Vahebheru 10:1-39
10 Mutemo ndiwona munvuriri wo zviro zvinozoviya, asi andiwopi kamare zviro zvakona. Ngo kudaro, vayani vanokhwedera kuna Mwari avangaithwi vakakwana ngo mupiro wondhowo unoithwaro gore ngo gore.
2 No zvaikwanisika kuti vave vakakwana, avacaizoregera kuita mupiro? Ngokuti hana yavo aicaizotakepi ngo pamusoro po zvishaishi zvavo.
3 Mukusiyana, mupiro iyi inoceukija zvishaishi gore ngo gore.
4 Ngokuti azviitiki kuti ngazi yo n’gombe no yo mbuji ivhise zvishaishi.
5 Ngokuti paakanghwina mu nyika, iyena wakananga kuti: “‘Auzivi kuda mupiro no cipo, asi wakandinasiririra muviri.
6 Auzivi kutendera zvipo zvo kupisihwa nee zvipo zvo zvishaishi.’
7 Perapo ndakananga kuti: ‘Ndiri pano (mu bhuku makatahwa ngo pamusoro pangu) kuti ndiite kuda kwenyu Mwari wangu.’”
8 Pasure po kutanga kunanga kuti: “Auzivi kuda nee auzivi kutendera mupiro no zvipo no zvipo zvo kupisihwa, pomwe no mudiro yo zvishaishi.” Iji jainga mupiro jaiithwa mukuzwirana no Mutemo.
9 Tevere iyena anonanga kuti: “Ndiri pano kuti ndiite kuda kwenyu.” Iyena anovhisa cokutanga kuti adire cocipiri.
10 “Kuda” uku ndikona kwakatiita kuti ticeneswe ngo cipo co muviri wa Jesu Kristu, kamwe mbhera narini.
11 Cimwenizve, mupiri wese anogara pa ndau yake njiku ngo njiku kuti aite basa rakacena, eciita mupiro wondhowo ucikakwanisi kupeja kamare zvishaishi.
12 Iyena wakaita mupiro wo zvishaishi kamwe basi, wogara ku mukono muho wa Mwari.
13 Kuvhira pondhopo, iyena wakaimira kuti vavengi vake vadihwe pasi po soka jake.
14 Iyena wakashandisa mupiro umwe basi, kuti vaya vakaceneswa vave vakakwana mbhera narini.
15 Kusiyapo izvo, mujimu mucena unotiitira ucapupu weciti:
16 “Jehovha* anonanga kuti: ‘Ici ndicona citenderano cangu candinozoita na ivona. Ndinozodira mutemo yangu mu mwoyo yavo, ndozoitara mu murangariro yavo.’”
17 Iyena anoenderera mberi eciti: “Andizoceukijizve zvishaishi zvavo no zviito zvavo zvakashata.”
18 Ngo kudaro, pakava no kuregerehwa ko zvishaishi izvi, apacina cipo co zvishaishi.
19 Ngo kudaro hama, itusu tinonasa kuthemba kuti tingashandisa gwanja rinotiendesa ku ndau yakacena ngo ngazi ya Jesu.
20 Gwanja ibza iri ngo roupenyu, takarifunungurihwa ndiyena ngo jira, kana kuti, muviri wake.
21 Itusu tino mupiri mukuru anotungamirira mu nyumba ya Mwari.
22 Ngo kudaro, ngatikhwedere kuna Mwari ngo mwoyo uno rutendo hwakakwana, tino mwoyo yakacena no hana yakanaka, muviri yedu yosambijwa ngo kumwa yakacena.
23 Ngatibatisise kutokotesa kwatinoita vetero yedu ticikacukunuki, ngokuti wiya wakaigondesa, wakagondeka.
24 Ngatirangarirane ngocedu kuti tivangisane pa kudisana, pa kuita mabasa akanaka,
25 ticikashwi kuenda ku musongano jedu, inga zvinoithwa ngo vamweni, asi ngativangisane ngocedu, maningi-ningi pamunongari mecivona kuti njiku iri kukhwedera.
26 Kudari tikaita cishaishi ngo cabomo pasure po kujijiswa cokwadi, akucinazve mupiro ngo pamusoro po cishaishi,
27 asi kwasara basi kuvetera kutongwa kunothyisa no ushungu hunobwaka, hunozopeja vavengi.
28 Mundhu wese anotama kuzwira Mutemo wa Mosi anofa acikaitihwi unyasha kudari pakava no zvapupu zviviri kana zvitatu.
29 Munovona kudini, mundhu anocika Mwana wa Mwari andiyepi waifanera kukhawiswa maningi, wotama kureremeja ngazi yo citenderano yaakaceneswa ndiyona, wotuka no kushora mujimu wo unyasha hucikaezaniswi?
30 Ngokuti itusu tinoziva wiya wakananga kudari: “Kuhwirijira ngo kwangu; ndini ndinozohwirijira.” Wonangazve kuti: “Jehovha* anozotonga vandhu vake.”
31 Zvinothyisa maningi kuwira mu nyara ja Mwari anopona.
32 Ceukijanyi njiku jokare, imwimwi pamakapera kuashira ruvheneko, makacungirira muejo mecitambujika maningi.
33 Pa mukuvo umweni, imwimwi maishohwa no kutambujwa maningi pamberi po vandhu vazinji, asi pa mukuvo umweni imwimwi mainga pamwepo na vaya vaitambujwa.
34 Imwimwi makaitira pena vandhu vainga vakasungwa, motendera kutorehwa zviro zvamainga nazvo, meciziva kuti muno zviro zvinogara no kucingaperi.
35 Ngo kudaro, mucaregera kucunga, kucunga uku munozopfuphwa ndikona.
36 Imwimwi munodikana kucungirira, kuti pasure po kuita kuda ka Mwari, muashire zvomakagondeswa.
37 Ngokuti kwasara “nguva doko.” Cimwenizve, “wiya ari kuviya anozoguma, aazononoki.”
38 “Asi mururami wangu anozopona ngo ndava yo rutendo.” Wakatizve: “kudari akahwirira sure, inini andizodakari ndiyena.”
39 Itusu atiripi mufumbo wa vaya vanohwirira sure kuti vaparajwe, asi tiri mufumbo wa vaya vano rutendo hunotiita kuti tipone.
