Zakariya 14:1-21
14 “Vonanyi! Iri kuguma njiku, njiku ya Jehovha, vandhu pavanozokovanisana zviro zvako zvakatohwa pakati pako.
2 Ndinozounganija majinja ese kuti ahwise Jerusarema ngo hondo; dhorobha rinozotohwa, nyumba jinozopambwa, vanakaji vanozojipwa. Dimbu ro vandhu vari mu dhorobha rinozoendeswa kuuranda, asi vaya vanozosara mu dhorobha avazouraiwi.
3 “Jehovha anozobuda woenda kohwisa majinja aya ese inga zvaanoita pa njiku yo hondo.
4 Mu njiku yondhoyo, soka jake jinozocika Dundhu ro Maorivhe riri kumavhazuva rakasotana no Jerusarema. Dundhu ro Maorivhe rinozomweswa ngo pakati no pakati, wozobuda muterero mukuru kuvhira kumavhazuva mbhera kumavirira. Divi rimwe ro dundhu rinozoenda kanjikazi, divi rimweni rinozoenda kakusi.
5 Imwimwi munozotiza moenda ku muterero yo matundhu angu, ngokuti muterero yo matundhu inozogumira ku Azeri. Imwimwi munozodikana kutiza inga kutiza kwamakaita ngo ndava yo mudhuma ngo pasi wakaitika mu njiku ja Mambo Uziya wo ku Judha. Jehovha Mwari wangu, anozoviya, vacena vese vanozoviyavo naye.
6 “Mu njiku yondhoyo, akuzovi no ruvheneko. Zviro zvese zvinozopera kuvoma.
7 Inozova njiku icikazoezaniswi no imweni, yozozivika inga njiku ya Jehovha. Aizoiti masikati nee usiku; asi zuva parinonga rovira kunozova no ruvheneko.
8 Pa njiku yondhoyo, kumwa inopekeja upenyu, inozopopoma yecivha ku Jerusarema, imweni inozoenda ku jombe ro kumavhazuva, imweni ku jombe ro kumavirira. Izvi zvinozoitika pa mukuwo wo cirimo no wokutondhora.
9 Jehovha anozova Mambo wo nyika yese. Pa njiku yondhoyo, Jehovha anozova umwe basi, zina rake rinozova rimwe basi.
10 “Nyika yese iyi inozova inga Arabha, kutangira Gebha mbhera Rimoni kakusi ko Jerusarema. Jerusarema rinozokujwazve pa ndau yaro rozogahwazve kuvhira ku Musuvo wa Bhenjamini mbhera ku ndau yo Musuvo wo Kutanga. Kuvhira pondhopo, mbhera Kucikina co Musuvo. Kutangirazve ku Mupfimbiji wa Hananeri mbhera ku ndau inosvinihwa vhinyu ya mambo.
11 Vandhu vanozogara mu Jerusarema; irona arizotongehwizve kuparajwa, vandhu vanozogaremo vacingathyi ciri cese.
12 “Iyi ndiyona ndhendha inozoshandiswa ndi Jehovha kuti ahwise vandhu vese vakahwisa Jerusarema: Mushuna wavo, unozovora vakaima, majiso avo anozovorera mukati, rurimi hwavo unozovorera mukanwa.
13 “Pa njiku yondhoyo, Jehovha anozoita kuti vatame kuzwanana ngo cavo, umwe na umwe anozobata mukono wo shamwari yake, vohwisana vega.
14 Judha anozobatanijwavo pa hondo ku Jerusarema; upfumi hwo majinja ese wakaritendeneja unozounganijwa, goridhi, sirivha no nguvo jakawanda maningi.
15 “Ndhendha yakaezana na iyana inozowiravo haci, mura,* kamera, mbongoyo no mushambi jese jinonga jiri mu Akampamento.
16 “Majinja ese anozoviya kohwisa Jerusarema. Mundhu wese anozosara, anozoenda gore ngo gore konamata Mambo, Jehovha wo hondo, no kumuitira Mutambo wo Mucaca.
17 Asi kudari pa mbhuri jese jo pa nyika pakava no ari wese anozotama kwenda Jerusarema konamata Mambo, Jehovha wo hondo, aazonisihwi nvura.
18 Kudari mbhuri yo Ejipita ikatama kuviya yonghwina mondhomo, iyona aizonisihwi nvura. Kunja kwa izvi, inozowihwa ngo ndhendha inozotumihwa ndi Jehovha ku majinja ese anozotama kuviya koita Mutambo wo Mucaca.
19 Uku ndikona kupanicwa kunozoitihwa Vaejipita ngo ndava yo cishaishi cavo no cishaishi co majinja ese anozotama kwenda koita Mutambo wo Mucaca.
20 “Pa njiku yondhoyo, pazvinginde-nginde zvo mahaci panozotahwa kudari: Uceni ngo wa Jehovha! Mbende jiri mu nyumba ya Jehovha jinozoita inga tijhera pamberi po artari.
21 Mbende jese jo Jerusarema no jo Judha, jinozoceneswa jozova ja Jehovha wo hondo. Vese vanozoita mupiro vanozoviya vozoshandisa jimwe jakona kuti vabikiremo. Pa njiku yondhoyo, akuzowanikizve Mukhanani* mu nyumba ya Jehovha wo hondo.”
