Vahebheru 11:1-40
11 Rutendo, zvinoreva kuthemba kwakaperera ko zviro zvinovetehwa, kuti zvinozoitikadi kamare, ova maitiro okuvonesa zviro zvicikavoneki kuti ndizvonadi.
2 Vandhu vokare vakaitihwa ucapupu ngo pamusoro po kutenda uku.
3 Ngo kutenda, tinokwanisa kuvona kuti nyika* yakarongwa ngo soko ra Mwari, kuti zviro zvinovoneka, zvivepo kuvha ku zviro zvicikavoneki.
4 Ngo rutendo, Abheri wakaitira Mwari mupiro wo mutengo mukuru kupinda wa Khaini, ngo rutendo hwondhohwo, wakatokoteswa kuti mururami ngokuti zvipo zvake zvakaashihwa ndi Mwari, ngo ndava yo rutendo, pikija wakafa anondovereketa.
5 Ngo rutendo, Enoki wakathuthiswa kuti atame kuvona rufu, iyena aazivi kuwanikazve ku ndau iri yese, ngokuti Mwari wainga akamuthuthisa. Ngokuti acito athuthiswa, iyena wakaitihwa ucapupu hwokuti wakadakajisa ushoni Mwari.
6 Kusiyapo izvo, pacina rutendo, azvikwanisiki kudakajisa Mwari, ngokuti wiya anokhwedera kuna Mwari anodika kutenda kuti iyena ariyo. Iyena anopfupa vanomupsaka ngo mwoyo wese.
7 Ngo rutendo, Nowa paakapera kuashira ciziviso ca Mwari co zviro zvainga zvicito zvavoneka, iyena wakakhombija kuthya Mwari, wovaka piketi* kuti aponese mburi yake; ngo ndava yo rutendo hwondhohwo, iyena wakatonga nyika, wova mugari wo utaka hunovha pakutenda.
8 Ngo rutendo, Abhirahama paakadanijwa, wakazwira ngo kwenda ku ndau yaaizoashira utaka hwake; iyena wakaenda pikija aacaikuziva kwaaienda.
9 Ngo rutendo, iyena wakaita mu nyikanja mu nyika yaakagondeswa inga ari mu nyika imweni, ecigara mu matende pamwepo na Izaki na Jakobe vaizogara utaka hwondhohwo pamwepo naye.
10 Ngokuti iyena wainga ecivetera dhorobha rino maambo okadi-kadi, rakarongwa no kuvakwa ndi Mwari.
11 Ngo rutendo, Sara pikija wainga waa harahwa, wakawana simba ro kubara mwana, ngokuti waivona kuti wakaitaro cigondiso ici, wakagondeka.
12 Ngo mundhu waiita inga akafa, wakabara vandhu vazinji inga ndhondho jo kudenga, vacingaverengeki inga musanga wo mujombe.
13 Vandhu vese vakafa vecitenda, pikija vacizivi kuashira zviro zvo vakagondeswa, asi vakazvivona ngo ndhambo vozvitenda no mudakaro wese. Ivona vakazvitokotesa pambhene kuti vainga vagari vonyikanja, vagari vo nguva shoma mu nyika yondhoyo.
14 Vese vanovereketa kudari, vari kujipsakira ndau yavo yokugara.
15 Kudari novaigara vecirangarira ku ndau yavakavha, vangadari vakawana mukana wo kuhwirira.
16 Asi vandhu vakadaro, vari kupsanga ndau yakanaka, ndau yondhoyo ngo yo kudenga. Ngo kudaro, Mwari aapseruki ndivona ngo kudanijwa Mwari wavo, ngokuti iyena wakavanasirira dhorobha.
17 Ngo rutendo, Abhirahama paakaejwa, wakapira Izaki. Iyena wainga akaashira cigondiso ca Mwari ngo mudakaro wese, wopira mwana wake umwe ega.
18 Iyena wainga akavhunjwa kuti: “Wiya anozodanijwa mwana wako, anozoviya ngo pamusana pa Izaki.”
19 Asi iyena waiziva kuti Mwari anokwanisa kumumusa pikija akafa. Iyena wakamuashira kuvha mu rufu mu njira yokuezanisira.
