Zakariya 11:1-17
11 Funungurai musuvo jako iwewe Rebhanoni,Kuti muriro upise muti jako jo sedhro.
2 Cumbai iwewe muti wo junipa, ngokuti muti wo sedhro wawa;Muti jakakura joseja jawiswa!
Cumbanyi imwimwi muti jo mutondo jo ku Bhashani,Ngokuti gwasha ricikanghwiniki rapejwa.
3 Izwanyi! Vahavisi vari kucumba,Ngokuti kukujwa kwavo kwapejwa.
Izwanyi! Zvimbhondoro zvapejwa,Ngokuti mapani o ku Jordhani apejwa.
4 “Jehovha Mwari wangu anonanga kudari: ‘Havisai mushambi wo mavhuta wakasanwa kuti uuraiwe.
5 Anouraiwa nga vaya vanomatenga, asi ivona vanosara vacina ndava. Vaya vanomatengesa vanonanga kudari: “Ngaakujwe Jehovha ngokuti ndinozokhupuka.” Vahavisi vao avamaitiri pena.’
6 “‘Andizoitiri pena vagari vo nyika ino,’ izvi ndizvona zvinonanga Jehovha. ‘Ndinozoita kuti mundhu wese abzinyirihwe ngo mudoni wake na mambo wake. Ivona vanozophwanya-phwanya nyika iyi. Inini andizovaponesi munyara javo.’”
7 Ndakatanga kuhavisa mushambi wakasanwa kuti uuraiwe, kuti ndibesere imwimwi mushambi uri kutambujika. Ngo kudaro, ndakabata ndonga mbiri. Imwe ndakaidaninja kuti ndonga yo Unyasha, imweni ndakaidaninja kuti ndonga yo Rubatano, ndotanga kuhavisa mushambi.
8 Inini ndakagogomera vahavisi vatatu mukati mo mweji umwe, ngokuti ndainga ndaremba ndivona. Ivonavo vaindinyenya.
9 Inini ndakati: “Andizoendereri mberi ndecimuhavisa. Wiya anoda kufa ngaafe, wiya anoda kupejwa ngaapejwe. Vaya vanozosara, ngavahane.”
10 Ngo kudaro, ndakatora ndonga yangu yaidaninjwa kuti Unyasha ndoigura. Ndophwanya citenderano candainga ndakaita no vandhu vese.
11 Ngo kudaro, citenderano cakaguhwa pa njiku yondhoyo. Mushambi wo mavhuta* wainga wecitambujika waindivona, wakazwisisa kuti aya ainga masoko a Jehovha.
12 Tevere, inini ndakavavhunja kudari: “Kudari zvakanaka kwamuri ndipagarinyi mupocero wangu, asi kudari zvicizivi, mucandipagari. Asi ivona vakandipoceresa makumatatu o mangwenjere o sirivha.
13 Ngo kudaro, Jehovha wakandivhunja kudari: “Torai mareyo uidire mu ndau munovigihwa upfumi mu nyumba yangu; uwu ndiwona mutengo mukuru wawakavona kuti unondifanera.” Tevere ndakatora makumatatu o mangwenjere o sirivha ndomadira mu ndau inovigihwa upfumi mu nyumba ya Jehovha.
14 Kusarepo, ndakagura ndonga yangu yo cipiri ngo pakati, yaidaninjwa kuti ndonga yo Rubatano. Ndopeja ukama uri pakati pa Judha na Iziraeri.
15 Jehovha wakandivhunja kudari: “Torai mujiyo yo muhavisi acikasisiri.
16 Mu nyika ino munozova no muhavisi, iyena aazotaji ushoni mavhuta ari kufa, aazopsaki civhuta, aazorapi mavhuta* akakhuvazika nee azohisi mavhuta akakora. Kunja kwa izvi, iyena anozoha nyama yo mavhuta akakora no kuvhisa masondo* o mavhuta.
17 Nyathwa ku muhavisi wangu acikasisiri, iyena ari kusiya mushambi.
Banga rinozotema mukono wake no jiso rake ro muho.
Mukono wake wese unozovoma,Jiso rake ro mukono wo muho arizovoni.”*
Masoko o Pasi
^ Kana: “magundata.”
^ Kana: “magundata.”
^ Kana: “soka jo.”
^ Gama ngo Gama: “rinozoita bofu.”
