Vahebheru 4:1-16
4 Ngo kudaro, zvecivoneka kuti pacino cigondiso cimweni co kunghwina mu zororo rake, ngatingwarire kuti pacadowanika umwe wenyu acikafaneri.
2 Asi masoko atakaziviswari, ivona vakamaziviswavo; asi soko ravakazwa arizivi kuvabesera, ngokuti ivona avazivi kubatana pa rutendo na vaya vakazwa.
3 Itusu tinotendari tinonghwina mu zororo inga zvaakananga kuti: “Ngo kudaro, ndakanyangajwa ndopika kuti: ‘Avazonghwini mu ndau yangu yandakanasirira kuti vazorore,’” pikija mabasa ake ainga akapera kuvhira pa kusikwa ko nyika.
4 Ngokuti iyena wakambonanga ngo pamusoro po njiku yocinomwe eciti: “Mwari wakazorora pa njiku yocinomwe pa mabasa ake ese,”
5 wakanangazve kuti: “Avazonghwini mu ndau yangu yandakanasirira kuti vazorore.”
6 Vandhu vaya vakatanga kucumaihwa masoko akanaka avazivi kunghwina mu ndau iyi, ngokuti avazivi kuzwira. Asi zvinokwanisika kuti vamweni vanghwinemo.
7 Ndizvona zvinoitisa kuti Mwari anange mu nduyo ya Dhavhidhi, inga zvinonangwa mu karata iyi kuti: “Nyamasi kudari mukazwa izwi rake, mucatindivarisa mwoyo yenyu.” Ngo kudaro, iyena wakagaja njiku inodanijwa kuti: “Nyamasi.” Mwari wainga akazvinanga kare, sure ko makore akawanda.
8 Ngokuti kudari Joshuwa naakavaendesa ku ndau imweni yo kuzororera, Mwari aacaizonangepi ngo pamusoro po njiku imweni.
9 Ngo kudaro, vandhu va Mwari vaciri naro Sabudu ro kuzorora.
10 Ngokuti mundhu anonghwina pa ndau yakanasirihwa ndi Mwari kuti azorore, anozororavo pa mabasa ake, ngokuti Mwari wakazororavo pa mabasa ake.
11 Ngo kudaro, ngativangisire kuti tinghwine mu ndau yo kuzorora yakanasirihwa ndi Mwari, kuti titame kuwira mu mukhaindi wondhowo wo kutama kuzwira.
12 Ngokuti soko ra Mwari arifi,* rino simba maningi, rakapinja* kupinda banga rino mativi maviri, rinobaya mbhera mukati mo mundhu, rovonesa zviri mukati make no kunja. Rinonghwina mbhera panoparajana maphondo no mwongo. Irona rinokwanisa kuvonesa zviri mu murangariro mo mundhu no zviri mumwoyo make.
13 Apana cisikwa cicikavoneki ndi Mwari, zviro zvese zviri pambhene zvonasa kuvoneka ndiyena, wiya watinozodavira pamberi pake.
14 Zvecivoneka kuti tino mupiri mukuru anopinda vese, wiya wakaenda kudenga, Jesu Mwana wa Mwari, ngatienderere mberi tecimuzivisa pambhene.
15 Itusu tino mupiri anokwanisa kuzwisisa kuremba kwedu, iyena wakaejwa mu mativi ese inga ndisu, asi iyena aana cishaishi.
16 Ngo kudaro, ngatikhwedere pamberi po cigaro co umambo hwo unyasha hucikaezaniswi tino rusujunuko hwo kuvereketa, kuti tiitihwe usizi, towana unyasha hucikaezaniswi kuti hutibesere pa nguva kwayo.
