Vahebheru 3:1-19
3 Ngo kudaro, hama jangu jakasanwa, jakadanijwa kwenda kudenga, rangarijisisanyi ngo pamusoro pa Jesu, mupostori no mupiri mukuru watinonangaya kuti tinomutenda.
2 Iyena wakagondeka kuna wiya wakamugaja, inga zvakaita Mosi mu nyumba yese ya Mwari.
3 Iyena anovoniwa kuti anodikana kukujwa maningi kupinda Mosi, ngokuti wiya anovaka nyumba anokujwa maningi kupinda nyumbeyo.
4 Nyumba yese inovakwa ngo mundhu, asi wakaita zviro zvese ndi Mwari.
5 Mosi wainga akagondeka pa zvese paaishanda mu nyumba ya Mwari, inga ucapupu wo zviro zvaizobhuiwa,
6 asi Kristu wainga wakagondeka inga mwana wo pa nyumba ya Mwari. Itusu ndisu nyumba yake, kudari tikabatisisadi rusujunuko hwedu hwokuvereketa no vetero yatinojikuja ndiyona mbhera kumagumo.
7 Ngo kudaro, inga zvinonanga mujimu mucena kuti: “Kudari mukazwa izwi rake nyamasi,
8 mucatindivarisa mwoyo yenyu, inga pandakanyangajwa maningi pa njiku yo muejo muzvipare,
9 majicekuru enyu paaindiphikiza ecindieja, pikija ainga avona mabasa angu pa makumarongomuna o makore.
10 Ndizvona zvakandiitisa kuti ndinyangajwe ngo mubarihwana uwu, ndonanga kuti: ‘Ivona vanopauka mu mwoyo mavo mukuvo wese, avazivi kuziva makwanja angu.’
11 Ngo kudaro, ndakanyangajwa ndopika kuti: ‘Avazonghwini mu ndau yangu yandakanasirira kuti vazorore.’”
12 Bhasopanyi hama jangu kuti patame kuwanika umwe wenyu anova no mwoyo wakashata, wokutama rutendo, woreya kuvha kuna Mwari anopona.
13 Garanyi mecivangisana ngo cenyu njiku ngo njiku, paticanangari kuti “Nyamasi,” kuti patame kuwanika umwe wenyu anonyiswa ngo simba ro cishaishi.
14 Ngokuti itusu tinozovadi takabatana na Kristu, kudari tikabatisisa kuthemba kwatainga nako pakutanga mbhera kumagumo.
15 Inga zvinonangwa kuti: “Kudari mukazwa izwi rake nyamasi, mucatindivarisa mwoyo yenyu, inga pandakanyagajwa maningi.”
16 Mbhaani vakazwa vonyangajisa maningi Mwari? Asipi vese vakabuda mu Ejipita vecitungamirihwa ndi Mosi?
17 Kusiyapo izvo, ndiyani wakanyangajisa Mwari pa makumarongomuna o makore? Asipi vaya vakashaisha, vofira muzvipare?
18 Mbhaani vaakapikira kuti avazonghwini mu ndau yaakanasirira kuti vazorore? Asipi vaya vakapandukiraya?
19 Ngo kudaro, tinovona kuti avazivi kunghwina ngokuti avazivi kuva no rutendo.
