Zakariya 4:1-14
4 Ngirozi yaibhuyaya neni yakaviya yondimusa inga mamusihwe anoithwa mundhu wakavata.
2 Iyona yakandivhunjisa kudari: “Uri kuvonenyi?” Inini ndakati: “Ndiri kuvona cigajikiro co cibani* cakaizwa ngo goridhi, panyezuru paco pano tijhera. Icona cino zvibani* zvinomwe, hina zvinomwe. Panyezuru paco pano tubu* nomwe.
3 Phedo paco pano muti muviri yo maorivhe, umwe uri ku mukono muho wo tijhera umweni uri ku mukono boshwe.”
4 Inini ndakavhunjisa ngirozi yaingaya yecibhuya na inini kudari: “Mambo wangu, zviro izvi zvinoda kunangenyi?”
5 Ngirozi yaibhuyaya neni yakandivhunjisa kudari: “Iwewe auzvizivi kuti zviro izvi zvinoda kunangenyi?”
Inini ndakaidavira kudari: “Andizvizivi mambo wangu.”
6 Iyona yakandivhunja kudari: “Aya imasoko a Jehovha kuna Zorobhabheri: ‘“Azviithwi ngo masoca nee ngo simba asi ngo mujimu wangu,” izvi ndizvona zvinonanga Jehovha wo hondo.
7 Uri ani iwewe dundhu guru? Pamberi pa Zorobhabheri iwewe unozova bani. Iyena anozoviisa buwe ro panyezuru, panonga pecimimihwa kudari: “Kunaka kwarakaita hanyi! Kunaka kwarakaita hanyi!”’”
8 Ndakavhunjwazve ndi Jehovha kudari:
9 “Nyara ja Zorobhabheri ndijona jakadira maambo o nyumba iyi, ndijonazve jinozopejesa nyumba iyi. Iwewe unozoziva kuti Jehovha wo hondo ndiyena wandituma kwamuri.
10 Ndiyani wakashora njiku jo zviro zvidoko? Ngokuti ivona vanozodakara vecivona bote ro kupima mu nyara ja Zorobhabheri. Majiso manomwe aya ngo a Jehovha, iwona anotenderera pasi pese.”
11 Tevere ndakavhunjisa kudari: “Muti muviri iji jo maorivhe umwe ku mukono muho umweni ku mukono boshwe kocigajikiro co cibani,* jinoimirirenyi?”
12 Ndakamuvhunjisazve kudari: “Zvanja zviviri izvi zvo matavi o maorivhe zviri kudondhari mafuta akaita inga o goridhi, ecibuda ngo mu tubu* mbiri jo goridhi, zvinoimirirenyi?”
13 Iyena wakandivhunjisa kudari: “Iwewe auzvizivi kuti zviro izvi zvinoimirirernyi?”
Inini ndakamudavira kudari: “Andizvizivi mambo wangu.”
14 Iyona yakandivhunja kudari: “Ava ndivona vandhu vaviri vakazojwa,* vakaima phedo na mambo wo nyika yese.”
Masoko o Pasi
^ Kana: “cigabhu-gabhu.”
^ Kana: “zvigabhu-gabhu.”
^ Kana: “mupopi, muphaiphi munomwe.”
^ Kana: “cigabhu-gabhu.”
^ Kana: “mupopi, muphaiphi muviri jo goridhi.”
^ Vonanyi Kudurujihwa ko Magama pa gama rokuti “vokuzojwa.”
