Zakariya 1:1-21
1 Mu mweji wo cisere wo gore ro cipiri ro kutonga kwa Dhariyo, muporofeti Zakariya* mwana wa Bherekiya mwana wa Idho, wakavhunjwa masoko ndi Jehovha eciti:
2 Jehovha wakanyangajwira maningi majibaba enyu.
3 “Vavhunjei kudari: ‘Izvi ndizvona zvinonanga Jehovha wo hondo, “‘Hwiriranyi kwandiri.’ Izvi ndizvona zvinonanga Jehovha wo hondo, ‘inini ndinozohwirira kwamuri,’ izvi ndizvona zvinonanga Jehovha wo hondo.’”
4 ‘“Mucaita inga majibaba enyu awo akaziviswa ngo vaporofeti vokare veciti: “Izvi ndizvona zvinonanga Jehovha wo hondo, ‘ndapota siyanyi makwanja enyu akashata no zviito zvenyu zvakashata.’”’
“‘Asi ivona avazivi kuzwira nee kuteya njeve kwandiri,’ izvi ndizvona zvinonanga Jehovha.
5 “‘Ari kwapi wari majibaba enyu? Vaporofeti vakazopona mbhera narini here?
6 Ngo kudaro, masoko angu no mutemo yangu yandakavhunja vashandiri vangu vaporofeti, azvizivi kugumira majibaba enyu?’ Ngo kudaro, ivona vakahwirira kwandiri vonanga kudari: ‘Jehovha wo hondo watiitira zviro zvinozwirana no makwanja edu no zviito zvedu inga zvaainga akananga.’”
7 Mu njiku yo makumaviri na murongomuna yo mweji wo cigumi na umwe, zvinoreva mweji wa shibhati* mu gore ro cipiri ro kutonga ka Dhariyo, Jehovha wakavhunja muporofeti Zakariya mwana wa Bherekiya mwana wa Idho kudari:
8 “Ndakava no civoniso co usiku. Ndakavona mwanarume wainga akapakira haci yo kupsuka. Iyena wainga akaima pakati no pakati po muti yo mukute ngo pamuterero. Sure kwake kwainga no haci jokupsuka, jokupsukirikira no jokucena.”
9 Inini ndakavhunjisa kudari: “Mambo wangu, ndiyani ava?”
Ngirozi yainga yecibhuya neni yakandivhunja kudari: “Ndinozokukhombija kuti ndiyani ava.”
10 Mwanarume waingaya wakaima pakati no pakati po muti yo mukute wakandivhunja kudari: “Ava ndivona vatumwa ndi Jehovha kuti vafambe pa nyika.”
11 Ivona vakavhunja ngirozi ya Jehovha yaingaya yakaima pakati no pakati po muti yo mukute veciti: “Tafamba pa nyika, asi tavona kuti nyika yese ino runyararo airipizve kuneseka.”
12 Ngo kudaro, ngirozi ya Jehovha yakati: “Jehovha wo hondo, mbhera rini munozoramba kuitira usizi Jerusarema no madhorobha o Judha, awo amakanyangajwira ko makumanomwe o makore?”
13 Ngo masoko akanaka no anonyaraja, Jehovha wakapingura ngirozi yaibhuyaya na inini.
14 Tevere, ngirozi yaibhuyaya neni yakananga kudari: “Zivisai izvi, Jehovha wo hondo anonanga kudari: “Ndinozojivirira Jerusarema no Ziyoni. Hina, ndinozovajivirira ngo mwoyo wangu wese.
15 Inini ndakanyangajwa. Ndakanyangajwa maningi ngo pamusoro po majinja anojizwa kuti akangwaririka. Ngokuti pandakanyangajwa padoko ivona vakaengejera matambujiko.”’
16 “Ngo kudaro, Jehovha anonanga kudari: “‘Ndinozoitirazve usizi Jerusarema, nyumba yangu inozovakiswazve mondhomo.” Izvi ndizvona zvinonanga Jehovha wo hondo, “bote ro kupima rinozotambanujihwa mu Jerusarema.”’
17 “Zivisanyizve izvi. ‘Jehovha wo hondo anonanga kudari: “Madhorobha angu anozozarazve ngo zviro zvakanaka. Jehovha anozonyarajazve Ziyoni, ozosanazve Jerusarema.”’”
18 Tevere, ndakamusa majiso ndovona nyanga murongomuna.
19 Ndakavhunjisa ngirozi yaibhuya na inini kudari: “Nyanga iji jiri kuimirirenyi?” Iyona yakandidavira kudari: “Nyanga iji, ndijona jakandhandhanisa vandhu vo Judha, vo Iziraeri no vo Jerusarema.”
20 Sure kwazvo, Jehovha wakandikhombija vavezi varongomuna.
21 Inini ndakavhunjisa kudari: “Vavezi ava vari kuviya kuzoitenyi?”
Iyena wakandidavira kudari: “Iji ndijona nyanga jakandhandhanisa Judha zvokuti apana wakakwanisa kumusa musoro. Vavezi ava vari kuviya kuzothyisa kuti vawise nyanga jo majinja jakamukira nyanga javo pakuhwisa no kundhandhanisa vandhu vo nyika yo Judha.”
