Vakorose 2:1-23
2 Ndinoda kuti muzive makurire o hondo yandiri kuhwa ngo pamusoro penyu no pamusoro po vari ku Raodhiseya na vaya vacito vandivona kamare.*
2 Cinangwa cangu ngo cokuti mwoyo javo jinyarajwe, kuti ivona vave vakabatana mu rudo, vova no upfumi hwese hwo muviyo wo kuthemba kwakakwana ko kuzwisisa kwavo, kuti vawane zivo yakarungama yo cakafisika ca Mwari, cakafisika ici ndi Kristu.
3 Upfumi hwese hwo ungwaru no uzivi, hwakavigwa mwaari.
4 Ndinomuvhunja izvi kuti kucadowanika mundhu anomucengeja ngo masoko anokhohwesa.
5 Pikija ndiciripi na imwimwi, ndina imwimwi ngo kumujimu, ndecidakara ngo kuvona kunasa kurongeka kwamakaita no kuvanga kwenyu pa kutenda Kristu.
6 Ngo kudaro, inga zvamakatenda Kristu Jesu, Mambo, rambanyi mecifamba makabatana naye,
7 mecicira muji, mecivangiswa no kucijikira pa rutendo, inga zvamakajijiswa, mecienderera mberi pa kubonga Mwari mukuvo wese.
8 Bhasopanyi kuti pacadowanika mundhu anomuitisa uranda ecishandisa ungwaru hwo nyika no kucengeja kwabiresi mukuzwirana no zvirovejeso zvo vandhu no zviro zvo nyika, zvicikazwirani no jijiso ya Kristu;
9 ngokuti mugariro jese ja Mwari jakakwana muna Kristu.
10 Kuvhira kwaari, imwimwi amuna camunotama. Iyena ndiyena musoro wo umambo hwese no vano masimba.
11 Ngo ushamwari hwenyu naye, imwimwi amuzivi kusokwa* ngo nyara jo vandhu asi makasokwa* ngo kuvhura muviri wo kunyama, ngokuti vashandiri va Kristu vanosokwa* ngo njira yondhoyo.
12 Ngokuti makavigwa pamwepo na iyena ngo rubhabhatijo hwake. Ngo ushamwari hwamunahwo, imwimwi makamuswavo pamwepo ngo rutendo hwenyu mukushanda ka Mwari, wakamumusa kuvha mu kufa.
13 Cimwenizve, pikija mainga makafa muzvishaishi zvenyu no mukutama kusokwa ko nyama yenyu, Mwari wakamuponesa pamwepo naye. Iyena wakatiregerera ngo mwoyo wese kuposa kwedu kwese
14 wopfujura mutemo wese wainga wakatahwa waihwisana na itusu. Iyena wakauvhisa ngo kuukhohomera pa mutanda wokutambujikira.*
15 Iyena wakanyisa majimambo no vano masimba, wovatatija pamberi po vandhu vese, ecivonesa kuti wavanyisa no kuvaseseja inga vasungwi.
16 Ngo kudaro, mucatendera kuti ariwese amutonge ngo ndava yo zvamunoha no kumwa, kana ngo ndava yo mutambo jinoitwa pa gore, kuceukijwa ko mweji mupsa no kuceukijwa ko sabudu.
17 Zviro izvi zvinokhombija* zviro zvinozoviya, asi cokwadi kamare cina Kristu.
18 Apadikani kuwanika mundhu anomuruzisa mupfupo wenyu, ngo kuda kujidodokesa kokunyepejera no manamatire anoithwa ngo ngirozi, “mundhu wakadaro anovangirira” pa zviro zvaakavona. Zvokadi murangariro wake wo kunyama unozara ngo kujikuja kucikashandi ciro,
19 iyena aabatisisi musoro, wiya anopa zvinodiwa ku muviri wese, woita kuti mativi ese ave akabatana pamwepo. Ecimushandisa, Mwari anoita kuti muviri ukure.
20 Kudari imwimwi makafa pamwepo na Kristu ngo ndava yo zviro zvo nyika, ngenyi muri kuraramazve inga muciri kuita divi ro nyika, mecijidira pasi po mutemo inoti:
21 “Ucabata, ucaravira, ucapsasa,”
22 ngo pamusoro po zviro zvokuti zvikashandiswa zvinopera, mukuzwirana no mutemo no jijiso jo vandhu?
23 Zviro izvi zvinovoneka inga zvo ungwaru. Asi vaya vanozviita vanojisanira manamatire avanoda. Ivona vanotambuja muviri wavo ngokuti vanoda kuvoniwa ngo vandhu kuti vanojidodokesa. Asi zviro izvi, azvina mutengo pa kuhwisana no zvido zvo nyama.
Masoko o Pasi
^ Gama ngo Gama: “vacito vavona kara yangu yo kunyama.”
^ Kana: “kucekwa suna.”
^ Kana: “makacekwa suna.”
^ Kana: “vanocekwa suna.”
^ Vonanyi Kudurujihwa ko Magama.
^ Gama ngo Gama: “munvuriri wo.”
