Tito 2:1-15
2 Asi iwewe rambai wecivereketa zvinozwirana no jijiso yakanaka.*
2 Vanarume vakura vanodikana kuva vanojibata, vakareremera, vakavanga mu rutendo, mu rudo no kucungirira.
3 Ngo maitiro onawo, vanakaji vakura vanodikana kuva vano mufambiro unoreremejwa, vacina cirevo,* vacikaiti varanda vo doro, asi vanojijisa zviro zvakanaka,
4 kuti vapangire vasikane kuti vade majimwamuna avo, no kuda vana vavo,
5 kuti vave no murangariro wakanaka, vakacena,* vanokorondha ushoni muzi wavo, vanoreremeja majimwamuna avo kuti soko ra Mwari ritame kushohwa.
6 Ngo kudaro, rambai wecingwaja majaha kuti ave no murangariro wakanaka,
7 iwewe ivai muezaniso wo mabasa ese akanaka. Jijisai zvakacena no kureremeja kwese,
8 wecishandisa magama anoreremeja acikashohwi, kuti vavengi vapseruke,* vatame kunanga zvakashata ngo pamusoro pedu.
9 Vashandi ngavareremeje majipatarau avo mu zvese, vecipsaka kuvadakajisa, vacikadaviri ngo njira yakashata,
10 vacikavabiri zviro zvavo, asi ngavagondeke kwavari, kuti pa zviro zvese, jijiso ya Mwari Muponesi wedu ikujwe.
11 Ngokuti unyasha hucikaezaniswi hwa Mwari hwakakhombijwa kuti vandhu vese vaponeswe.
12 Ihwona hunotiroveja kuti tirambe zvakashata no zvido zvo nyika,* kuti tirarame no murangariro wakanaka, urungami no kujipira kuna Mwari mu mugariro wo nyika ino,
13 teciimira zviro zvinodakajisa no kujivonesa ko rukujo hwa Mwari mukuru, na Jesu Kristu muponesi wedu.
14 Iyena kamare wakajipira kwatiri kuti atiponese ku zviro zvese zvinohwisana no mutemo, wocenesa vandhu vanovangisira pa mabasa akanaka kuti vaite vake kamare.
15 Unodikana kuramba wecibhuya zviro izvi wecivangisa no kupangira ngo simba rese. Ucatendera kudheerehwa ngo mundhu ari wese.
Masoko o Pasi
^ Kana: “inobesera.”
^ Kana: “vacikaiti magumbu; vacikaiti magumba.”
^ Kana: “vacikaiti zvouhure no vacikavhenganiji manamatiro.”
^ Kana: “vanyowejwe.”
^ Vonanyi Kudurujihwa ko Magama.
