Vakorose 4:1-18
4 Imwimwi majipatarau, tajanyi varanda venyu ngo njira yakarurama no yakanaka, meciziva kuti munayevo Mambo wenyu kumatenga.
2 Vangiriranyi meciita mukumbiro, endereranyi mberi makamuka, ivanyi vanobonga.
3 Pa mukuvo wondhowo, tiitirenyivo mukumbiro, kuti Mwari afunungure musuvo kuti tikwanise kucumaira soko ro cakafisika ca Mwari ngo pamusoro pa Kristu, randakasungwari ngo ndava yaro,
4 kuti ndiricumaire pambhene mu njira yandinodikana kuita.
5 Endereranyi mberi mecifamba no ungwaru pamunonga muri pakati po vandhu vo kunja, mecishandisa ushoni nguva yenyu.*
6 Magama enyu ngaave no unyasha mukuvo wese, akarungwa ngo munyu, kuti muzive madavirire amungaita mundhu umwe na umwe.
7 Tikiko, hama yangu inodiwa, mushandiri wakagondeka no muranda doni wangu muna Mambo, anozomuvhunja masoko ese ngo pamusoro pangu.
8 Ndiri kumutumira kwamuri kuti amuzivise kugara kwatakaita no kumutondhoja mwoyo jenyu.
9 Iyena ari kuzeyo na Onezimo, hama yangu yakagondeka no inodiwa, yakavhaya pakati penyu; ivona vanozomuvhunja zviro zvese zviri kuitika kuno.
10 Aristarko, musungwi doni wangu ari kumutambisa. Na Marko ukama* hwa Bharnabha, (womakavhunjwaya kuti mumuashire kudari akagumeyo), ari kumutambisavo,
11 na Jesu anodanijwaya kuti Jhustu, ndivona vaingavo vakasokwa. Ndivona basi vashandi doni vangu ngo pamusoro po Umambo hwa Mwari, ivona vakandinyaraja* maningi.
12 Epafra, muranda wa Kristu Jesu anovha pakati penyu, ari kumutambisa. Iyena aazorori kuita mukumbiro ngo pamusoro penyu, kuti muve makakwana, monasa kuvanga kamare mecikhohwa kuti zvese zvinoda Mwari zvinoitika.
13 Ndinoita ucapupu hwokuti iyena anoshanda ngo simba ngo pamusoro penyu no pamusoro po vari ku Raodhiseya pamwepo no vari ku Hirapori.
14 Ruka, murapi anodiwa, ari kumutambisa, Dhema ari kumutambisavo.
15 Tambisanyi hama jese jiri mu Raodhiseya na hambzaji Ninfa, pamwepo no ungano inoitira musongano pamuzi payo.
16 Karata iyi painopera kuverengwa pakati penyu, itanyi kuti iverengwevo mu ungano yo Varaodhiseya, imwimwi muverengevo inovha Raodhiseya.
17 Cimwenizve, vhunjanyi Arkipo kuti: “Endererai mberi wecishanda ngo simba kuti ukwanise kuita basa rawakapuwa ndi Mambo.”
18 Nga uwu mucungamijo wangu inini Pauro, wandatara ngo nyara jangu. Endereranyi mberi mecirangarira kusungwa kwangu. Unyasha hucikaezaniswi ngahuve na imwimwi.
Masoko o Pasi
^ Gama ngo Gama: “mecitenga nguva yakagajwa.”
^ “mwana wo ukama hwa umwe wo vabari va Bharnabha.”
^ Kana: “vakandivangisa.”
