Varoma 6:1-23
6 Waro tonangenyi? Toenderera mberi tiri mu ushaishi kuti tigare teciitihwa unyasha hucikaezaniswi here?
2 Haiwa, andizvopi! Zvecivoneka kuti takafa mu ushaishi, tingaitisazve kudini kuti tigare tiri mu ushaishi?
3 Amuzvizivi kuti vese vakabhabhatijwa muna Kristu Jesu, vakabhabhatijwa mu rufu hwake?
4 Itusu takavigwa pamwepo naye ngo pamusoro po kubhabhatijwa mu rufu hwake. Inga zvaakamuswa Kristu ngo simba no rukujo hwa Baba wake, itusuvo tinozoponavo mu upenyu hupsa.
5 Zvecivoneka kuti itusu takabatana naye mu njira yo kuti itusu tinofa inga zvaakaita, ngo njira yondhoyo itusu tinozomuswavo ngo njira yaakamuswa ndiyona.
6 Ngokuti itusu tinozviziva kuti undhu hwedu hwokare hwakakohomehwa pa mutanda pamwepo na iyena, kuti muviri wedu wo cishaishi utame simba. Tikadaro, atizovi varanda vo cishaishi.
7 Ngokuti mundhu wese anonga afa wapera kusujunuhwa* mu cishaishi cake.
8 Kusiyapo izvo, kudari tikafa na Kristu, tinotenda kuti tinozoraramavo* na iyena.
9 Ngokuti tinoziva kuti iyena wari wamuswa mu kufa. Kristu aacafizve, rufu ahucina simba kwaari.
10 Mukhaindi wo rufu hwakamuuraya, hwainga hwo kuvhisa cishaishi kuti atame kuzofazve. Asi mukhaindi wo upenyu hwaanahwo wari, ngo hwokuti aite kuda ka Mwari.
11 Na imwimwivo, jivonenyi inga makafa mu rufu, mecirarama* kuti muite kuda ka Mwari ngo ndava ya Kristu, Jesu.
12 Ngo kudaro, mucaregera kuti cishaishi cigare cecimutonga inga mambo mu muviri yenyu inofa, kuti muteveje kuda kwawo.
13 Mucadopira muviri wenyu ku ushaishi inga zvijito zvicizivi kururama, asi jipirenyi kuna Mwari inga vandhu vanovha mu rufu kwenda mu upenyu. Cimwenizve, piranyi muviri yenyu kuna Mwari inga zvijito zvo ururami.
14 Ngokuti cishaishi acidikani kumutonga ngokuti amuripi pasi po mutemo asi muri kutungamirihwa ngo unyasha hucikaezaniswi.
15 Waro toti kudini? Toita cishaishi ngo kuti atiripi pasi po mutemo asi tiri kutungamirihwa ngo unyasha hucikaezaniswi? Haiwa, andizvopi!
16 Amuzvizivi kani? Kudari mukajipira ku mundhu ari wese inga muranda, imwimwi muri varanda vake ngokuti munomuzwira. Asi kudari muri varanda vo cishaishi, icona cinozomuuraisa. Kudari muri varanda va Mwari mecimuzwira, munozova vandhu vanoita zvakarurama.
17 Tinobonga Mwari ngokuti pikija mainga varanda vo ushaishi, wari muri kuzwira ngo mwoyo wese kujijiswa kwamakaithwa.
18 Ndizvona! Zvecivoneka kuti makasujunuhwa ku ushaishi, makava varanda vo ururami.
19 Ngo pamusoro po kutama kukwana kwenyu, ndiri kuvereketa magama anozivika ngo vandhu vo kunyama. Ngokuti imwimwi makajipira inga varanda vo kuita zviro zvicizivi kucena no zvicikatendehwi ngo mutemo, zvinomuitisa kuti mutame kuzwira mutemo. Wari jipirenyi inga varanda vo ururami hunotiitisa kuti tive no upenyu hwokujipira kuna Mwari.
20 Pamainga varanda vo ushaishi, amucaidikanepi kuita zvakarurama.
21 Pa nguva yondhoyo, ngowapi wakava muviyo wo mufambiro wenyu? Makaita zviro zviri kumupseruja mbhera wari uno. Zviro zvondhozvo, zvinozomuuraisa.
22 Ngo kudaro, zvecivoneka kuti masujunuhwa mu cishaishi, itanyi zvakanaka inga varanda va Mwari. Muviyo wokuita kudaro, unozova wo upenyu hucikaperi.
23 Ngokuti mupocero wo cishaishi irufu, asi cipo cinovha ka Mwari, ndihwona upenyu hucikaperi ecishandisa Jesu Kristu Mambo wedu.
