Vagaratiya 3:1-29
-
Kusiyana ko mabasa o Mutemo no mabasa o rutendo (1-14)
-
Mururami anorarama ngo rutendo (11)
-
-
Cigondiso ca Abhirahama acizivi kucijikira pa Mutemo (15-18)
-
Kristu, mubarihwana wa Abhirahama (16)
-
-
Kwakavha Mutemo no cinangwa cawo (19-25)
-
Vana va Mwari ngo ndava yo rutendo (26-29)
-
Vakabatana na Kristu, mubarihwana wa Abhirahama (29)
-
3 Imwimwi Vagaratiya muri mapenji! Ndiyani wakamucengejari kudari, nomapera kusanangurihwa ushoni ngo pamusoro po kukohomehwa ka Jesu Kristu pa mutanda?
2 Ndinoda kumuvhunjisa* ciro cimwe: Makaashira mujimu ngo ndava yo kuzwira mutemo kana ngo ndava yo kutenda zvamakazwa?
3 Imwimwi muri mapenji akadari here? Pasure po kutanga kufamba mukuzwirana no simba ro mujimu wa Mwari,* muri kupejisira ngo kufambazve mukuzwirana no nyama here?*
4 Kureva kuti kutambujika kwenyu kwese kwakava ko mahara here? Ndino cokwadi kuti akucainga ko mahara.
5 Ngo kudaro, wiya anomupa mujimu no kuita mabasa o simba pakati penyu, anozwiita ngo kuzwira kwenyu mutemo kana ngo ndava yo kutenda kwamunoita zvamakazwa?
6 Zvakaitika na Abhirahama nga izvi: “Wakatenda Jehovha,* wonangwa kuti mururami.”
7 Munonasa kuzviziva kuti vaya vano rutendo ndivona vanozwi vana na Abhirahama.
8 Mwari wakananga mu matahwa kuti anozovona vandhu vo majinja kuva vakarurama ngo ndava yo rutendo hwavo, ngokuti wakatanga kuzivisa masoko akanaka kuna Abhirahama eciti: “Majinja ese anozokomborehwa ngo ndava yako.”
9 Ngo kudaro, vaya vano rutendo vanokomborehwa pamwepo na Abhirahama, waingaya no rutendo.
10 Vese vanothemba mabasa anokumbihwa ngo mutemo vakatukwa, ngokuti zvakatahwa kudari: “Vakatukwa vese vaya vacikarambi vari mu zviro zvakatahwa mu muphukutu wo Mutemo, ngo kuregera kuzviita.”
11 Kusiyapo izvo, zviri pambhene kuti apana anonangwa kuti mururami ndi Mwari ngo ndava yo kuzwira mutemo, ngokuti “mururami anozopona ngo ndava yo rutendo.”
12 Ngokuti Mutemo auzivi kucijikira pa rutendo. Mukusiyana, “wiya anoita zviro izvi, anozopona ngo ndava yazvo.”
13 Kristu wakatitenga, ecitivhisa pa kutukwa ko Mutemo ngo kutendera kutukwa pa ndau yedu, ngokuti zvakatahwa kuti: “Wakatukwa nga wiya anopakaikwa pa mutanda.”
14 Izvi zvakaitika kuti makomborero a Abhirahama agumirevo ku vomajinja ngo ndava ya Kristu Jesu, kuti tiashirevo mujimu wakagondeswa ngo pamusoro po rutendo.
15 Hama, ndiri kubhuya ndecishandisa muezaniso wo vandhu: Pakaitwa citenderano, kunyange caitwa ngo mundhu, apana anocipfujura kana kuciengejera.
16 Asi, cigondiso cakaitihwa Abhirahama no mubarihwana wake.* Matahwa aanangi kuti “no mubarihwana* yako,” inga kunangira vandhu vazinji. Mukusiyana, anonanga kuti “no mubarihwana wako,”* ecikhombija mundhu umwe basi, Kristu.
17 Kusiyapo izvo, inini ndinoti: Mutemo wakazovepo weya pa mazana marongomuna na makumatatu* o makore akazotevera, auiti kuti citenderano cakaitwaya ndi Mwari kare citame kushanda, kuti cipfujuke.
18 Ngokuti, kudari utaka hukacijikira pa mutemo, ahucacijikirizve pa cigondiso; asi Mwari wakapa utaka Abhirahama ngo kunaka mwoyo ecishandisa cigondiso.
19 Waro ngenyi Mutemo wakavepo? Wakadihwa kuti uvonese ushaishi mbhera ugume mubarihwana wainga wakagondiswa;* iwona mutemowo wakapuwa ngirozi, jougumisa kuno vandhu jecishandisa muviiranisi.
20 Ngo kudaro, pano mundhu umwe anobatanijwa, apana dikano kuti mundhu umweni aviiranise. Ndizvonavo zvondhozo na Mwari, ngokuti wainga ega paakaita cigondiso.
21 Zvinonanga kuti Mutemo unohwisana no zvigondiso zva Mwari here? Andizvopi! Ngokuti vandhu no vakapuwa mutemo unowanisa upenyu, ururami hwaizowanika ngo mutemo.
22 Asi Matahwa anokhombija kuti vandhu vakasungwa ngo cishaishi, kuti cigondiso cinowanika ngo kutenda Jesu Kristu, cipuwe vanotenda.
23 Ngo kudaro, rutendo hucito hwaguma, tainga takangwaririhwa ngo mutemo, takasungwa, teciimira rutendo hwaida kuzovoneswa.
24 Ngokuti Mutemo wakaita muperekeji* wedu kutiendesa kuna Kristu, kuti tinangwe kuti takarurama ngo pamusoro po rutendo.
25 Asi wari nohwaguma rutendo, aticiripizve pasi po muperekeji.*
26 Imwimwi mwese muri vana va Mwari, ngo ndava yo kutenda kwenyu Kristu Jesu.
27 Ngokuti imwimwi mwese makabhabhatijwa muna Kristu, mosimira Kristu.
28 Akuna Mujudha nokuti Mugiriki, akuna muranda nokuti musujunuki, akuna mwanarume nokuti mwanakaji, ngokuti imwimwi mwese muri umwe basi mukuzwirana na Kristu Jesu.
29 Cimwenizve, kudari muri vandhu va Kristu, muri mubarihwana wa* Abhirahama kamare, munozowana utaka hwakagondeswa Abhirahama.
Masoko o Pasi
^ Gama ngo Gama: “kujija ndimwi.”
^ Gama ngo Gama: “kutanga ngo kumujimu.”
^ Gama ngo Gama: “muri kupejisira ngo kunyama.”
^ Vonanyi Kudurujihwa ko Magama.
^ Gama ngo Gama: “mbeu yake.”
^ Gama ngo Gama: “mbeu.”
^ Gama ngo Gama: “mbeu yako.”
^ 430.
^ Gama ngo Gama: “igume mbeu yainga yakagondiswa.”
^ Kana: “mungwariri.”
^ Kana: “mungwariri.”
^ Gama ngo Gama: “muri mbeu ya.”
