Zakariya 13:1-9
13 “Pa njiku yondhoyo kunozova no mwimbo* kuitira vandhu vo nyumba ya Dhavhidhi no vagari vo Jerusarema, kuti vasuke cishaishi cavo no zviro zvicizivi kucena.
2 “Pa njiku yondhoyo,” Jehovha wo hondo anonanga kudari: “Ndinozopfujura mazina o zvithombe mu nyika ino. Apana anozozvirangarirazve. Ndinozovhisavo vaporofeti no mujimu wakashata mu nyika ino.
3 Kudari mundhu akaporofetazve, babake na make vaya vakamubara vanozomuvhunja kudari: ‘Iwewe auzoendereri mberi wecipona, ngokuti uri kubhuya zvokunyepa ngo zina ra Jehovha.’ Babake na make vaya vakamubaraya vanozomuuraya ngo ndava yo kuporofeta kwake.
4 “Pa njiku yondhoyo, muporofeti wese anozopseruka ngo ndava yo civoniso cake paanozoporofeta. Ngokuti ivona avazosimiri nguvo yavo yo basa yo dovo kuti vacengeje vandhu.
5 Umwe na umwe wavo anozonanga kudari: ‘Inini andiripi muporofeti. Ndiri murimi, ngokuti pano mundhu wakanditenga inga muranda pandainga ndiri mujaha.’
6 Mundhu ari wese akamuvhunjisa kudari, “Mavonje ari pamuviri* pako, ngo enyi?’ Iyena anozodavira kudari: ‘Mavonje aya ndakamawanira kumuzi ko shamwari jangu.’”
7 “Iwewe banga, mukai uhwise muhavisi wangu,Uhwise mwanarume wandinoshamwarijana naye,” izvi ndizvona zvinonanga Jehovha wo hondo.
“Bayai muhavisi kuti mushambi uparajike;Inini ndinozomusa mukono wangu kuti ndihwise vandhu vaya vacingasisiri.”
8 “Pa nyika yese iyi,” Jehovha anonanga kudari,“Mativi maviri o vandhu anozopejwa, ozofa;Rozosara divi ro citatu.
9 Inini ndinozoita kuti divi ro citatu ripinde ngo pamuriro;Ndozovacenesa inga kuceneswa kunoithwa sirivha,No kuvaeja inga kuejwa kunoizwa goridhi.
Ivona vanozodaninja zina rangu,Inini ndinozovadavira.
Ndozonanga kudari: ‘Ivona vandhu vangu,’
Ivona vanozoti: ‘Jehovha ndiyena Mwari wedu.’”
Masoko o Pasi
^ Kana: “sime, dima.”
^ Gama ngo Gama: “pakati no pakati po nyara jako?” Zvinoreva: “paditi kana kumusana”.
