Vagaratiya 4:1-31
4 Inini ndinoti: Kudari mugari wo utaka ari mwana mudoko, iyena wakaezana no muranda, kunyange ari mune wo zvese,
2 iyena anozwira vangwariri no vareri mbhera ugume mukuvo wakanangwa ndi baba wake.
3 Na itusuvo, mukuvo wotainga vana vadoko, taiithwa varanda ngo zviro zvo nyika ino.
4 Asi mukuvo no waguma, Mwari wakatuma Mwana wake, wiya wakabahwa ngo mwanakaji, wopona mukuzwirana no mutemo,
5 kuti asujunure ngo kutenga vaya vaipona mu kuzwirana no mutemo, kuti itusu tidanijwe inga vana.
6 Zvecivoneka kuti imwimwi muri vana, Mwari wakatumira mujimu wo Mwana wake mu mwoyo medu, iwona unokhuwa weciti: “Abha,* Baba!”
7 Ngo kudaro auciripizve muranda asi uri mwana. Waro kudari uri mwana, Mwari wakakuitavo mugari wo utaka.
8 Pamainga mucikazivi Mwari, mainga varanda vo zvimwari zvo kunyepa.
9 Asi, waro imwimwi muri kuzivari Mwari, kana kuti muri kuzivikari ndi Mwari, zvingaitisa kudini kuti muhwirirezve ku zviro zvicikashandi no zvicina simba, mecida kuti zvimuitezve varanda vazvo?
10 Imwimwi munorangarira kuti kuno njiku, mweji, ngari no makore anosisira maningi, mecizviceukija.
11 Ndinothya kuti kushanda kwandakaita ngo simba ngo ndava yenyu kwakava ko mahara.
12 Hama: Ndinokumbira kuti muite inga ndini; ngokuti inini ndakaitavo inga ndimwi. Imwimwi amuzivi kundishaishira ciro.
13 Munozviziva ushoni kuti inini ndakamuzivisa masoko akanaka pa kutanga ngo ndava yo ndhendha yangu.
14 Kunyange mugariro wangu wo kunyama wainga muejo kwamuri, imwimwi amuzivi kunditaja ngo njira yo kundirerusa kana kundinyenya, asi makandiashira inga ngirozi ya Mwari, inga Kristu Jesu.
15 Waro, uri kwapi mudakaro wamaingaya nawo? Ngokuti inini ndinothemba kuti, nozvaikwanisika komuri, maizovhisa majiso enyu, kuti mundipe.
16 Wari ndaamuvengi wenyu ngo kumuvhunja cokwadi here?
17 Ivona vanopsaka ngo mwoyo wese kumuwina, asi avana cido cakanaka; ngokuti vanoda kumureyesa kondiri, kuti muve makabatikana ngo kuvatevera.
18 Zvokadi, zvakanaka kuti mundhu apsake ngo mwoyo wese kumuwina ano cido cakanaka, kuciripi basi pandinonga ndiri pakati penyu,
19 ngokuti ndakahwajihwazve ngo pamusoro penyu inga mwanakaji ari kubara, mbhera mukhombijire undhu hwa Kristu.
20 Ndaida kuva pakati penyu wari no kuvereketa na imwimwi ngo maitiro amweni, ngokuti andizivi zvandingaita ngo ndava yenyu.
21 Ndivhunjenyi, imwimwi munoda kuzwira mutemo, amuzvizivi zvinonanga Mutemo kani?
22 Inga muezaniso, zvakatahwa kuti Abhirahama wakava no vana vaviri, umwe wakamubara no muranda wokaji, umweni wakamubara no mwanakaji wakasujunuka;
23 mwana wo muranda wokaji wakabahwa inga vana vamweni, asi mwana wo mwanakaji wakasujunuka wakabahwa ngo ndava yo cigondiso.
24 Zviro izvi zvinoita muezaniso; ngokuti vanakaji ava vanoimirira zvitenderano zviviri, citenderano cimwe cakaitihwa pa Dundhu ro Sinai cecibara vana vo uranda, icona cinoimirihwa ndi Agari.
25 Agari anoimirira dundhu riri ku Arabhiya rinozwi Sinai, eciezanisira Jerusarema ra nyamasi uno, ngokuti riri mu uranda no vana varo.
26 Asi Jerusarema ro kumatenga rakasujunuka, ndirona mai wedu.
27 Ngokuti zvakatahwa kuti: “Dakarai mwanakaji acikabari; khuwai no kudakara maningi, iwewe mwanakaji acizivi kuhwajihwa ngo kubara; ngokuti vana vo mwanakaji wakasiiwa, vakawanda maningi kupinda vo mwanakaji ano mwamuna.”
28 Imwimwi hama, muri vana vo cigondiso inga zvaainga Izaki.
29 Asi kudari inga wiya wakabahwa inga vana vamweni wakatanga kuteverera wainga akabahwa ngo simba ro mujimu mucena, ngo zvinoitikavo na wari.
30 Waro, matahwa anonangenyi? “Gogomerai muranda wokaji no mwana wake, ngokuti mwana wo muranda aazogari utaka pamwepo no mwana wo mwanakaji wakasujunuka.”
31 Ngo kudaro hama, itusu atiripi vana vo muranda wokaji, asi tiri vana vo mwanakaji wakasujunuka.
Masoko o Pasi
^ Gama ro Ciaramaika rinoreva kuti “nandi Baba!”
