Varoma 7:1-25
7 Ndiri kubhuya na imwimwi, vandhu vanoziva mutemo: Hama, imwimwi amuzvizivi, kuti Mutemo unotonga mundhu paanonga ari penye?
2 Inga muezaniso, Mwanakaji wakarovohwa wakasungwa ngo mutemo wo mwamunake paanonga ari penye; asi kudari mwamunake akafa, iyena wasujunuka pa mutemo wo mwamunake.
3 Ngokuti kudari akarovohwa ngo mwanarume umweni mwamunake paanonga ari penye, iyena ari kuita upombo. Asi kudari mwamunake akafa, iyena wasujunuka pa mutemo jo mwamunake. Ngo kudaro, akambhera ngo kurovohwa ngo mwanarume umweni aaripi kuita upombo.
4 Waro hama jangu, imwimwi makafira Mutemo ngo pamusoro po muviri wa Kristu. Ngo kudaro, imwimwi maa vandhu vo mundhu umweni, wiya wakamuswa ku vakafa. Ngo njira iyi, itusu tinobara mucero yakanaka inokuja Mwari.
5 Patairarama* mukuzwirana no cibarihwe cedu co kuita zvakashata, Mutemo waimusa zvido zvo kuita zvakashata mu muviri jedu. Zvido izvi zvaizotiurayisa.
6 Asi wari tasujunuhwa ku mutemo ngokuti aucatiphingizve. Ngokuti tokwanisa kuva varanda va Mwari ngo njira imbza, kuciripi ngo Mutemo inga kare.
7 Waro tonangenyi? Mutemo ungaita cishaishi kani? Haiwa, auiti! Kudari no kwainga kucina Mutemo, andicaizozivepi cishaishi. Inga muezaniso, inini andicaizoziva kuemura, kudari Mutemo noucizivi kunanga kuti: “Ucaemura.”
8 Asi cishaishi pacakapuwa mukana ngo mupango, icona cakandiita kuti ndiyemure zviro zvese. Cishaishi cainga cakafa ngokuti painga pacina mutemo.
9 Zvokadi, inini ndairarama* ndicina mutemo. Asi pawakabuda mupango, cishaishi cakaponazve, inini ndofa.
10 Mupango wandaivona kuti waida kundiponesa, ndakazovona kuti uri kuda kundiuraisa.
11 Cishaishi pacakawana mukana wacakapuwa ngo mupango, icona cakandicengeja no kundiuraya ngo mupango.
12 Mutemo pacawo wakacena; mupango wakarurama, wakanaka, wocenavo.
13 Kunanga kuti ndauraiswa ngo zviro zvakanaka? Haiwa, andizvopi! Asi cishaishi ndicona cakandiuraya, kuti zvivoneke kuti cishaishi ndicona cinoda kuti ndife ngo kuita zvakanaka. Ngo kudaro, ngo pamusoro po mupango, cishaishi cinova mushaishi mukuru.
14 Tinozviziva kuti Mutemo unovha kuna Mwari ecishandisa mujimu wake, asi inini ndiri mundhu wo kunyama. Ndakatengesehwa ku uranda hwo cishaishi.
15 Andizwisisi zvandiri kuita. Ngokuti andiiti zvandinoda asi ndinoita zvandicikadi.
16 Kudari ndeciita zvandicikadi, ndinodavira kuti Mutemo, wakanaka.
17 Asipi inini ari kuzviita asi cishaishi cinogara mukati mwangu ndicona ciri kuzviita.
18 Ngokuti ndinoziva kuti mukati mwangu, kana kuti, mu nyama yangu, amuna cakanaka; ngokuti ndinoda kuita cakanaka, asi andikwanisi kuciita.
19 Ngokuti andiiti zvakanaka zvandinoda, asi ndinoita zvakashata zvandicikadi.
20 Kudari ndikaita zvandicikadi, andinipi ndiri kuzviitaro, asi zviri kuithwa ngo cishaishi cinogara mukati mwangu.
21 Asi mu muviri mwangu muno mutemo wokuti: Pandinoda kuita zvakanaka, zvakashata zvinotanga kundigumira.
22 Inini ndinodakarira mutemo wa Mwari mukuzwirana no zvadinoda mu mwoyo mwangu,
23 asi ndinovona mutemo umweni mu muviri wangu wecihwisana no mutemo wo murangariro wangu, wondiitisa muranda ku mutemo wo cishaishi uri mu muviri wangu.
24 Ndiri mundhu wo khombo! Ndiyani angazoponesa muviri wangu uri mu rufu hwakadari?
25 Ndinobonga Mwari ndi Jesu Kristu Mambo wedu! Ngo kudaro, ngo murangariro ndiri muranda wo mutemo wa Mwari, asi ngo nyama yangu, ndiri muranda wo mutemo wo cishaishi.
