Vafiripi 3:1-21
3 Pakupejisira hama jangu, dakaranyi mu zina ra Mambo. Inini andiremehwi ngo kumutarirazve masoko ondhowo, ngokuti zvinomuponesa.
2 Bhasopanyi imbhwa; bhasopanyi vanoita zvinokhuvaza; bhasopanyi vanosokwa.*
3 Ngokuti ndisu vakasokwadi kamare, tiri kuita basa rakacena ngo mujimu wa Mwari. Itusu tinodada ngo ndava ya Kristu Jesu, ticikathembi zviro zvo kunyama,
4 pikija ndino mathangwe o kuthemba zviro zvo kunyama kupinda ariwese.
Kudari aripo anorangarira kuti ano mathangwe o kuthemba zviro zvokunyama, inini ndinomupinda:
5 Ndakasokwa njiku yocisere, ndiri wo jinja ra Iziraeri, wo vhumbo ra Bhenjamini, ndiri Muhebheru, mwana wo Vahebheru; ngo kuteveja mutemo, ndiri Mufarisi;
6 ngo pamusoro po kuvangisira kwangu, ndainga mutevereri wo ungano; ngo urungami wakacijikira pa mutemo, ndainga mundhu acina ndava.
7 Asi, zvondaivona inga upfumi, ndakazvivona zvicina shwiro ngo ndava ya Kristu.
8 Hina, ndinovona zviro zvese zvicina shwiro ndikazviezanisa no zivo inosisira ya Kristu Jesu Mambo wangu. Ndakaruza zviro zvese ngo ndava yake, ndecizvivona inga svina, kuti ndiwane Kristu
9 perepo ndiwanike ndakabatana naye, kuciripi ngo ndava yo ururami hwangu hwo kuzwira mutemo, asi ngo ndava yo ururami hunowanika ngo kutenda Kristu, ururami hunovha ka Mwari hwakacijikira pa rutendo.
10 Ndinoda kuziva iyena no simba ra wiya wakamumusa, ndotambujika no kufa inga ndiyena,
11 kuti ndivone dangani ndingawana rumuko hwo kutanga.
12 Andinangi kuti ndahuwana kare, dangani kuti ndakaperera, asi ndiri kuvangisira kuti kangaije ndingawana zvandakasanihwa ndi Kristu Jesu.
13 Hama, andijivoni inga ndahuwana; asi zvokadi ngo zvokuti: Ndinokanganwa zviro zvo sure, ndodadamira kuti ndiwane zviro zviri kumbeji,
14 ndecivangisira kuti ndiwane mupfupo wo kwenda mugore kondakadanijwa ndi Mwari ecishandisa Kristu Jesu.
15 Ngo kudaro, itusu tese takaivhari, ngative no murangariro uwu; kudari ngo maitiro ari ese muno murangariro wakasiyana, Mwari anozomuvonesa murangariro wakanaka.
16 Ngo maitiro ari ese, azvinenyi no makurire ataita, ngatirambe tecifamba mu gwanja rondhoro.
17 Hama, ivanyi vatevejeri vangu makabatana, mecisotesesa vaya vanofamba mu kuzwirana no muezaniso watakagaja kwamuri.
18 Ngokuti kuno vandhu vazinji vandaigara ndecinanga, asi wari ndinovanangazve ndecicema, ivona vari kuita inga vavengi vo mutanda wokutambujikira* wa Kristu.
19 Mugumo wavo kuparajwa, mwari wavo indani, vanojikuja ngo zvavaidikana kupseruka ndizvona, vanogara vecirangarira zviro zvo pasi pano.
20 Asi itusu tiri vagari vo kudenga, tiri kuimira muponesi ngo cido cese, Mambo Jesu Kristu,
21 iyena anozopinduja muviri wedu wakaremba kuti uezane no muviri wake uno nduma, ngo simba rake guru, rinoita kuti zviro zvese zvijidire pasi kwaari.
