Vahebheru 13:1-25
13 Garanyi mecidisana inga hama.
2 Mucakanganwa kuashira varendo.* Ngo kuita kudaro, vamweni vakaashira ngirozi vacikazvizivi.
3 Garanyi mecirangarira vandhu vari mukadheya, inga muri mukadheya pondhopo na ivona. Rangariranyivo vaya vari kutambujwa, ngokuti imwimwi muciri pasi pano.
4 Mucadho ngaureremejwe ngo vese. Mubhedhu wo vandhu vakacadha ngaugare wakacena. Ngokuti Mwari anozotonga vanohura* no kuita upombo.
5 Mucadisisa maningi mare mu upenyu hwenyu. Asi dakaranyi ngo zvamunazvo. Ngokuti iyena wakati: “Inini andizokusiyi. Inini andizokuregeri.”
6 Ngative takanasa kucunga tecinanga kuti: “Jehovha* ndiyena mubeseri wangu. Andizothyi. Mundhu angandiitenyi?”
7 Ceukijanyi vaya vanotungamirira pakati penyu, vaya vakamuvhunja soko ra Mwari. Pamunovona muviyo wo mufambiro wavo, tevejeranyi rutendo hwavo.
8 Jesu Kristu ndiyena wondhowo basi, kuvhira zuro, nyamasi mbhera narini.
9 Mucacengejwa ngo jijiso jakasiyana-siyana jamucikazivi. Ngokuti zviri nane kuti mwoyo uvangiswe ngo unyasha hucikaezaniswi kuciripi ngo zvokuha zvicikabeseri vaya vanokaya-kaya ndizvona.
10 Itusu tino artari, vaya vanoita basa rakacena mu tende, avatendehwi kuha.
11 Ngokuti muviri jo zvinyama zvaitohwaya ngazi yazvo ngo mupiri mukuru ecienda nayo mu ndau yakacena kuti aite zvipo zvo zvishaishi, zvaipisihwa kunja ko tende.
12 Ngo kudaro, Jesu wakatambujikavo kunja ko dhorobha, kuti acenese vandhu ngo ngazi yake.
13 Ngo kudaro, ngatiyende kwaari kunja ko tende tecishohwa inga ndiyena.
14 Ngokuti itusu pano atina tende inogara kwenda no kwenda. Asi tinopsaka ngo mwoyo wese tende inozoviya.
15 Ngo ndava yake, ngatiitire Mwari mupiro jo kumusimba mukuvo wese. Mupiro iji, ndijona mucero jo muromo wedu unozivisa zina rake pambhene.
16 Kusiyapo izvo, mucakanganwa kuita zvakanaka no kupekeja vamweni zvamunazvo. Ngokuti Mwari anodakara maningi ngo mupiro jakadaro.
17 Zwiranyi vaya vanotungamirira pakati penyu, motendera ndhungamiriro javo. Ngokuti ivona vanomuvonerera mukuvo wese inga vandhu vanozodavira pamberi pa Mwari. Mukavazwira, vanozozviita vakadakara, kuciripi vecihwajihwa ngokuti izvi zvaizomukhuvaza.
18 Tiitirenyi mukumbiro mukuvo wese. Ngokuti tinothemba kuti tino hana yakagondeka. Itusu tinoda kuva takagondeka pa zviro zvese.
19 Asi candiri kumuvangisa maningi, ngocokuti muite mukumbiro wo kuti ndiviyeyo ngo kukasika.
20 Mwari wo runyararo, wakamusaya ko vakafa, muhavisi mukuru wo mavhuta, Mambo wedu Jesu, ngo ngazi yo citenderano cicikaperi,
21 ngaamupe zviro zvese zvakanaka zvamunoda kuti muite kuda kwake. Ngaaite mukati mwedu zviro zvese zvinodakajisa pameso pake, ngo zina ra Jesu Kristu. Iyena ngaakujwe mbhera narini, kwenda no kwenda. Ameni.
22 Inini ndinomuvangisa hama, kuti munase kupurutana ngo kusengerera kwese masoko aya anovangisa. Ngokuti ndakamutarira masoko mashoma.
23 Ndinoda kuti muzive kuti hama yedu Timoti yasujunuhwa. Kudari ikaviya ngo kukasika, tinozozeyo tese kuzomuvona.
24 Tambisanyi vese vari kutungamirira pakati penyu no hama jese jakasanwa. Hama jo Itariya jiri kumutambisa.
25 Unyasha hucikaezaniswi ngahuve na imwimwi mwese.
Masoko o Pasi
^ Kana: “kunaka mwoyo ku vandhu vaticikazivi.”
^ Vonanyi Kudurujihwa ko Magama pa gama rinoti “Uhure.”
^ Vonanyi Kudurujihwa ko Magama.
