Varoma 5:1-21
5 Ngo kudaro, itusu tiri kunangwari kuti tiri varurami ngo ndava yo rutendo, ngative no runyararo na Mwari ngo ndava ya Mambo Jesu Kristu.
2 Kutenda kwedu Jesu kunotiitisa kuti tikhwedere kuna Mwari kuti atiitire unyasha hucikaezaniswi. Itusu tinodakara ngo ndava yo vetero yo kuashira rukujo hunovha kuna Mwari.
3 Atidakari nga izvi basi, asi ngatidakarezve pa tinotambujika ngokuti kutambujika kunotiita kuti ticungirire;
4 kucungirira kunotiita kuti titendehwe ndi Mwari; kutendehwa kondhoko kunotiita kuti tive no vetero,
5 vetero aitiiti kuti ticamwe; ngokuti rudo hwa Mwari hwakadururihwa mu mwoyo mwedu ngo mujimu mucena watakapuwa.
6 Ngo kudaro, patainga ticina simba, Kristu wakafira vandhu vakashata panguva yakagajwa.
7 Ngokuti zvinonesa kuti mundhu afire mururami, pikija angatojipira hake kuti afire mundhu anoita zvakanaka.
8 Asi Mwari wakatatija rudo hwake kwatiri ngokuti patainga vashaishi, Kristu wakatifira.
9 Zvecivoneka kuti wari tiri kuvoneka inga varurami ngo ngazi yake, tino cokwadi cokuti ticazoponeswa pa ushungu hwa Mwari.
10 Patainga vavengi vake, takaviiraniswa na Mwari ngo ndava yo rufu hwo Mwana wake. Wari tino cokwadi cese cokuti tinozoponeswa ngo ndava yo upenyu hwake ngokuti taashamwari ja Mwari.
11 Andizvopi zvega, zvakatiitira Mwari ecishandisa Mambo Jesu Kristu, zvinotiita kuti tidakare. Ngokuti ngo ndava yake, takakwanisa kuviirana na Mwari.
12 Ngokuti cishaishi cakanghwina mu nyika ngo ndava yo mundhu umwe basi, rufu hwonghwinavo ngo ndava yo cishaishi. Ngo maitiro ondhowo, rufu hwakagumira vandhu vese ngokuti vese vakashaisha . . .
13 Cishaishi cainga cirimo mu nyika Mutemo ucito wavepo, asi pacina mutemo apana mundhu anotongwa ngo pamusoro po cishaishi cake.
14 Pikija zvakadaro, rufu hwakatonga inga mambo kuvhira ka Adhamu mbhera ka Mosi, pikija ku vaya vacizivi kuita cishaishi cakaezana no cakaithwa ndi Adhamu; wainga akaezana na wiya waizoviya.
15 Asi cipo ici acizivi kuezana no kuposa. Vandhu vazinji vakafa ngo kuposa ko mundhu umwe basi. Mukufananavo, unyasha hucikaezaniswi hwa Mwari no cipo cake co mwoyo wese ngo unyasha hucikaezaniswi hwakatatijwa ngo mundhu umwe basi, Jesu Kristu, cipo ici cinozobeseravo vandhu vakawanda.
16 Cipo ici aciezani no ushaishi hwakaitwa ngo mundhu umwe basi. Ngokuti kuposa ko mundhu umwe basi, kwakaviisa ndava ku vandhu vese. Vandhu vazinji pavakapera kuposa, Mwari wakapa cipo co mwoyo wese cakaita kuti vavoniwe inga varurami.
17 Asi kudari rufu hwakatonga inga mambo ngo pamusoro po kuposa ko mundhu umwe basi, asi vaya vakaashira unyasha hucikaezaniswi no cipo co mwoyo wese co ururami, vanozopona vecitonga inga majimambo ngo pamusoro po mundhu umwe basi, Jesu Kristu.
18 Asi kudari ngo kuposa ko mundhu umwe basi, vandhu vese vakazwi vashaishi, ngo maitiro ondhowo, ngo ciito cimwe co ururami, vandhu vese vanozozwi varurami kuti vawane upenyu.
19 Ngo kutama kuzwira ko mundhu umwe basi, vandhu vese vakazwi vashaishi, ngo maitiro ondhowo, ngo kuzwira ko mundhu umwe basi, vandhu vese vanozozwi vakarurama.
20 Mutemo wakaviya kowanja kuposa. Cishaishi pacinonga cecikura, unyasha hucikaezaniswi hunokuravo maningi.
21 Cinangwa cakona ngocapi? Kuti kudari ngo maitiro o hwakatonga rufu inga mambo, unyasha hucikaezaniswi huzotongevo inga mambo ngo ururami hwecitiendesa ku upenyu hucikaperi ngo pamusoro pa Jesu Kristu Mambo wedu.
