Vaefeso 2:1-22
2 Kunja kwa izvi, Mwari wakamuponesa, pikija mainga makafa ngo ndava yo kuposa no kushaisha kwenyu,
2 inga zvamaimboita mukuzwirana no mugariro wo nyika ino, mecitungamirihwa ngo mutongi wo mbhepo ano simba. Mbhepo iyi, mujimu uri kushanda mu vana vacikazwiri.
3 Hina, itusu tainga no mufambiro wakatojana no wavo mukuzwirana no zvido zvo muviri, teciita kuda ko muviri no murangariro, tainga takabarihwa kuti tiashire ushungu hwa Mwari, mukuezana no vamweni.
4 Asi Mwari ano usizi hwakakura, ngo ndava yo rudo hwake hukuru hwaakatiitira,
5 wakatipa upenyu pamwepo na Kristu, pikija patainga takafa ngo ndava yo kuposa kwedu, asi ngo unyasha hucikaezaniswi, imwimwi makaponeswa.
6 Kusiyapo izvi, Mwari wakatimusa pamwepo naye, wotigajika pamwepo na iyena ku matenga mu kubatana na Kristu Jesu,
7 kuti mu mugariro wo nyika* inozoviya, iyena akhombije upfumi hwo kukura ko unyasha hwake hucikaezaniswi mu kunaka mwoyo kwaanotiitira, mukuzwirana na Kristu Jesu.
8 Ngo ndava yo unyasha hucikaezaniswi uhu, imwimwi makaponeswa ngo pamusoro po rutendo, izvi azvizivi kuitika ngo kuda kwenyu; asi icipo ca Mwari.
9 Haiwa, azvizivi kuitika ngo mabasa amakaita, kuti patame kuwanika ano razawe yo kujikuja.
10 Itusu tiri mabasa o nyara ja Mwari, takasikwa mukuzwirana na Kristu Jesu kuti tiite mabasa akanaka, ainga akagajwa ndi Mwari kuti timaite.
11 Ngo kudaro, mucakanganwa kuti imwimwi makabahwa muri vandhu vo majinja, mecidanijwa kuti muri vandhu “vacizivi kusokwa” nga vaya vaidanijwa kuti “vakasokwa,” ivona vainga vakasokwa kunyama ngo nyara jo vandhu.
12 Pa mukuvo wondhowo, imwimwi mainga mucina Kristu, mainga makaparajana no umambo hwo Vaiziraeri. Amucaingepi vo zvitenderano zvo cigondiso co kukomborehwa ndi Mwari; mainga mucina vetero, mucina Mwari munyika.
13 Asi wari, mukuzwirana na Kristu Jesu, imwimwi maingari muri ndhambo, wari muri phedo ngo ngazi ya Kristu.
14 Ngo kudaro, iyena ndiyena runyararo, wiya wakaitisa kuti zvikwata zviviri zviite cikwata cimwe, wophwanya mupfimbiji waivaparajanisa ngo pakati.
15 Ngo kupira muviri wake, iyena wakavhisa mutemo no mupango jainga mu Mutemo wa Mosi, zvaibara kuzondana pakati po zvikwata zviviri. Perapo, wakabatanija zvikwata zviviri izvi, coita cimwe cipsa. Zvokadi zvikwata zvese zvo zviviri zvinodanijwa kuti, vajiji vake. Ngo kudaro, iyena wakaita runyararo pakati pavo,
16 kuti anase kuviiranisa vandhu vese kuna Mwari mu muviri umwe ecishandisa mutanda wo kutambujikira,* ngokuti iyena wakauraya kuzondana ecishandisa muviri wake.
17 Iyena wakaviya kocumaira masoko akanaka o runyararo kuna imwimwi mainga ndhambo, pamwepo no runyararo kuna vayani vainga vari phedo,
18 ngo ndava yake, itusu, vandhu vese, tinokhwedera kuna Baba takasujunuka ngo mujimu umwe.
19 Ngo kudaro, amuciripizve varendo no vonyikanja, asi imwimwi muri vo jinja rondhoro no vatendi doni pamwepo no vo pambhuri ya Mwari,
20 imwimwi makavakwa panyezuru po maambo o vapostori no vaporofeti, Kristu Jesu wova maambo o buwe ro pacikina.
21 Mukubatana na iyena, nyumba yese no mativi ayo ese akabatana, ari kukura kuti aite themberi yakacena ya Jehovha.*
22 Mukubatana na iyena, imwimwi muri kuvakwavo pamwepo kuti muve nyumba inogahwa ndi Mwari, aigare ngo njira yo kumujimu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
