Vaefeso 1:1-23
1 Inini Pauro mupostori wa Kristu Jesu ngo kuda ka Mwari, ndiri kutarira vatendi doni ku Efeso. Ivona, vajiji va Kristu Jesu vakagondeka:
2 Ivanyi no unyasha hucikaezaniswi no runyararo hwa Mwari Baba wedu pamwepo na Mambo Jesu Kristu.
3 Ngaasimbhwe Mwari na Baba wa Mambo wedu Jesu Kristu, ngokuti iyena wakatikomborera ngo makomborero ese o kumujimu kumatenga, takabatana na Kristu,
4 ngokuti iyena wakatisana kuti tive na iyena* nyika icito yasikwa, kuti tive vakacena, ticina uposi pamberi pake mu rudo.
5 Iyena wakatisana kare kuti tiite vana vake ngo ndava ya Jesu Kristu, mukuzwirana no kuda kwake no zvinomudakaja,
6 kuti isimbhwe nduma yake yo unyasha hucikaezaniswi, yaakatipa ngo kunaka kwese ngo ndava yo Mwana wake anodiwa.
7 Ngo pamusoro pake, takaponeswa ngo muripo ngo ndava yo ngazi yake, hina, kuregerera zvishaishi zvedu, mukuzwirana no kukura ko unyasha hwake hucikaezaniswi.
8 Iyena wakatipa unyasha hucikaezaniswi mu njira yakaperera pamwepo no kuzwisisa kwese no ungwaru
9 ngo kutizivisa cakafisika ca Mwari co zviro zvaanoda. Cakafisika ici cinomudakajisa. Ndiyena kamare wakarangarira mu mwoyo make
10 kuti agaje ndau yo kuvonerera zviro, panozokwana nguva yakagajwa yokuunganija zviro zvese zviri kudenga no zviri pasi pano muna Kristu. Hina, mwaari
11 wiya watakabatana naye no kugajwa utaka pamwepo na itusu, tosanwa mukuzwirana no cidisiso ca wiya anoita zviro zvese ngo kuda kwake,
12 kuti iyena asimbhwe no kupuwa goja ngo pamusoro pedu, zvecivoneka kuti ndisu takatanga kuva no vetero muna Kristu.
13 Asi imwimwivo makamuvetera pasure po kuzwa soko ro cokwadi, masoko akanaka ngo pamusoro po ruponeso hwenyu. Pasure po kutenda kwenyu, Mwari wakamudira cinamiro ecishandisa Jesu no mujimu mucena,
14 ciri cigondiso co utaka hwedu, no cidisiso co kuponesa vandhu va Mwari kamare ngo muripo, kuti asimbhwe no kutokotesa nduma yake.
15 Ngo ndava yazvo, kuvhira pandakazwa rutendo hwamunahwo ngo pamusoro pa Mambo Jesu no rudo hwamunokhombija ku vatendi doni vese,
16 andiregeri kubonga ngo ndava yenyu. Andimukanganwi mu mukumbiro jangu,
17 kuti Mwari wa Mambo wedu Jesu Kristu, Baba vo rukujo, ngavamupe mujimu wo ungwaru no wo kuvoneswa ngo pamusoro po zivo yake yakarungama.
18 Mwari anofunungura mwoyo yenyu kuti muvone no kuziva vetero yaanomupa, no zviro zvakanaka zvicikaezaniswi zvaakagondesa ku vatendi doni,
19 no makurire o simba rake kwatiri vatendi. Makurire aya anovoneka pa mashandisire aanoita simba rake,
20 raakavonesa paakamusa Kristu ku vakafa, womugajika ku mukono muho wake kumatenga,
21 pa nyezuru kamare po utongi hwese, umambo, masimba, vatongi no mazina ese anganangwa, kuciripi basi mu mugariro wo nyika* ino, asi no mugariro unozoviya wo nyika ino.
22 Iyena wakadirazve zvese pasi po soka jake, womuita kuti ave musoro wo zviro zvese mu ungano,
23 ungano iyi ndiyona muviri wake, iyona yakazara ngo zviro zvese ngo pamusoro pake, iyena anokwanisa zviro zvese.
