Vahebheru 12:1-29
12 Ngo kudaro, zvecivoneka kuti itusu tino njama huru yo zvapupu* zvakatitendeneja, ngativhise zviro zvese zvinorema no cishaishi cinotisunga ngo kukasika. Togogoma ngo simba rese tecienda pambeji,
2 patinonga takasotesesa Jesu, Muimiriri Mukuru no Mukwanisi wo rutendo hwedu. Ngo ndava yo mudakaro wakadihwa pamberi pake, iyena wakacungirira pa mutanda wokutambujikira,* acikathyi kupseruka, wogara pa mukono muho wo cigaro ca Mwari.
3 Rangariranyi ngo pamusoro pa wiya wakacungirira masoko akashata, masoko awo aiverekethwa ngo vashaishi vecitozvishaishira, kuti mutame kuremba mohwirira sure.
4 Pakuhwisana no cishaishi ici, imwimwi amuto macungirira mbhera pa kubuda ngazi.
5 Imwimwi makakanganwa kamare ngwajo yamakapuwa inga vana yecinanga kuti: “Mwana wangu, ucarerusa mbhangiro inovha kuna Jehovha,* nee audikani kuremba paunonga wecipangihwa ndiyena.
6 Ngokuti Jehovha* anopangira vaanoda. Zvokadi, iyena anoshaputa mundhu wese waanoashira inga mwana.”
7 Munodikana kucungirira ngokuti munonga mecitatija kuti muri kuda kupangihwa. Mwari anomutaja inga muri vana vake. Ngokuti, mwana wapi acikapangihwi ndi babake?
8 Kudari imwimwi mwese mukatama kuashira mbhangiro iyi, imwimwi amuripi vana vake kamare. Asi muri vana vo vamweni.
9 Cimwenizve, majibaba edu aitipangira, itusu tecimareremeja. Itusu aticaidikanepivo kureremeja maningi Baba vanotungamirira upenyu hwedu ngo simba ravo rakacena here?
10 Majibaba edu aitipangira pa nguva shomani mukuzwirana no mavonero avo. Asi Mwari anozviita kuti atibesere, tova vakacena inga ndiyena.
11 Ndizvona kuti mbhangiro inohwaja pa kutanga. Aidakajisi mundhu. Asi ku vandhu vayani vanonga vecirovejwa ndiyona, mbhangiro iyi inobara mucero wo ururami no runyararo.
12 Ngo kudaro, musanyi nyara jakawa muvangise makokovhi akarembejeka.
13 Endereranyi mberi mecirungamisa makwanja enyu. Kuti mundhu wakaremara atame kunyanyisa, asi aite nane.
14 Psakanyi runyararo no ruceno pakati po vandhu vese. Pacina mugariro uwu apana mundhu anozokwanisa kuvona Mambo.
15 Ngwariranyi kuti patame kuwanika mundhu anoruza unyasha hucikaezaniswi hwa Mwari. Kuti patame kumera muji uno nvhenene unobara cineso, mujiwo wopairira vazinji.
16 Ngwariranyizve kuti pakati penyu patame kuwanika mundhu anoita uhure,* wotama kureremeja zviro zva Mwari inga zvakaithwa ndi Ezau. Iyena wakatengesa utangwe hwake ngo ciro cokuha kamwe basi.
17 Ngokuti imwimwi munozviziva kuti, paakada kuti agare utaka hwo makomborero, iyena wakarambiwa pikija wakaeja kuvacinja murangariro ecicema,* asi aazivi kuzvikwanisa.
18 Ngokuti imwimwi amuzivi kuguma phedo no ciro cinobatika, ciro cino murazvu, ciro cinomakore akasvipa maningi, ciro cino cidima cakakura, ciro cino zibepo guru,
19 kurira ko mbhayapaya no izwi rakavereketa. Vandhu pavakarizwa, vakadeketera kuti vatame kubhuyazve na irona.
20 Ngokuti ivona avakwanisi kucungirira mupango unonanga kuti: “Pikija cinyama cikakhwesa pa dundhu, cinodikana kufuhwa ngo mapuwe.”
21 Cimwenizve, zviitiko zvakona zvaithyisa zvokuti Mosi wakananga kuti: “Ndiri kutetemera ngo kuthya.”
22 Asi imwimwi makakhwederera dundhu ro Ziyoni no dhorobha ra Mwari anopona rinozwi Jerusarema ro kudenga. Makakhwedererazve ku zviuru zvo ngirozi
23 jakaungana no ku ungano yo matangwe yakatahwa kumatenga. Mokhwedera kuna Mwari mutongi wo vese no upenyu hwo kumujimu hwo varurami hwakaithwa hwakakwana,
24 na Jesu muviiranisi wo citenderano cipsa no ngazi yakazuzihwa inovereketa ushoni kupinda ngazi ya Abheri.
25 Ivanyi no cokwadi co kuti munozwira ari kubhuya. Kudari vacizivi kupona pasi pano vaya vakaramba kuzwira mbhangiro inovha kuna Mwari, itusu tinozoviyavo ngokwapi kudari tikafuratira wiya anovereketa kuvhira kudenga?
26 Panguva yondhoyo izwi rake rakazungunyisa nyika. Asi wari iyena wakagondesa kuti: “Ndinozozungunyisazve nyika no kudenga.”
27 Gama ro kuti “ndinozozungunyisazve” rinokhombija kuvhisa zviro zvinozozungunyiswa, zviro zvakaithwa ngo mundhu, kuti zviro zvicizivi kuzungunyiswa zvigare zviripo.
28 Zvecivoneka kuti tinozoashira umambo ucikazozungunyiswi, ngatienderere mberi teciashira unyasha hucikaezaniswi, kuti ngo unyasha hwondhohwo tiitire Mwari basa rakacena munjira inofanera, ngo kuthya no kumureremeja.
29 Ngokuti Mwari wedu ndiyena muriro unopisa.
Masoko o Pasi
^ Gama ngo Gama: “gore guru ro zvapupu.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ kana: “ecirira.”