20 Ngo rutendo, Izaki wakakomborera Jakobe na Ezau ngo pamusoro po zviro zvaizoviya.
21 Ngo rutendo, Jakobe paainga woda kufa, wakakomborera vana vese va Josefa, wonamata Mwari akacijikira ngo pambhiri po ndonga yake.
22 Ngo rutendo, Josefa paainga woda kufa, wakabhuya ngo pamusoro po kubuda ko vana Vaiziraeri, wonanga zvaidikana kuithwa maphondo ake.
23 Ngo rutendo, Mosi wakavigwa ngo majibaba ake ko mweji mutandhatu pasure po kubahwa. Ivona vakavona kuti iyena wainga wakanyara* maningi, votama kuthya mutemo wa mambo.
24 Ngo rutendo, Mosi paainga akura, wakaramba kudanijwa mwana wo mwana wokaji wa Faro,
25 wosana kutambujwa pamwepo no vandhu va Mwari, kuciripi kubusa mabuso o nguva shomani o cishaishi.
26 Ngokuti kwaari kushohwa kwakaitwa Kristu, wainga upfumi hwakakura maningi kupinda upfumi hwo Ejipita, ngokuti iyena waisotesesa mupfupo waizoviya.
27 Ngo rutendo, iyena wakasiya Ejipita, acikathyi ushungu hwa mambo, ngokuti iyena waiita inga ari kuvona Wiya acikavoneki.
28 Ngo rutendo, iyena wakaita mabuso o phasika wozuzira ngazi kuti muparaji atame kuuraya matangwe avo.
29 Ngo rutendo, vakaambuka Jombe ro Kupsuka vecifamba ngo pasi pakaoma, Vaejipita pavakaeja kuzviitavo, vakamijwa ngo jombe.
30 Ngo rutendo, mufimbiji jo Jeriko jakahidhika, sure ko kutenderekehwa ngo Vaiziraeri ko njiku nomwe.
31 Ngo rutendo, Rahabhi, hure, aazivi kufa pamwepo na vaya vacizivi kuzwira, ngokuti iyena wakaashira ushoni vafeyi.
32 Ngo zvapi zvimweni zvandinganangazve? Nguva aicaizokwanepi, kudari ndikatanga kunanga ngo pamusoro pa Gidhiyoni, Bheraki, Samusoni, Jefta, Dhavhidhi pamwepo na Samueri no vaporofeti vese.
33 Ngo rutendo, ivona vakanyisa majimambo, vakaita kuti pave no ururami, vakawana zvigondiso, vakafunga muromo yo mbhondoro,
34 vakajima simba ro muriro, vakapona kutemwa ngo banga. Pavainga vakaremba vakava vakavanga, vakava vano simba pa hondo, vakanyisa zvikwata zvo vavengi.
35 Vana vainga vakafa vo vanakaji, vakamuswa. Vanarume vamweni vakatambujwa ngokuti vairamba mukhaindi umweni wo rusujunuko, ngokuti vaida kuwana rumuko hwakanaka.
36 Vamweni vaisongana no muejo jo kushohwa no kutakwa maningi, vecisungwa ngo magaragajero vecidihwa mukadheya.
37 Ivona vakafuhwa ngo mapuwe, vakaejwa, vakaguhwa ngo pakati, vakaurawa ngo banga, vaifamba vakasimira matovo o mavhuta, matovo o mbuji, vano utami, vecitambujika, vecishaisha kutajwa;
38 nyika aicainga yakavanakira. Ivona vaindofamba mumapani, mu matundhu, mu mapambha* no mu maguru opasi.
39 Asi pikija vese ava, vakawana ucapupu ngo pamusoro po rutendo hwavo. Ivona avazivi kuwana zvavakagondeswa.
40 Ngokuti Mwari, wainga akavona zviro zvakanaka kwatiri, zvokuti ivona avacaidikanepi kuva vakakwana itusu ticipo.
