Varoma 11:1-36
11 Ndinovhunjisa kuti: Kunanga kuti Mwari wakanyenya vandhu vake? Haiwa! Ngokuti ininivo ndiri Muiziraeri, mubarihwana* wa Abhirahama, wo vhumbo ra Bhenjamini.
2 Mwari aazivi kunyenya vandhu vake vaakatanga kuziva. Amuzvizivi here zvinonanga matahwa ngo pamusoro pa Eriya? Iyena wakadeketera kuna Mwari ecitatija kuti wakanyangajwa ngo pamusoro po Vaiziraeri, eciti:
3 “Jehovha,* ivona vakauraya vaporofeti venyu, vakaphwanya artari jenyu. Inini ndasara ndega. Ivona wari, vari kupsaka kundiuraya.”
4 Mwari wakamuvhunjenyi? “Ndicino zviuru zvinomwe* zvo vandhu zviciripi kugwadamira Bhaari.”
5 Ngo maitiro ondhowo, pa mukuvo uno varipo vakasara mu kuzwirana no kusanwa ngo unyasha hucikaezaniswi.
6 Kudari vakasanwa ngo unyasha hucikaezaniswi, kuciripi kusanwa ngo mabasa, unyasha hucikaezaniswi ahucaizovepi unyasha hucikaezaniswi.
7 Waro toti kudini? Ciro caipswakwa maningi ngo Vaiziraeri, avazivi kuciwana, asi cakawaniwa ngo vakasanwa. Vamweni vese vakava vandhu vakaoma mwoyo,
8 inga zvakatahwa kuti: “Mwari wakaita kuti vabathwe ngo hope huru, wovapa majiso acikavoni no njeve jicikazwi mbhera na nyamasi.”
9 Dhavhidhi wakanangavo kuti: “Meza yavo ngaiite murau, ngodha, buwe rinokhugunya no kuvapangira.
10 Majiso avo ngaave no cidima kuti vatame kuvona. Musana yavo ngaigare yakakotama.”
11 Waro ndinovhunjisa kuti: Ivona vakakhugunyika mbhera pa kuwa kamare? Haiwa, andizvopi! Asi ngo ndava yo kushaisha kwavo, ruponeso hunozoenda ku vandhu vo majinja kuti ivona vave no ushanje.
12 Waro kudari kushaisha kwavo kwecireva upfumi ku nyika no kuderejwa kwavo kwecireva upfumi ku vandhu vo majinja, kuwanda kwakadini ko upfumi hwavanozowana varipo vese mutengo wavo?
13 Ndiri kuvhunja imwimwi makavhari ku vandhu vo majinja. Inini ndinoreremeja basa rangu ngokuti ndiri mupostori wo majinja,
14 kuti ndimuse ushanje hwo vandhu vangu, ndoponesa vamweni vavo.
15 Kudari kunyenywa kwavo kwecireva kuviiranisa nyika na Mwari, kuashihwa kwavo kunozorevenyi kunja ko kuwana upenyu kuvha mu rufu?
16 Cimwenizve, kudari dimbu ro kutanga ro pau riri kuithwa mupiro rikava rakacena, pauyo yese yakacenavo; kudari muji jikava jakanaka, matavi ese akanakavo.
17 Asi, kudari matavi amweni akatemwa, pikija iwewe uri muorivhe wo musora, iwewe wakarungutijwa pakati pavo, wovavo divi ro matavi o muji jo muorivhe.
18 Ucadojikuja pamberi po matavi. Kudari ukajikuja kwaari, zivai kuti andiwepi unothwara muji, asi muji ndiwona unokuthwara.
19 Iwewe unozoti: “Matavi amweni akatemwa kuti inini ndirungatijwe.”
20 Ndizvonadi! Iwona akatemwa ngo kutama kwawo rutendo, asi iwewe wakaima ngo ndava yo rutendo. Ucajikuja, asi ivai mundhu anothya.
21 Ngokuti Mwari aazivi kusiya matavi o kubahwa nawo. Ngo kudaro, na iwewevo aazokusiivo.
22 Rangariranyi ngo pamusoro po unyasha hwa Mwari no ushungu hwake. Iyena anoitira ushungu ku vandhu vakawa, asi Mwari anokuitira unyasha hwake, kudari ukaramba uri mu unyasha hwake; ukatama kudaro iwewe unozotemwa.
23 Na ivonavo, kudari vakaenderera mberi vano rutendo, Mwari anozovarungutijazve.*
24 Kudari iwewe wakatemwa pa muorivhe wo musora worungutijwa pa muorivhe wo mu munda, wakasiyana no wo musora, matavi o muorivhe wo musora angatama kurungutijwa kwaakavha?
25 Ngokuti inini hama, andidi kuti mutame kuziva cakafisika ca Mwari, kuti mutame kujivona inga makangwara: Vaiziraeri vamweni vakaomesa mwoyo yavo, mbhera vandhu vese vomajinja vanghwine,
26 kuti Vaiziraeri vese vazoponeswe. Inga zvakatahwa kuti: “Muponesi anozovha mu Ziyoni, wovhisa zviito zvakashata kuna Jakobe.
27 Ici ndicona citenderano cangu candinoita na ivona pasure po kuvavhisa mu zvishaishi zvavo.”
28 Ndizvona kuti, ngo pamusoro po masoko akanaka, ivona ndivona vavengi va Mwari. Asi ngo pamusoro po kusana kwakaita Mwari ivona vanodiwa ngo ndava yo majicekuru avo.
29 Mwari aajidembi* ngo zvipo zvaanonga apa vandhu no kuvadanija kwaanonga avaita.
30 Zvecivoneka kuti imwimwi amucaizwirepi Mwari, asi wari maitihwa unyasha ngo ndava yo kutama kuzwira kwavo.
31 Ivonavo avazivi kuzwira, zvomuita kuti imwimwi muitihwe unyasha kuti ivona vaitihwevo unyasha.
32 Ngokuti Mwari wakaita kuti vese vave varanda vo kutama kuzwira, kuti vese vaitihwe unyasha.
33 Kujika kwakadini ko pfuma ya Mwari, kungwara kwake no uzivi hwake! Matongero ake aapoporeki no makwanja ake aangwiniki.
34 “Ndiyani wakaziva murangariro wa Jehovha* kana kuti ndiyani wakava mupangiri wake?”
35 “Ndiyani wakamupekeja ciro cokuti Mwari waidikana kumuhwirijira?”
36 Ngokuti zviro zvese zvinovha kwaari, zvakaithwa ndiyena, zvese ngo zvake. Iyena ngaakujwe mbhera narini. Ameni.
Masoko o Pasi
^ Gama ngo Gama: “mbeu.”
^ Vonanyi Kudurujihwa ko Magama.
^ 7.000.
^ Kana: “kunamikija.”
^ Kana: “aazvivazi.”
^ Vonanyi Kudurujihwa ko Magama.
