikasisiri.
12 Umwe wo vaporofeti vavo wakati: “Vandhu vo Kreta vanonyepa nguva yese, zvikara, vanohisa, vano umbhwa.”*
13 Zvaakanangaro ngo zvokadi. Ngo ndava yazvo, rambai wecivapangira ngo simba kuti vave no rutendo hwakanaka,
14 avadikani kupurutana ngano jo Vajudha no mutemo jo vandhu vanosiya cokwadi.
15 Zviro zvese zvakacena ku vakacena; asi akuna cakacena ku vakasvipa* no vacina rutendo, ngokuti murangariro javo no hana javo jakasvipiswa.
16 Ivona vanonanga pambhene kuti vanoziva Mwari, asi vanomuramba ngo mabasa avo, ngokuti vanosembhusa,* avazwiri, nee avakwanisi kuita basa riri rese rakanaka.
Masoko o Pasi
^ Kana: “zvakabhenda.”
^ Kana: “vakapangihwa.”
^ Kana: “yakacena.”
^ Kana: “vanobhuya zvicina musoro.”
^ Kana: “kucekwa suna.”
^ Kana: “kuvhara.”
^ Kana: “nungo.”
^ Kana: “vacizivi kucena.”
^ Kana: “vanombhwembhwesa.”
