Vagaratiya 6:1-18
6 Hama, kudari mundhu akatevera gwanja rakashata acito azviziva, imwimwi muno zvikwaniriso zvo umwari, ejanyi kumupangira* ngo mwoyo wakapfava. Asi imwimwi jingwarirenyi kuti mutame kuejwavo.
2 Thwarirananyi muthwaro ngo cenyu, mukaita kudaro, munozokwanirisa mutemo wa Kristu.
3 Kudari mundhu akarangarira kuti anosisira kuveni aasisiri, iyena ari kujicengeja ega.
4 Asi umwe na umwe ngaasotesese zviito zvake, akadaro anozodakara ndizvona, acikajiezanisi no vamweni.
5 Ngokuti umwe na umwe anozothwara mutoro wake.
6 Kusiyapo izvo, wiya ari kujijiswa soko, ngaape zvese zvakanaka kuna wiya anomujijisa.
7 Mucacengejwa: Mwari aaungwiswi. Zvaanosima mundhu, ngo zvaanozokotora;
8 Ngokuti wiya anosima mu nyama yake anozokotora kuvora kunovha mu nyama yake, asi wiya anosima mu mujimu anozokotora upenyu hucikaperi hunovha mu mujimu.
9 Ngo kudaro, ticaremba kuita zvakanaka, ngokuti tinozokotora pa nguva kwayo, kudari tikatama kuremba.
10 Patinonga tino nguva, ngatiitire zvakanaka vandhu vese, asi maningi-ningi ku hama no hambzaji jedu jo Cikristu.
11 Vonanyi kuti ndiri kumutarira ngo retra jakakura maningi ngo nyara yangu.
12 Vese vanoda kuvoniwa ushoni ngo vandhu, ndivona vanomuvangirija kuti musokwe,* ivona vanozviita ngo kuthya kuteverehwa ngo ndava yo mutanda wokutambujikira* wa Kristu.
13 Kunyange vanosokwaro* avazwiri Mutemo, asi vanoda kuti musokwe* kuti vajikuje ngo pamusoro po nyama yenyu.
14 Asi inini andizojikuji, kuciripi ngo ndava yo mutanda wokutambujikira* wa Mambo wedu Jesu Kristu; ngo pamusoro pake, nyika yakafa kondiri, ininivo ndakafa kwairi.
15 Kusokwa* kana kutama kusokwa azvisisiri, asi cinosisira kuva cisikwa cipsa.
16 Runyararo no unyasha ngazvive kuna vese vaya vanopona mukuzwirana no masoko o mufambiro wedu, vanoumba Iziraeri ya Mwari.
17 Kuvhira wari, apana anodikana kundinesa, ngokuti ndino mbanga mu muviri jinokhombija kuti ndiri muranda wa Jesu.
18 Hama, unyasha hucikaezaniswi hwa Mambo wedu Jesu Kristu ngahuve mu maitiro amunotatijira. Ameni.
Masoko o Pasi
^ Gama ngo Gama: “kumurungamisa.”
^ Kana: “mucekwe suna.”
^ Vonanyi Kudurujihwa ko Magama.
^ Kana: “vanocekwaro suna.”
^ Kana: “mucekwe suna.”
^ Vonanyi Kudurujihwa ko Magama.
^ Kana: “kucekwa suna.”
