Vahebheru 1:1-14
1 Kare no kare, Mwari wakavereketa kazinji, mu njira jakasiyana-siyana no majicekuru edu ecishandisa vaporofeti.
2 Asi wari pa njiku jino jo kupejisira, iyena wakabhuya na itusu ecishandisa Mwana wake, waakapa utaka hwo zviro zvese, womushandisa kuti aite nyika.
3 Mwana anovonesa rukujo hwa Mwari, iyena ndiyena muezaniso wake kamare, anocijikira zviro zvese ngo simba ro soko rake. Paakapera kucenesa zvishaishi zvedu, iyena wakagara ku divi ro mukono muho wa Mwari Mukuru kumatenga.
4 Ngo kudaro, iyena wakava mukuru kupinda ngirozi jese, ngokuti wakagara utaka zina rakadakaja kupinda mazina ajo.
5 Inga muezaniso, ingirozi yapi yakambovhunjwa ndi Mwari kuti: “Iwewe uri mwanangu; nyamasi inini ndava babako”? Yovhunjwazve kuti: “Inini ndinozova babake, iyena anozova mwana wangu”?
6 Paakaviisazve Dangwe rake panyika pano, iyena wakati: “Ngirozi jese ja Mwari ngajimugwadamire.”
7 Kusiyapo izvo iyena anonanga ngo pamusoro po ngirozi jake kuti: “Anoita kuti ngirozi jake jive no simba,* vabatiri vake vave inga murazvu wo muriro.”
8 Ngo pamusoro po Mwana, iyena anoti: “Mwari ndiyena cigaro cako co umambo mbhera narini, kwenda no kwenda, ndonga yako yo Umambo indonga yo ururami.
9 Imwimwi makada ururami, monyenya kutama kuzwira mutemo. Ndizvona zvakaitisa kuti Mwari, Mwari wako kamare, akuzoje ngo mafuta no kukupekeja mudakaro mukuru kupinda vadoni vako.”
10 Cimwenizve: “Imwimwi Mambo, pakutanga makadira maambo o nyika, matenga ibasa ro nyara jenyu.
11 Izvona zvinozopera, imwimwi munozogara mbhera narini, izvona zvinozosakara inga nguvo,
12 imwimwi munozozvipeta inga bhurangeti, izvona zvinozocinjwa inga nguvo, ndizvonavo zvondhozvo, makore ako aazovi no magumo.”
13 Ingirozi yapi yakambovhunjwa kuti: “Garai pa mukono muho wangu mbhera ndiite kuti vavengi vako vave ciciko co soka jako”?
14 Jese asipi mujimu jinoita basa rakacena here, jakatumwa kuti jishandire vaya vanozogara ndhaka yo kuponeswa?
Masoko o Pasi
^ Kana: “ngirozi jino simba no.”
