Vagaratiya 2:1-21
2 Nopapera gumi ro makore no makore marongomuna, ndakaendazve Jerusarema pamwepo na Bharnabha, ndakaendavo pamwepo na Tito.
2 Ndakaendeyo ngokuti ndakavoneswa kuti ndaidikana kuendeyo. Nondaguma ndakavaverengera masoko akanaka andiri kucumaera ku vandhu vo majinja. Asi ndakazviita basi pamberi po hama jinoreremejwa maningi, kuti ndive no cokwadi cokuti mushando wangu asipi wo mahara.
3 Zvicinenyi hazvo, nee Tito waingaya pamwepo na inini, aazivi kuvangirijwa kuti asokwe,* kunyange wainga Mugiriki.
4 Asi shwiro iyi yakamuka ngo ndava yo hama jo kucengejera jakanghwina cinyararire, ngo cifishe-fishe kuti jifeye rusujunuko hwedu mukuzwirana na Kristu Jesu, kuti jitiite varanda vakaperera;
5 atizivi kuvatendera nee kuvazwira nee padoko hapo, kuti cokwadi co masoko akanaka cirambe cina imwimwi.
6 Asi kwa vaya vaivoniwa inga vanosisira maningi, kwandiri zvavaingaro andina basa nazvo, ngokuti Mwari aatongi mundhu ngo mavonekero o kunja. Vandhu vaireremejwari avazivi kundipa murangariro uri wese mupsa.
7 Mukusiyana, pavakavona kuti inini ndainga ndapuwa masoko akanaka kuti ndicumaere vacizivi kusokwa,* inga ndi Pedhru wakacumaira vakasokwa,*
8 ngokuti wiya wakapa Pedhru simba ro kuita upostori ku vakasokwa,* wakandipavo simba ku vomajinja,
9 pavakavona unyasha hucikaezaniswi hwandainga ndapuwa, Jakobo, Khefasi* na Johani, vaya vaidari inga njiki, vakabata nyara yangu no ya Bharnabha, vecivonesa kuti tazwirana: itusu tiende ku vomajinja, ivona voenda ku vakasokwa.*
10 Ivona vakakumbira basi kuti ticakanganwa varombo, izvo ngo zvandaivangisiravo kuita.
11 Ngo kudaro, Khefasi* paakaguma Antiyokiya, ndakamuvhunjirepo kamare kuti wainga aposa.
12 Ngokuti vacito vaguma vandhu vakavha ka Jakobo, iyena waiha no vomajinja, asi pavakazoguma, wakasiya kuha navo, ngo kuthya vo cikwata co vakasokwa.*
13 Vajudha vamweni vakatobatanavo naye pa kucengejera kondhoko, zvotoita kuti Bharnabha atocengejerevo.
14 Asi pandakavona kuti avacaitevejepi cokwadi co masoko akanaka, ndakavhunja Khefasi* pamberi po vese, kuti: “Iwewe uri Mujudha, unoteveja maponero o vomajinja, weciregera maponero o Vajudha, ngenyi unovangirija vomajinja kuti vatore maponero o Cijudha?”
15 Itusu tiri wari Vajudha vo cibarihwe, kuciripi vashaishi vomajinja,
16 tinoziva kuti mundhu aanangwi kuti mururami ngo kuzwira mutemo, asi basi ngo kutenda Jesu Kristu. Ngo kudaro tinotenda Kristu Jesu, kuti tinangwe tiri varurami ngo kutenda Kristu, kuciripi ngo kuzwira mutemo, ngokuti akuna anozonangwa kuti wakarurama ngo kuzwira mutemo.
17 Asi kudari tikawanikavo tiri vashaishi tecipsaka kunangwa kuti tiri varurami ngo pamusoro pa Kristu, zvinoreva kuti Kristu ngaanotiitisa kuti tishaishe here? Andizvopi!
18 Kudari ndikavakazve zviro zvandinonga ndaphwanya, ndinovonesa kuti ndiri mushaishi.
19 Ngokuti, ngo pamusoro po mutemo ndakasujunuka* kwauri, kuti ndive mundhu ari penye pamberi pa Mwari.
20 Wari ndakakohomehwa pa mutanda pamwepo na Kristu. Andinipi ndiri kupona, asi ndi Kristu ari kupona mukubatana na inini. Zvokadi, maponero andiri kuitari, ndiri kumaita ngo kutenda Mwana wa Mwari, wakandida, wopira upenyu hwake ngo ndava yangu.
21 Inini andirambi unyasha hucikaezaniswi hwa Mwari, ngokuti kudari mundhu anova mururami ngo kuzwira mutemo, waro Kristu wakafira mahara.
Masoko o Pasi
^ Kana: “acekwe suna.”
^ Kana: “kucekwa suna.”
^ Kana: “vakacekwa suna.”
^ Kana: “vakacekwa suna.”
^ Anodanijwazve kuti Pedhru.
^ Kana: “vakacekwa suna.”
^ Anodanijwazve kuti Pedhru.
^ Kana: “vakacekwa suna.”
^ Anodanijwazve kuti Pedhru.
^ Gama ngo Gama: “ndakafa.”
