Varoma 14:1-23
14 Ashiranyi mundhu wakaremba mu rutendo, asi mucamutonga ngo pamusoro po mavonero akasiyana aanoita zviro.
2 Mundhu umweni ano rutendo hwo kuha zvese, asi mundhu wakaremba anoha murivo* wo masakani basi.
3 Mundhu anoha aadikani kushora mundhu acikahi, wiya acikahi aadikani kutonga mundhu anoha, ngokuti Mwari wakamuashira.
4 Ndiwe ani iwewe kuti utonge mushandi wo umweni? Kuima kwake no kuwa kwake, zvina patarau wake. Iyena anozoima ngokuti Jehovha* ndiyena anokwanisa kumuimisa.
5 Mundhu umweni angavona njiku imwe inga inosisira kupinda imweni; umweni ecivona njiku jese inga jakaezana. Mundhu umwe nga umwe ngaave no cokwadi cokuti zvaanotenda ngo zvokadi.
6 Mundhu anoreremeja njiku, ngaaireremeje eciitira Jehovha.* Cimwenizve, mundhu anoha ngaahe eciitira Jehovha ngokuti ari kubonga Mwari. Mundhu acingahi ngaatame kuha eciitira Jehovha, ngokuti ari kubonga Mwari.
7 Akuna na umwe wedu anojiraramira pa cake, akunazve mundhu anojifira pacake.
8 Kudari tecirarama* tinoraramira* Jehovha,* kudari tikafa tinofira Jehovha.* Ngo kudaro, kudari tikararama* kana tikafa, tiri vandhu va Jehovha.*
9 Ngokuti Kristu wakafira zviro zvondhozvo wovazve ecirarama,* kuti ave Mambo wo vakafa no vari penye.
10 Waro ngenyi uri kutonga hama yako? Ngenyi unoshora hama yako? Ngokuti tese tinozoenda pamberi po cigaro co kutonga ca Mwari.
11 Ngokuti zvakatahwa kuti: “Jehovha* wakananga kuti: ‘Ndinopika ngo upenyu hwangu kuti makokovhi ese anozondigwadamira. Vandhu vese vanozonasa kuziva Mwari.’”
12 Ngo kudaro, umwe na umwe wedu anozojidavirira ega kuna Mwari.
13 Waro atidikani kutongana ngo cedu. Kusiyapo izvo, ngative takasunga kuti titame kudira buwe rinokhugunya kana ciro cinophingaija hama yedu.
14 Ndinoziva kuti ndinocokwadi mu zina ra Mambo Jesu kuti akuna ciro cakasvipiswa. Asi cinova cakasvipiswa kudari mundhu akacivona inga cakasvipiswa.
15 Kudari hama yako yecikhugunyika ngo zvokuha, iwewe auripi kufamba mukuzwirana no rudo. Ucauraya mundhu wakafihwa ndi Kristu ngo ndava yo zvokuha.
16 Ngo kudaro, mucaita kuti zvakanaka zvamunoita zvibhuiwe inga zviro zvakashata.
17 Ngokuti Umambo hwa Mwari ahurevi kuha no kumwa, asi unoreva ururami, runyararo no mudakaro unoviiswa ngo mujimu mucena.
18 Mundhu wese anoshandira Kristu ngo njira yakadari, anodakajisa Mwari, wodakarihwa ngo vandhu.
19 Ngo kudaro, psakanyi zviro zvinoviisa runyararo no zviro zvinovangisana.
20 Regeranyi kuparaja basa ra Mwari ngo ndava yo zvokuha. Ndizvona kuti zviro zvese zvakacena, asi zvinoshata kudari mundhu akazviha perapo zvokhugunya umweni.
21 Zviri nane kutama kuha nyama no kumwa vhinyu kana kutama kuita ciri cese haco cinokhugunya hama yako.
22 Rutendo hwaunahwo waro, garai unahwo pamberi pa Mwari. Anodakara mundhu wiya acikajitongi ega ngo pamusoro po zviro zvaanovona kuti zvakanaka.
23 Asi kudari mundhu akaha ciri cese perepo wokana-kana anonga ecishaisha. Ngokuti iyena waha acito anasa kuziva kuti zvinotendehwa kana kuti haiwa.* Zviro zvese zvicikacijikiri pa rutendo, zvinoita cishaishi.
Masoko o Pasi
^ usavi.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “tecipona.”
^ Kana: “tinoponera.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “tikapona.”
^ Vonanyi Kudurujihwa ko Magama.
^ Kana: “ecipona.”
^ Vonanyi Kudurujihwa ko Magama.
^ Kana: “iyena waha acina rutendo.”
