Vaefeso 4:1-32
4 Ngo kudaro, inini musungwi ngo ndava ya Mambo, ndinomudeketerera kuti mufambe mukuzwirana ngo manera amakadanijwa,
2 no kujidodokesa kwese, no kupfava no kusengerera kwese, mecicijikirana ngocenyu mu rudo,
3 mecivangirira ngo mwoyo wese kuti mugare makabatana mu mujimu, ngo kuva muno runyararo ngocenyu.
4 Kuno muviri umwe no mujimu umwe, mukuzwirana no kudanijwa kwamakaithwa mu vetero imwe;
5 kuna Mambo umwe, rutendo humwe, rubhabhatijo humwe;
6 Mwari umwe, na Baba wo vandhu vese, ari pamusoro po vese, ngo pamusoro po vese, mu vese.
7 Umwe na umwe wedu, wakaashira unyasha hucikaezaniswi mukuzwirana no mutengo wo cipo caakaashira kuna Kristu.
8 Matahwa anonanga kuti: “Iyena paakakhwira kumatenga, wakatora varanda, wopa ungano zvipo zvo vanarume.”
9 Waro, anoda kunangenyi magama okuti “iyena wakakhwira”? Anoda kureva kuti, iyena wainga akabzuka* pasi pano.
10 Iyena wakabzukaro,* ndiyenazve wakakhwira panyezuru po matenga ese kuti akwanirise zviro zvese.
11 Iyena wakavapa ungano kuti vamweni vashande inga vapostori, vamweni inga vaporofeti, vamweni inga vavhangeri, vamweni inga vahavisi no vajijisi,
12 kuti arungamise* vatendi doni,* kuti vashandire vamweni no kuvaka muviri wa Kristu,
13 mbhera itusu tese tiwane rubatano hwo rutendo no zivo yakarungama yo Mwana wa Mwari, kuti tive vano mugariro jakakwana jo mundhu wakura* inga zvaari Kristu.
14 Ngo kudaro, atidikanizve kuva vana vadoko, teciendeswa kuri kwese inga tiri kuthwahwa ngo mavimbi, tecipepeswa ngo mukhaindi wese wo mbhepo yo jijiso, ngo mazano akashata o vandhu kuti vatipause ngo kucengejera.
15 Asi tecibhuya cokwadi, ngatikure mu zviro zvese ngo rudo mu kuzwirana na Kristu, musoro wo muviri.
16 Ngo pamusoro pake, muviri wese wakabatana pamwepo, weciita kuti ushandire pamwepo pecishandiswa zvihwa zvese zvinopa zvinodiwa. Cihwa cimwe na cimwe pacinoshanda ushoni, zvinobesera kukura ko muviri, paunonga wecijivaka mu rudo.
17 Ngo kudaro, ndinomuvhunja no kumungwaja muna Mambo, kuti mucafambazve inga zvavanoita vandhu vo majinja, mukuzwirana no murangariro javo jicikashandi.
18 Murangariro javo jiri mucidima, vova ndhambo no upenyu hwa Mwari, ngo ndava yo kutama kuziva kwavo no kuoma mwoyo kwavo.
19 Vecisiya mugariro jakanaka, vanojipira ku mufambiro unopseruja kuti vaite mushovo uri wese wo zviro zvakasvipa ngo kudisisa zviro zvakawanda.
20 Asi imwimwi makajija perapo moziva kuti Kristu aacaingepi akadaro,
21 motatija kuti imwimwi makazwa no kujijiswa mukuzwirana no cokwadi cakajijiswa ndi Jesu.
22 Makajijiswa kuti munodikana kusiya undhu hwokare, hunozwirana no maitiro enyu o kare, huri kuvojwa ngo zvido zvahwo zvinocengeja.
23 Endereranyi mberi meciita vapsa mu murangariro* yenyu,
24 Munodikana kusimira undhu hupsa hwakasikwa mukuzwirana no kuda ka Mwari mu ururami hwokadi no ugondeki.
25 Ngo kudaro, zvecivoneka kuti makasiya kunyepa, umwe na umwe wenyu ngaabhuye cokwadi ku mudoni wake, ngokuti tiri zvihwa zvakabatana pamwepo.
26 Nyangajwanyi, asi mucashaisha; mucatendera kuti zuva rivire makanyangajwa;
27 Mucapa ndau Dhiyabhu.
28 Wiya waiba, ngaaregere kuba; ngaabate basa ngo nyara jake, eciita zvakanaka, kuti awane ciricese co kupa mundhu ano utami.
29 Pa muromo penyu ngapatame kubuda gama rakaposeka, asi ngapabude gama rakanaka basi kuitira kuvaka mukuzwirana no zvinodiwa, kuti ripe zvinobesera vanorizwa.
30 Mucacamwisa mujimu mucena wa Mwari, wo makadihwa ndiwona cinamiro mbhera pa njiku yo kusujunuhwa ngo muripo.
31 Siyanyi mushovo wese wo bundu, ushungu, kunyangajwa, joweyowe no magama anotuka, pamwepo no zvakashata zvese.
32 Ivanyi makanaka mwoyo umwe kuno umweni, meciitirana pena, meciregererana ngo mwoyo wese inga zvaakamuregerera Mwari ngo mwoyo wese, ecishandisa Kristu.
Masoko o Pasi
^ Kana: “akaderuka.”
^ Kana: “wakaderukaro.”
^ Kana: “abatanije.”
^ Kana: “arungamise vacena.”
^ Kana: “waivha.”
^ Kana: “mu simba rinoshanda mu murangariro.” Gama ngo Gama: “mu mujimu wo murangariro.”
