Vaefeso 5:1-33
5 Ngo kudaro, ivanyi vatevejeri va Mwari, inga vana vanodiwa.
2 Endereranyi mberi mecifamba mu rudo, inga zvaakatida* Kristu, wojipira ngo ndava yedu* inga cipo no mupiro unonuhira no unodakajisa Mwari.
3 Uhure* no zviro zvese zvicizivi kucena pamwepo no kudisisa zviro zvakawanda, azvidikani kunangwa pakati penyu, ngokuti izvi azvisisiri pakati po vandhu va Mwari;
4 mufambiro unopseruja, kuvereketa zvoupenji, nee kuvereketa zvinopseruja, ngokuti zviro izvi azvisisiri. Pandau pazvo, munodikana kubonga Mwari.
5 Ngokuti imwimwi makazvivona monasa kuzwisisa kuti: Aazogari utaka mu Umambo hwa Kristu no hwa Mwari mundhu wese anohura,* acizivi kucena, anodisisa zvakawanda, ngokuti kudisisa zvakawanda kwakatojana no kunamata zvithombi.
6 Apana anodikana kumucengeja ngo masoko abiresi, ngokuti ngo pamusoro po zviro izvi, ushungu hwa Mwari hunowira pamusoro po vana vacikapurutani.
7 Ngo kudaro, mucabatana pamwepo no vandhu avo;
8 ngokuti kare imwimwi maiita inga cidima asi wari muri kuita inga ruvheneko mu kuzwirana na Mambo. Endereranyi mberi mecifamba muri vana vo ruvheneko,
9 ngokuti mucero wo ruvheneko unovoneka ngo mushovo wese wo zviro zvakanaka, zvakarurama no zvo cokwadi.
10 Endereranyi mberi meciva no cokwadi co kuziva zviro zvinodakajisa Mambo;
11 regeranyi kubatana mu mabasa acikabesi o cidima; asi mazivisenyi pambhene zvaari kamare.
12 Ngokuti zviro zvavanoita mucifise-fise zvinopseruja zvokuti azvitonangiki.
13 Asi zviro zvese zvinobudiswa pambhene, zvinokhombijwa ngo ruvheneko, ngokuti zvese zvinokhombijwa zvinozwi ruvheneko.
14 Ngokuti matahwa akati: “Nandi muvati, mukai, mukai ko vakafa, perepo Kristu anozokuvhenekera.”
15 Ngo kudaro, ngwariranyi kuti mutame kufamba inga mapenji, asi muve vakangwara,
16 mecinasa kushandisa nguva yenyu ngokuti mazuva ano ashata.
17 Waro regeranyi kuva mapenji, asi endereranyi mberi mecizwisisa zvinoda Jehovha.*
18 Cimwenizve, mucarejera ngo vhinyu, ngokuti kurejera kunoendesa ku mufambiro wakashata, asi endereranyi mberi mecizajwa ngo mujimu.
19 Vangisananyi ngocenyu meciimba nduyo, mecisimba Mwari, meciimba ndumbo jo kunamata. Imbiranyi Jehovha* ngo mwoyo wese inga muri kurija mumbo,
20 mecibonga Mwari na Baba wedu mukuvo wese ngo zviro zvese mu zina ra Mambo wedu Jesu Kristu.
21 Jidirenyi pasi po vamweni ngo pamusoro po kureremeja Kristu.
22 Vanakaji ngavajidire pasi po majimwamuna avo, inga zvavanoitira Mambo,
23 ngokuti mwamuna ndiyena musoro wo mukaji inga Kristu ari musoro wo ungano no muponesi wo muviri uwu.
24 Zvokadi, inga ungano iri pasi pa Kristu, vanakaji vanodikanavo kujidira pasi po majimwamuna avo mu zvese.
25 Majimwamuna, endereranyi mberi mecida vakaji venyu, inga Kristu wakadavo ungano wojipira kwairi,
26 kuti acenese ungano, eciicenesa ngo kumwa yo soko ra Mwari.
27 Iyena anoda kuti ungano ive yakaseja maningi pamberi pake, icina vara, icina cisununu* nee ciri cese cakaezana na izvi, asi yakacena icina vara.
28 Mukufananavo, majimwamuna anodikana kuda vakaji inga madire avanoita muviri wavo. Mwanarume anoda mukaji wake, anojida pacake,
29 ngokuti akuna mundhu anonyenya muviri wake* kamare, asi anouhisa no kuutaja, inga zvaanoita Kristu ku ungano,
30 ngokuti itusu tiri divi ro muviri wake.
31 “Ngo ndava yazvo, mwanarume anozosiya babake na make wozobatana no* mukaji wake, vovaviri vanozoita nyama imwe.”
32 Cakafisika ca Mwari ici cakakura. Wari ndiri kunanga ngo pamusoro pa Kristu no ungano.
33 Pikija zvakadaro, umwe na umwe wenyu ngaade mukaji wake inga madire aanojiita; ngo divi rimweni, mukaji ngaareremeje maningi mwamuna wake.
Masoko o Pasi
^ Kangaije: “zvaakamuda.”
^ Kangaije: “yenyu.”
^ Mu Cigiriki, por·nei′a. Vonanyi Kudurujihwa ko Magama.
^ Vonanyi Kudurujihwa ko Magama: “Uhure.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “icizivi kufonyana.”
^ Gama ngo Gama: “nyama yake.”
^ Kana: “wozoramba ecigara no.”
