Vakorose 3:1-25
3 Asi, kudari imwimwi makamuswa pamwepo na Kristu, endereranyi mberi mecipsaka zviro zvo kudenga, kwaakagara Kristu ku mukono muho wa Mwari.
2 Endereranyi mberi mecirangarira zviro zvo kudenga, kuciripi zviro zvo pasi pano.
3 Ngokuti imwimwi makafa, upenyu hwenyu hwakavigwa pamwepo na Kristu mukubatana na Mwari.
4 Paanozokhombijwa pambhene Kristu, wiya anopa upenyu, imwimwi munozokhombijwavo pambhene pamwepo naye mu nduma yake.
5 Ngo kudaro, urayanyi mativi o muviri wenyu ari pasi pano ngo pamusoro po uhure,* kutama kucena, kuva no cido co vatano mbhera pa kutama kujibata, zvido zvinokhuvaza no kudisisa zviro zvakawanda. Kudisisa zviro zvakawanda uku ndikona kunamata zvithombi.
6 Ushungu hwa Mwari hunoviya ngo pamusoro po zviro izvi.
7 Mufambiro wenyu wainga wakadarovo mu upenyu hwenyu hwokare.
8 Asi wari imwimwi munodikana kugara ndhambo no ushungu, kunyangajwa, ushati; pamuromo penyu apadikani kuzika masoko o kutuka no kuvereketa zvinopseruja.
9 Mucanyeperana ngocenyu. Vhuranyi undhu hwokare no maitiro aho,
10 perapo simiranyi undhu hupsa, huri kuithwa hupsa ngo zivo yakarungama mukuzwirana no muezaniso wa Wiya wakahusika,
11 pa mugariro uwu akuna Mugiriki nee Mujudha, wakasokwa* nee acizivi kusokwa,* munyikanja, Musitiya, muranda kana mundhu wakasununguka; asi Kristu ndiyena zviro zvese, mu vese.
12 Ngo ndava yazvo, inga vasanwi va Mwari, vakacena no vanodiwa, tatijirananyi* pena no rudo, unyasha, kujidodokesa, kupfava no kusengerera.
13 Endereranyi mberi mecicungirirana ngocenyu no kuregererana ngo mwoyo wese pikija aripo wamukhugunya ngo ciro ciri cese. Inga zvamakaregerehwa ngo mwoyo wese ndi Jehovha,* imwimwi munodikana kuitavo zvondhozvo.
14 Asi kupinda zvese izvi, simiranyi rudo, ngokuti ndihwona cisungo cakakwana co rubatano.
15 Cimwenizve, runyararo hwa Kristu ngahutonge mu mwoyo menyu, ngokuti makadanijihwa runyararo hwondhohwo mu muviri umwe. Ivanyi vandhu vanobonga.
16 Soko ra Kristu ngarinase kugara mukati menyu no ungwaru hwese. Endereranyi mberi mecijijisana no kuvangisana ngocenyu ngo nduyo, kusimba Mwari, kuimba ndumbo jo kunamata ngo kubonga. Endereranyi mberi meciimbira Jehovha* mu mwoyo mwenyu.
17 Zviri zvese zvamunoita ngo masoko kana ngo zviito, itanyi zvese ngo zina ra Mambo Jesu, mecibonga Mwari Baba ndiyena.
18 Imwimwi vakaji, jidirenyi pasi po majimwamuna enyu, inga zvinofanera kuithwa ngo vateveri va Mambo.
19 Imwimwi majimwamuna, endereranyi mberi mecida vakaji venyu, mucavacamwira.
20 Imwimwi vana, zwiranyi vabari venyu mu zvese, ngokuti ndizvona zvinodakajisa Mambo.
21 Imwimwi majibaba, mucacamwisa vana venyu kuti vatame kuvora mwoyo.*
22 Imwimwi varanda, zwiranyi majipatarau enyu mu zvese, kuciripi basi pamunonga mecivoniwa, kuti mudakajise vandhu,* asi zviitenyi ngo mwoyo wese no kuthya Jehovha.*
23 Zviri zvese zvamunoita zviitenyi ngo mwoyo wese, inga muri kuzviitira Jehovha,* kuciripi mundhu,
24 ngokuti munozviziva kuti ndi Jehovha* anozomupa utaka inga mupfupo. Ivanyi varanda va Kristu, Mambo wenyu.
25 Wiya anoita zvakashata anozohwirijihwa ngo zvakashata zvaakaita, ngokuti Mwari aakheti.
Masoko o Pasi
^ Mu Cigiriki, por·nei′a. Vonanyi Kudurujihwa ko Magama.
^ Kana: “wakacekwa suna.”
^ Kana: “kucekwa suna.”
^ Kana: “simiranyi.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “vatame kuremba.”
^ Gama ngo Gama: “haiwa kushanda ko ciphameso.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
