Zakariya 2:1-13
2 Inini ndakamusa musoro ndovona mwanarume ano bote ro kupima munyara.
2 Inini ndakavhunjisa kudari: “Uri kwenda kwapi?”
Iyena wakadavira kudari: “Ndiri kwenda koopima Jerusarema kuti ndivone upambhi no urebu hwaro.”
3 Ngo kudaro, ngirozi yaibhuyaya na inini yakabuda, ngirozi imweni yakaviya koosongana nayo.
4 Yakaivhunja kudari: “Gogomai mbhera kondhoyo uvhunje mujaha uwo kuti ‘“Jerusarema rinozogahwa inga dhorobha ricina mupfimbiji. Ngo ndava yo vandhu vari mukati maro no zvipfuyo.
5 Inini ndinozova mupfimbiji wo muriro ku mativi aro ese,” izvi ndizvona zvinonanga Jehovha, “ndinozokujwa pakati paro.”’”
6 “Viyanyi! Viyanyi! Budanyi mu nyika yo kanjikazi mutize, izvi ndizvona zvinonanga Jehovha.
“Ngokuti inini ndakamundhandhanisa ku mativi marongomuna o mbhepo jo kumatenga,” izvi ndizvona zvinonanga Jehovha.
7 “Viyai Ziyoni! Tizai iwewe unogara no mwana wokaji wo Bhabhironi.
8 Ngokuti Jehovha wo hondo, wiya wakakujwa, wakanditumira ku majinja aimubira wakananga kudari: ‘Wiya anomupsasa, anopsasa mukati mo jiso rangu.
9 Wari ndinozovamusira nyara yangu ndozovahwisa, ivona vanozoita kafani jo varanda vavo.’ Imwimwi munozoziva kuti Jehovha wo hondo ndiyena wakandituma.
10 “Tambai ngo mudakaro mwana wokaji wo Ziyoni, ngokuti ndiri kuguma. Inini ndinozogara pakati pako,” izvi ndizvona zvinonanga Jehovha.
11 “Mu njikuyo, majinja mazinji anozoenda kuna Jehovha vozova vandhu vangu, inini ndinozogara pakati pako.” Iwewe unozoziva kuti Jehovha wo hondo wakandituma kwauri.
12 Jehovha anozoita kuti Judha iite ndhaka yake mu nyika yakacena. Iyena anozosanazve Jerusarema.
13 Imwimwi mwese, nyararanyi pamberi pa Jehovha, ngokuti iyena ari kubuda pa ndau yake yakacena yaanogara kuti aite zvaakaronga.
