Vafiripi 2:1-30
2 Kudari pano vangiso yo Cikristu, nyarajo yo rudo, ushamwari hwo Cikristu, kudisana no kuzwira pena,
2 engejeranyi mudakaro wangu ngo kuva muno mwoyo umwe no rudo umwewo, mova makabatana kamare, muno murangariro umwe.
3 Mucaita ciricese ngo kuphikizana kana ngo kujikuja, asi no kujidodokesa, vonanyi vamweni inga vakuru komuri,
4 mucikapsaki zvinomudakajisa basi, asi psakanyivo zvinodakajisa vamweni.
5 Ivanyi no murangariro waingavo na Kristu Jesu,
6 kunyange wainga no ciimo ca Mwari, aazivi kurangarira kutora cigaro ca Mwari, kana kuda kuezana na Mwari.
7 Asi, iyena wakasiya zvese zvaainga nazvo, woita inga muranda pomwe no kuva mundhu.
8 Kuciripi izvo basi, paakaviya inga mundhu, iyena wakajidodokesa, wozwira mbhera kufa, ndizvona, kufira pa mutanda wokutambujikira.*
9 Ngo ndava yazvo, Mwari wakamukuja kuti ave pa ndau yakakhwirira, womupa ngo kunaka mwoyo zina riri pa nyezuru po mazina ese.
10 Kuti vandhu vese vapfukame* pamberi po zina ra Jesu, vari kumatenga, vari panyika no vari pasi po mavhu,
11 no ndumi jese jizive pambhene kuti Jesu Kristu ndiyena Mambo, kuti Mwari Baba apuwe nduma.
12 Ngo kudaro hama jangu, inga zvamaizwira nguva jese, kuciripi basi pandinonga ndiripo, asi muri kuzwira maningi pandinonga ndicipo. Mu njira yakafanana, umwe na umwe wenyu ngaarambe ecishanda no kuthya pamwepo no kutetemera kuti awane ruponeso.
13 Ngokuti Mwari ndiyena anomuvangisa no kumupa cido no simba ro kuita, ngokuti anoda kuti muzviite.
14 Rambanyi meciita zviro zvese mucikan’gun’guti no kuvereketesana,
15 kuti muve no mwoyo yakacena, mucina cishaishi, vana va Mwari vacina ndava pakati po mubarihwana wakashata no wakavora. Imwimwi muri kumonikira pakati pawo inga zvivheneko mu nyika,
16 rambanyi makabatisisa soko ro upenyu. Mukadaro, ndinozowana zvinondiita kuti ndidakare mu njiku ya Kristu, ndeciziva kuti andizivi kugogoma mahara kana kushanda ngo simba mahara.
17 Ngo kudaro, kudari ndiri kuduruhwa inga cipo co vhinyu panyezuru po mupiro no basa rakacena ramakaita ngo ndava yo kutenda kwenyu, ndinodakara no kudakarisisa na imwimwi mwese.
18 Ngo maitiro akadaro, munodikanavo kudakara no kudakarisisa pamwepo na inini.
19 Ndiri kuda kutumira Timoti kwamuri mukuzwirana na Mambo Jesu ngo kukasika, kuti ndivangiswe paanozoviya no masoko ngo pamusoro penyu.
20 Ngokuti andina umweni ano murangariro wakaezana no wake, anozonasa kumukorondha.
21 Ngokuti vamweni vese, vari kupsaka zvavanoda, kuciripi zvinoda Kristu Jesu.
22 Asi imwimwi munozviziva kuti iyena aapsaki zvaanoda basi, ngokuti wakashanda na inini inga baba no mwana pa kuita kuti masoko akanaka aenderere mberi.
23 Ngo kudaro, ndiyena wandiri kuda kutumira kondhoyo ngo kukasika, ndikandovona zviri kuda kundiitikira.
24 Zvokadi, kudari kuri kuda ka Mambo, ndinothemba kuti ndinozoviyeyo ngo kukasika.
25 Asi wari ndinovona kuti zvinodikana kuti ndimutumire Epafrodhito, hama yangu, mushandi doni no musoca doni wangu, wamakanditumira kuti andibese pa zvinodiwa zvangu.
26 Iyena ari kuda maningi kumuvona mwese, ecisuruvara ngokuti imwimwi makazwa kuti iyena waihwaja.
27 Ndizvona, wakahwaja mbhera kuda kufa, asi Mwari wakamuitira unyasha, kuciripi iyena basi, asi wakandiitiravo unyasha, kuti nditame kuengejehwa kucumba kwangu ngo kucumba kumwenizve.
28 Ngo ndava yazvo, ndinomutumira ngo kukasika, kuti mudakarezve mukamuvona, ininivo nditame kuthimwa-thima maningi.
29 Ngo kudaro, muashirenyi ngo zina ra Mambo inga zvamunoitaya mazuva ese, no mudakaro wese, rambanyi mecireremeja vandhu vakaita inga ndiyena,
30 ngokuti iyena wainga ecida kufa ngo ndava yo basa ra Kristu, ecidira pangozi upenyu hwake kuti andishandire pa cinyau cenyu, ngokuti amuripi kuno kuti mundishandire.
